Æнхъæлмæ кæсæм цымыдисон мадзæлттæм

Ацы æмæ æрцæуинаг къуырийы сæйраг политикон цаутыл афæлгæст сарæзта информаци æмæ мыхуыры паддзахадон комитеты сæрдар Хъотайты Мария Спутник – Хуссар Ирыстоны пресс-центры.

Абхаз æмæ Сиримæ балцытæ

Хуссар Ирыстоны паддзахадон делегацитæ ацы къуыри ацæудзысты Абхаз æмæ Сиримæ. Куыд зонæм, уымæ гæсгæ 25 августы Абхазы территорийыл уагъд цæудзысты президентон æвзæрстытæ. Уыцы æвзæрстыты хъусдарджыты хуызы хайад райсдзысты Хуссар Ирыстоны Президенты администраци, Парламент æмæ Централон æвзарæн къамисы минæвæрттæ. Зæгъæн ис, уыцы æвзæрстытæ кæй уыдзысты цымыдисон, æрмæст уый тыххæй дæр æмæ паддзахады сæргълæууæджы бынатмæ сæхи кæй цæттæ кæнынц  дæс  кандидаты.

Уымæй дарддæр ма Абхазы дæр, куыд Хуссар Ирыстоны афтæ, уагъд цæуынц паддзахадон хæдбардзинад банымайыны боны цытæн мадзæлттæ. Хъотайты Мария куыд банысан кодта, уымæ гæсгæ нæ абхазаг коллегæтæ бацæттæ кодтой киноныв хæдбардзинад банымайыны тыххæй, кæцы æвдыст æрцæудзæн 26 августы  Цхинвал æмæ Сухумы.

Нæ сæйраг бæрæгбон –  хæдбардзинады бон

Хуссар Ирыстоны къуырийы райдианы уагъд цæудзысты Уæрæсейы Федераци нын нæ республикæйы паддзахадон хæдбардзинад куы банымадта, уыцы ахсджиаг боныл 11 азы кæй сæххæст, уый цытæн бæрæгбонон мадзæлттæ. Уый тыххæй, Марияйы ныхæстæм гæсгæ, паддзахадон мадзæлттæ уадзыны фæдыл республикон къамис бацæттæ кодта сæрмагонд программæ. 

Уыцы бон байгом уыдзæн нывты равдыст «Мир, в котором мы живем». Къостайыхъæуы уагъд æрцæудзæн стыр этнографион бæрæгбон «Наследие предков», цыран æвдыст æрцæудзысты национ амалиуæгады предметтæ, хъæдæй арæзт алыгъуызон æрмæджытæ, национ къæбицы хæринæгтæ æмæ бынæттон фермерты æркæнгæ фæллой. Уыцы хъæлдзæгдзинад æххæст цæудзæн аивады фæрцы. Изæрæй нæ бæстæйы цæрджытæ æмæ уазджытæм горæты стадионы æнхъæлмæ кæсы бæрæгбонон концерт.

Нысаниуæгджын цауты æхсæн ма   Информаци æмæ мыхуыры комитеты сæргълæууæг рахицæн кодта Сиримæ Хуссар Ирыстоны Хицауады Сæрдары хæдивæг, Экономикон рæзты министр Бекъойты Геннади æмæ Сæудæджерады комитеты сæргълæууæг Санахъоты Батрадзы балц, цыран 26 августæй 1 сентябрмæ уагъд цæудзæн 61-æм Дамаскаг армука.

«Хуссар Ирыстоны делегаци ба-бæрæг кæндзæн кондадон уагдæттæ, фендзысты базарадон потенциал, кæцы фæахъаз уыдзæн мах бæстæйæн дæр, кæд æмæ Хуссар Ирыстон Сириимæ базарадон ахастытæ æрбæстон кæнын фæнд кæны, уæд. Уымæй дæр Сиримæ нæ бæстæйы Президент Бибылты Анатолийы балцы фæстæ бæстæты æхсæн бафыст æрцыд æддагон политикæ, экономикæ, зонад, ахуырад æмæ спорты фарстаты æмгуыстады фæдыл бадзырд», – банысан кодта Комитеты сæргълæууæг.

Ацы ахсджиаг балцы фæстиуджы-тæ бæрæг уыдзысты, делегацийы минæвæрттæ фæстæмæ куы æрыздæхой, уæд.

Хъæууон хæдзарады  къабаз

Ацы къабазыл дзургæйæ Хъотайты Мария хъусдард аздæхта, æрæджы Хуссар Ирыстоны хицауады уынаффæмæ – хъæууон хæдзарады, уæлдайдæр фосдарды къабазы профессионалон кадртæ бацæттæ кæныны æнæмæнгхъæуындзинад. Уый нысан кæны афтæ, æмæ ветеринартæ, фельдшертæ æмæ зоотехниктæ æдзух кæй бæрзонд кæндзысты сæ зонындзинæдты æмвæзад бирæпрофилон колледжы базæйы бындурыл. Квалификаци бæрзонддæр кæныны курсытæ сын уагъд цæудзысты Уæрæсейæ æрхонгæ специалистты руаджы. Ацы программæйы æнæмæнгхъæуындзинадыл дзырд куы цæуа, уæд хъæууон хæдзарады фадыджы иуæй-иу кусджытæн ис астæуккаг профессионалон ахуырад æмæ сæ хъæуы бæрзонддæр кæнын сæ зонындзинæдтæ. Йæ ныхæстæм гæсгæ ацы курсытæ уадзын план цæуынц афæдз иу хатт иу мæйы дæргъы.

Ныртæккæ республикæйы территорийыл фæллой кæнынц 76 ветеринарон службæйы кусджытæ, æмæ уыдонæн сæ зонындзинæдтæ фæхъæздыгдæр кæнын æмæ аттестаци ахсджиаг у, уымæн æмæ рæстæгæй рæстæгмæ фæзыны алыгъуызон эпидемийы ныхмæ мадзæлттæ уадзыны ног методтæ. Æмæ ветеринарон службæты лæмæгъ куысты аххосæгтæ сты, ивгъуыд аз хынцыд кæй æрцыдысты хæдзарон стурвосы алыгъуызон низтæй рынчыны цаутæ, уый. Куыд ма банысан кодта, уымæ гæсгæ ацы аз вакцинаци уагъд æрцæудзæн къорд тæссаг низты ныхмæ.

Къӕбулты Марина