Иу къуырийы дæргъы горæт Цхинвалы йæ куыст кодта уæрæсейаг-хуссарирыстойнаг æмразыгæнæн къамис. Йе сконды сты Хуссар Ирыстоны æмæ Уæрæсейы æфсæддон ведомствоты минæвæрттæ. Информагентад «Рес»-æн РХИ-йы Хъахъхъæнынады министрады пресс-службæ куыд фехъусын кодта, афтæмæй ацы къамис арæзт æрцыд Хуссар Ирыстоны хъахъхъæнынады министр, инæлар-лейтенант Гасситы Ибрагимы куырдиатмæ гæсгæ уæрæсейаг хъахъхъæнынады ведомствойы сæргълæууæг, армийы инæлар Сергей Шойгуйы номыл.
Фембæлды, хуссарирыстойнаг фарсæрдыгæй хайад райстой РХИ-йы хъахъхъæнынады министр Гасситы Ибрагим, республикæйы Гарзджын тыхты Генералон штабы хистæр инæлар-майор Виктор Федоров, Президенты уынаффæгæнæг Алек-сандр Крайнов æмæ æндæртæ.
Къамисы уæрæсейаг хайы сконды сты Уæрæсейы Федерацийы хъахъхъæнынады министрады алыгъуызон департаментты минæвæрттæ.
Фембæлды райдианы Гасситы Ибрагим раарфæ кодта уæрæсейаг делегацийы минæвæрттæн æмæ зæрдыл æрæфтыдта, 2010 азы паддзахадты æхсæн къухтæ фыст кæй æрцыдысты РХИ-йы территорийыл уæрæсейаг иугонд æфсæддон базæйы тыххæй сразыдзинадыл.
«Банысан кæнын хъæуы, уæрæсейаг гарзджын тыхты уæвынад у Хуссар Ирыстоны сабырад æмæ æдасдзинады гарант, аразы паддзахады рæзтæн хорз уавæртæ. Уæрæсейаг æфсæддонты уæвынады фæрцы мах ныфсджынæй кæсæм нæ фидæнмæ», – загъта уый.
Министр зæрдыл æрæфтыдта, документы 23 статьямæ гæсгæ, сразыдзинад сæххæст кæныны фæдыл цы фарстатæ сæвзæры, уыдон скъуыддзаг кæныны тыххæй арæзт кæй цæуы æмразыгæнæн къамис.
«Ацы къамисы сырæзт рæстæджы домæн у, уымæн æмæ нæ бахъуыд, нæ дыууæйæн дæр цымыдисдзинад цы фарстатæ æвзæрын кæны, уыдон скъуыддзаг кæнын», – банысан кодта уый.
Уæрæсейаг делегацийы уæнгтæ, дæр бузныджы ныхæстæ загътой Гасситы Ибрагимæн хъæрмудæй сæ кæй райста æмæ куыстæн хорз уавæртæ арæзт кæй æрцыд, уый тыххæй. Æмбырды рæстæджы уынаффæ кодтой 4-æм æфсæддон базæйы архайд, Хуссар Ирыстоны хъахъхъæнынады министрад æмæ республикæйы паддзахадон хицауады алыгъуызон органтимæ æмархайадимæ баст иукъорд фарстытыл. Къамисы куысты фæстиуæг сси, кусæгон къордты сæрдæрттæ сæ къухтæ суагъæйыл кæй æрфыстой, уый.
Къамисы куыстыты фæстаг бон уæрæсейаг делегацийы уæнгтæ ссардтой уæрæсейаг фидауынгæнджытæ æмæ æфсæддонты рухс нæмттæ, уæрæсейаг фидауынгæнæн контингенты казармæйы номарæн дзуары раз æмæ Уæрæсейы Хъайтар майор Денис Ветчиновы цыртыл сæвæрдтой веноктæ æмæ динджытæ.
Comments are closed, but trackbacks and pingbacks are open.