19 октябры Информаци æмæ мыхуыры паддзахадон комитеты сæргълæууæг Хъотайты Мария «Sputnik»-ы пресс-центры йæ брифингы дзырдта чысыл æмæ астæуккаг амалиуæггæнджытæ цалдæрæй ацы аз паддзахадæй хатырон кредиттæ кæй райстой, уый фæдыл.
«Куыд зонæм, афтæмæй фарон ноябры Хуссар Ирыстоны президент Бибылты Анатоли, Уæрæсейы Федерацийы президент Владимир Путинимæ куы фембæлд, уæд æрдзырдтой нæ бæстæйы хъæууонхæдзарадон фарстытыл дæр. Цæмæй бæстæйы экономикæ рæза æмæ бюджетмæ æфтиæгтæ цæуа, уый фæдыл паддзахад æххуысæн хъуамæ дæтта хатырон кредиттæ», – дзырдта брифинджы рæстæджы Хъотайты чызг.
Уый куыд банысан кодта, афтæмæй хъæууон хæдзарады фæдыл хатырон кредиттæ радтыныл дзырд цыд 2016 азæй фæстæмæ. Парламенты профилон комитеты разамонæг Джиоты Инал бакуыста сæрмагонд закъоны проектыл дæр. Документ лæмбынæг сахуыр æрцыд фæндæттæ æмæ фиппаинæгтимæ. Экономикæйы райрæзты æмæ хъæууон хæдзарады министрадтæм документ æрвыст æрцыд дыууæ хатты, цæмæй номхыгъды цы 150 амалиуæггæнæджы ис, уыдон тыххæй уæрæх информаци æвдыст æрцæуа. Æнæмæнгхъæуæг информаци æрæмбырд кæныны фæстæ, Экономикон райрæзты специалисттæ, паддзахадон программæйыл æнцойгæнгæйæ, хатырон кредиттæ снысан кодтой 50 æмбæстагæн.
«Кредиттæ райсыны процедурæ максималонæй фæхуымæтæгдæр: амалиуæггæнæг цæмæй 400 мин сомы райса бангæй, уый тыххæй йын æвдисæнæн хъуамæ балæууой 3 адæймаджы. Иу милуан æмæ уымæй фылдæр суммæ райсын кæй фæнды, уыдон та нысайнагæн хъуамæ исты нывæрой банджы хыгъдыл», – загъта Хъотайты Мария.
Комитеты сæргълæууæг куыд зæгъы, афтæмæй банг кредиттæ дæтты афæдзæн 12 проценты. Уыцы суммæйæ кредитор фиды 5 проценты иннæ 7 проценты та фиды хатырон кредиты къамис. Кредиттæ лæвæрд цæуынц 3 азы æмгъуыдмæ, амалиуæггæнджытæн æмæ экономикон райрæзты хатырон кредитты тых-хæй сæрмагонд къамисы бадзырдмæ гæсгæ.
Къамис цы 50 адæймаджы равзæрста конкурсон системæмæ гæсгæ, уыдон, сæйраджыдæр, сты фермертæ, кæцытæ сты – фосдард, дыргъ æмæ хъæрмуаты фæдыздæхты чи кусы, ахæмтæ. Кæсаджы хæдзарад рауæрæх кæнын æмæ æнгузтæ ныссадзыны фадыджы чи архайы, ахæм амалиуæггæн-джытæ дæр бахаудысты хатырон кредиттæ чи хъуамæ райса, уыдоны номхыгъдмæ.
«Паддзахад æппæт амæлттæй дæр архайы, цæмæй чысыл æмæ астæуккаг амалиуæггæнджыты фарсмæ балæууа. Райдианы ацы хæрдзтæ хъуамæ уыдаиккой 21 милуан сомы, фæлæ стæй, сæрмагондæй, уыдон тыххæй хицæн æрцыд 23 милуан 467 мин сомы. Уымæ гæсгæ хатырон кредиттæ лæвæрд æрцæудзæн фылдæр амалиуæггæнджытæн», – дзырдта Хъотайты Мария.
Уый ма загъта, ацы фæдыздæхты куыст кæй цæудзæнис 2019 азы дæр. Сæудæджерады хаххыл архайын æмæ кусын кæй фæнды, ахæм амалиуæггæнджытæн хатырон кредиттæ лæвæрд цæудзæн 2019 азы. Уый иуæй ратдзæн куысты бынæттæ, иннæмæй та паддзахадон бюджетмæ цæудзæн æфтиæгтæ æмæ хорзæрдæм æндавдзæн республикæйы экономикæйыл. Номхыгъды цы 150 амалиуæггæнæджы уыд, уыдонæй фæстæмæ аздæхтой 2 адæймаджы, уымæн æмæ сын уыд æвзæр кредитон историтæ. Иу амалиуæггæнæгæджы та йæ бон не ссис нысайнаг ныууадзын.
Уазæгты Марфа
Comments are closed, but trackbacks and pingbacks are open.