Æнæнцой бонтæ

Дзыллон информацийы фæрæзты фæрцы арæх базонæм æмæ хъусæм магнитон тымыгъты тыххæй, Зæхх кæй фæвæййы цавæрдæр æнагъæддаджы энергийы бын æмæ афтæ дарддæр. Уыдæттæ гæнæн ис фæтæрсын кæной, чи сæ æнкъары, уыцы цæрджыты сæ глобалондзинадæй, æмæ сæ ныхмæ хостæ кæй нæй, уымæй. Æцæгæйдæр, магнитон тымыгътæй хи бахизæн нæй, гæнæн ис æрмæстдæр йе ‘ндæвдады æмвæзад фæкъаддæр кæнын, хуымæтæджы рекомендацитæ æххæст кæнгæйæ. Ахæм рекомендациты тыххæй у нæ ныхасы сæр дæр.

Магнитон тымыгътæ уæлдай тынгдæр æндавынц, боныгъæды ивындзинæдтæ кæй организм тынгдæр æнкъарынц, уыдон. Хур йæ фæтынгдæр активондзинады рæстæджы йæ уæлцъарæй ракалы тынг бирæ протонтæ, электронтæ. Статистикæ куыд амоны, афтæмæй дунеон масштабы фыдбæллæхтæн се 70% æрцæуынц растдæр магнитон тымыгъты рæстæджы. Бафиппайдæуыд, ивгъуыд æнусы 30-æм азты Францы ахæм рæстæджы ацæргæ адæймæгты ‘хсæн цæхгæр кæй фæфылдæр сты миокарды инфарктты æмæ инсультты бæрц.

Се ‘нæниздзинад боныгъæдæй æвдисгæ кæмæн у, уыдонæн сæ хиæнкъарынад февзæрдæр вæййы, нæ планетæйæн «аллерги» кæй ис Хуры сытынггонд активондзинадмæ, уый аххосæй. Уый та æрцæуы Хуры энерги æмæ Зæххы магнитон быдыры æмархайды руаджы. Геомагнитон æвæрццаг æндæвдадæй фæтыхсы адæмы фылдæр хайæн сæ организм, фæлæ йæ бирæтæ нæ фенкъарынц. Æцæгæй та фæтыхсынц Зæххы цæрджытæн сæ 10-15%. Æрмæстдæр иууыл æнкъарагдæр адæймæгтæ, гæнæн ис, цалдæр боны размæ фæхатой магнитон тымыгъ кæй æрæввахс кæны, кæд ахæм тымыгътæ бæрцæй цалдæр сахаты йедтæмæ нæ аххæссынц, уæддæр.

Магнитон тымыгъты æндæвдады бын арæхдæр бахауынц сывæллæттæ, кардзыд адæймæгтæ, чи бафæллад кæнæ стрессы уавæры чи сты, ахæмтæ. Кæуыл æндавынц, уыдон сæйраджыдæр, фæхъæрзынц сæры рыстæй, æгъуыссæгдзинадæй, æвзæр хи-æнкъарынадæй, зæрдæйы цавд фæтынгдæр вæййы. Статистикæмæ гæсгæ, геомагнитон тымыгъты рæстæджы, «Тагъд æххуыс»-ы кусджыты арæхдæр бахъæуы стенокарди, инфаркт æмæ гипертоникон кризтæй рынчынтæн баххуыс кæнын. Уый та дзурæг у, уыдоныл тынгдæр кæй æндавы. Геомагнитон быдыры ритмикон ивындзинæдтæ зæрдæйы цавды диапазоны куы вæййынц, уæд уый расайы аритмия, гæнæн ис æркæна инфарктмæ дæр. Афтæ ма адæймаг гæнæн ис æвзара туаггуыры хъуагдзинад, тугдадзинты туджы цыд кæй фæкъаддæр вæййы, уымæ гæсгæ. Организм тугмæ тынгдæр дæтты стрессы гормонтæ адреналин æмæ кортизол. Æппынфæстагмæ, туджы нал æвзæры адаптацийы гормон – мелатонин.

