Хуссар Ирыстон æмæ Гуырдзыстоны паддзахадон арæнтæм хæстæг цæрæн пункт Ергнеты цур дæргъвæтин рæстæджы фæстæ уагъд æрцыд Инциденттæ ма æруадзын æмæ сæм хъусдард здахыны фæдыл механизмты фæлгæтты радон фембæлд. Фембæлды рæстæджы йæ хайадисджытæн уыд арæнтæм æввахс æрцæугæ цаутыл, афтæ ма фæрсты цы фарстатæ тыхсын кæнынц, уыдоныл æруынаффæ кæныны фадат.
Фембæлды кæрон хуссарирыстойнаг делегацийы сæргълæууæг, Фæсконфликтон бæстонкæнынады фарстаты фæдыл РХИ-йы Президенты æххæстбарджын минæвары хæдивæг Коцты Егор хуссарирыстойнаг информацион фæрæзты минæвæрттæн радзырдта йæ фæстиуджыты фæдыл. Йæ ныхæстæм гæсгæ, механизмты фæлгæтты фембæлд уагъд æрцыд конструктивон здæхты. Хуссарирыстойнаг фарс та ногæй цæхгæр æрæвæрдта, Хуссар Ирыстон æмæ Гуырдзыстоны ‘хсæн паддзахадон арæнтæ кæуылты цæуынц, уый снысан кæныны фарст. Фæлæ уыцы ахсджиаг фарст гуырдзиаг фарс, куыд уымæй размæ, афтæ ныр дæр бæтты политикæимæ фæзуатмæ.
«Мах кæд архайдтам, бæрæг фарстæн æрмæст практикон нысаниуæг кæй ис адæмы царды уый банысан кæнын, ома, уадз æмæ адæм зоной Хуссар Ирыстон æмæ Гуырдзыстоны территоритæ кæм хицæн кæнынц, уый, уæддæр дзæгъæлы», – дзырдта уый.
Уымæй дарддæр ма механизмты фæлгæтты дзырд цыд, гуырдзиаг националисттæ Хуссар Ирыстоны арæнтæм хæстæг провокацион митингтæ кæй уа-дзынц, уыцы фарстыл дæр. Хуссарирыстойнаг фарс банысан кодта, зæгъгæ, Хуссар Ирыстоны арæнхъахъхъæнджыты фæразондзинад æмæ барадхъахъхъæнæг органты зондджын архайды руаджы уыцы инцидент не скарз æмæ дзы фыдбылыз не ‘рцыд. Уымæн æмæ митинггæнджытæ сæхи куыд æмбæлы, афтæ не ‘вдыстой – дзырдтой æнæхъола ныхæстæй æмæ æвдыстой сæ гом буары хæйттæ.
Паддзахадон арæн халыны цаутæ уыд 8, кæд сæ гуырдзиаг фарс 12 хоны, уæддæр. Арæнхалджытæ бæрæг процедурæтæ рацæуыны фæстæ сæрибар æрцыдысты. Евроцæдисы миссийы хъусдарджытæ æдзух уæлдæфы уадзынц аэростат, кæцы æдзух дызæрдыджы æппары бынæттон цæрджыты. Уыдонæн зын бамбарæн у – æбæрæг тæхæг аппарат æфсæддон нысаниуæджы объект кæй нæу, фæлæ дзы хъусдарджытæ пайда кæнынц территоримæ хъус дарынæн. Уый Гуырдзыстоны территорийыл ис æмæ йæ хуссарирыстойнаг территорийы цæрджытæ дæр уынынц.
Коцты Егоры ныхæстæм гæсгæ, нæ нымæг кæнынц Арчил Тъатъунашвили æмæ Давид Башарулийы фæдыл фарстатæ. Уый тыххæй хуссарирыстойнаг фарс ноджыдæр бамбарын кодта, ацы æмбæстæгты фæдыл фарстатæ механизмты мандаты фæлгæтты кæй не сты.
Хуссарирыстойнаг делегацийы сæргълæууæг ма банысан кодта иу хъуыддаг – механизмты куыстæн хатдзæгтæ аразгæйæ, гуырдзиаг фарс комментаритæ Хуссар Ирыстоны информацион фæрæзтæн кæй нæ дæтты, уыцы аххосагмæ гæсгæ уыдон дæр Гуырдзыстоны информацион фæрæзтæн рæстæгмæ нал дæтдзысты комментаритæ.
Механизмты фæлгæтты радон фембæлд нысан цæуы 8 февралмæ.
КЪÆБУЛТЫ Маринæ
Comments are closed, but trackbacks and pingbacks are open.