Магнитон тымыгътæ ахæм стыр тæссагдзинад не ‘взарын кæнынц бирæтæн, фæлæ, куыд фæзæгъынц, тасы цæстытæ стыртæ сты. Иртасæнты бæрæггæнæнтæм гæсгæ фылдæр хатт скъуыддзаггæнæг нысаниуæг вæййы дæхицæн уырнын кæнын. Раздæр чи базоны æрбалæууинаг магнитон тымыгъты, уыдонæн уайтагъд сæ хиæнкъарынад февзæрдæр вæййы, кæд гæнæн ис æмæ ахæм тымыгътæ ма уа, уæддæр. Ахæм рæстæджы дохтыртæ амонынц, цæмæй сæ зæрдыл дарой цалдæр хуымæтæджы фæдзæхсты æмæ паникæйы ма ныххауой.

ЦЫ ХЪÆУЫ САРАЗЫН МАГНИТОН ТЫМЫГЪЫ РÆСТÆДЖЫ?

Магнитон тымыгъы рæстæ-джы нæй гæнæн сынтæгæй æвиппайды фæгæпп кæнын – разилы сæр, афтæмæй та фæуадзыгуæвæн дæр ис. Уый уыдзæн адæймаджы буары туджы æрзылд дæр кæй æййафы. Гипертонийæ хостæ чи нуазынц, уыдонæн уымæй уæлдай тæссагдæр у.
Нæ хъæуы æгæр бирæ физикон куыст кæнын.
Нæ хъæуы бирæ хæрын, уæлдайдæр та зæрдæдадзинты низтæй рынчынты. Æгæр бирæ хæрд гæнæн ис суа зæрдæнизты сцырыны цырынгæнæн катализатор. Æххормаг æййафын дæр пайда не ‘рхæсдзæн. Уый бæсты хæрут донвых кæсаг, кас æмæ сойджын чи не сты, ахæм продукттæ æмæ уе ‘нæниздзинад уыдзæн хуыздæр. Рох кæнын нæ хъæуы дыргътæ æмæ халсарты дæр. Уыдоны цы калий, магний, æрхуы æмæ йод ис, уыдон сты пайда. Афтæ ма хæрын хъæуы изюм, курага, банан, хъæбæрхоры кæрдзын. Цæвиттон, бынаты сты биологион æгъдауæй активон буарадтæ, кæцытæ лæмæгъдæр кæнынц нуæртты системæйыл адреналины æндæвдад.
Кæд æмæ ахсæн æнæниз у, фæлæ уыл магнитон тымыгътæ æндавынц, уæд бануазут аспирины æрдæг таблеткæ. Йæ компоненттæ тæнæгдæр кæнынц туджы æмæ къаддæр кæны зæрдæдадзинты проблемæты фæзынд. Адæмон медицинæйæ чи пайда кæнынц, уыдон гæнæн ис нуазой алыгъуызон хосгæнæн тадтагтæ, стыр æххуыс сты женьшены, сыгъзæрин корицæйы, китайаг лимонникы экстракттæ, уагъылы, валерианæ, мелиссæ.
Магнитон тымыгъты æндæвдад фæкъаддæр кæнынæн ахъаз кæны дон дæр. Уымæ гæсгæ ахæм рæстæджыты арæхдæр хъæуы хи найын, кæнæ та хи æхсын. Рох кæнын нæ хъæуы уый æмæ метеоуавæртæ кæуыл æндавынц, уыдонæн уый низ кæй нæу, уый дæтты æрмæстдæр сигнал, æндæр низты тыххæй. Магнитон тымыгъты рæстæджы фыццаджыдæр хъæуы диагноз сæвæрын, хи мæгуырау цæй тыххæй æнкъарыс, уымæн. Хъæуы ма хъус дарын магнитон тымыгъты фæдыл хъусинæгтæм.

Тæссаг вæййы ахæм тымыгъы фæстæ дыккаг бон дæр. Уæд уæлдай тынгдæр фæтыхсынц шофыртæ. Уыдонæн цыппар хатты фæкъаддæр вæййы сæ реакци.

Мыхуырмæ йæ бацæттæ кодта Дзебысаты Г.