Гуырдзыстоны радон бафæлвæрдтытæ, кæцытæ здæхт сты паддзахадон арæнтыл уавæр фæкарздæр кæнынмæ, тæссагдзинад æвзæрын кæнынц регионы. Паддзахадон арæнтæ гуымир æгъдауæй хæлд цæуынц Знауыры районы Уистæйы хъæуы, гуырдзиаг тыхон структурæты минæвæрттæ уыцы бынаты ныридæгæн кæнынц инженерон куыстытæ.

Уавæр стабилизаци кæныны тыххæй Хуссар Ирыстоны фæндонмæ гæсгæ уагъд цæуынц Инциденттæ ма æруадзын æмæ сæм хъусдард здахыны фæдыл механизмты фæлгæтты техникон фембæлдтытæ, цыран хуссарирыстойнаг фарс ноджы æмæ ноджыдæр домы, цæмæй раздæры Цънелисы хъæумæ хæстæг гуырдзиаг фарс цы æнæзакъонон пост æвæры нæ территорийыл, уый иуварс æрцæуа. Уыимæ иумæ ма хуссарирыстойнаг фарс фæндон хæссы ирон хъæу Уистæйæ (раздæры Цънелисы) суанг гуырдзиаг хъæу Чорчонамæ саразой æдасдзинады зонæ.

Фæсконфликтон фарстатæ бæстонкæнынады фæдыл РХИ-йы Президенты æххæстбарджын Джиоты Мурат информацион фæрæзты минæвæрттæн радзырдта æрæджы механизмты фæлгæтты техникон фембæлды фæстиуджыты тыххæй.

Йæ ныхæстæм гæсгæ, уыцы фембæлды сæйраг фæстиуæг уыд æрмæстдæр уый, æмæ фæрстæ ба-дзырдтой æввахс рæстæджы бадзырдтæ адарддæр кæныныл. Уымæн æмæ йæ æргъæвын нæ хъæуы. Евроцæдисы миссийы хъусдарджытæ консультацитæ уаддзысты алкæимæ дæр. Уый зæрдыл æрлæууын кодта, Уистæйы хъæуы уый размæ цы техникон фембæлд уагъд æрцыд, уым алчи дæр кæй загъта йæ позици. Хуссар Ирыстоны фарсы позици у æнæивгæ – гуырдзиаг полициæгты пост æнæ радзур-бадзурæй ист хъуамæ æр-цæуа уыцы бынатæй. Уымæн æмæ æвæрд у æнæзакъонæй ирон хъæу æмæ уырдæм фæндаджы сæрмæ.

Джиоты Мураты ныхæстæм гæсгæ Хуссар Ирыстоны фарс уыцы полициæгты пост сисыныл дзуры æдзух. Уый хыгъд, гуырдзиаг фарс уыцы пост æвæрыны хъуыддаг нымайы йæ политикон позицийыл æмæ йæ сисын фæнд нæ кæны. Уый нæ, фæлæ ма сæхæдæг куыд дзурынц, уымæ гæсгæ ницы тæссагдзинад хæссæг у.

Фæлæ хуссарирыстойнаг фарс ноджы æмæ ноджыдæр хъусын кæны, уыцы пост æнæзакъонæй æвæрд цæуы Хуссар Ирыстоны территорийыл. Æмæ ма йæ, уæлдæр куыд банысан кодтам, уымæ гæсгæ уыцы пост аиуварс кæнын хъæуы æмæ Уистæйæ Чорчанамæ æдасдзинады зонæ саразын хъæуы, цæмæй уыцы бынаты мадæр иу фарсы, мадæр иннæ фарсы ‘рдыгæй гарзджын посттæ æвæрд ма уа. Æмæ уый фæстæ паддзахадон арæнтæ кæуылты хъуамæ уагъд æрцæуой, уый сбæлвырд кæнын хъæуы.

Уыцы хъуыддагыл – Хуссар Ирыстон æмæ Гуырдзыстоны ‘хсæн паддзахадон арæнтæ сбæрæг кæныныл ныр цалдæр азы дзуры хуссарирыстойнаг фарс.

«Фæлæ гуырдзиаг фарс уыцы хъуыдыйыл нæ разы кæны. Ныртæккæйы сæвзæргæ уавæрты мах фæндон хæссæм ацы бынаты фарстыл æруынаффæ кæнын, фæлæ гуырдзиаг фарсӕрдыгæй æмбаргæ ахаст нæ уынæм. Уымæ нæ кæсгæйæ, дипломатон ахастытæ нæ, фæлæ нæ хъарутæ аздахдзыстæм Хуссар Ирыстоны территорийæ уыцы æнæзакъонон пост аиуварс кæнынмæ.

Цыфæнды уавæрты дæр хуссарирыстойнаг фарс хъусын кæны – Хуссар Ирыстон исдзæн закъонмæ гæсгæ мадзæлттæ нæ адæмы æдасдзинад ифтонг кæныны фæдыл, уымæн æмæ уыцы пост у æнæзакъонон æмæ тæссагдзинад æвзæрын кæны уыцы бынатмæ хæстæг цæрджытæн», – банысан кодта Æххæстбарджын минæвар.

Джиоты Мурат ма куыд загъта, уымæ гæсгæ Хуссар Ирыстоны Генералон прокуратурæ уголовон хъуыддаг бакодта гуырдзиаг æнæзакъонон пост сæвæрыны тыххæй. Уымæн æмæ гуырдзиаг полициæгтæ фехæлдтой арæнты фæтк æмæ æрбахызтысты нæ республикæйы территоримæ.

Уыцы уголовон хъуыддæгты фæлгæтты аивгъуыйгæ къуырийы кæрон пайда æрцыд æнæпилотон тæхæн аппаратæй, кæцыйы руаджы ахуыр цыд арæнтæм хæстæг районы уавæр. Æмæ гуырдзиаг фарс ацы аппарат кæй фехста æмæ æрæппæрста, уый нымад æрцыд Хуссар Ирыстоны ныхмæ агрессивон архайдыл.

Уый тыххæй гуырдзиаг фарс банысан кодта, зæгъгæ, уыцы аппараты ныхмæ æхсæнгарзæй пайда не ‘рцыд.

«Фембæлды рæстæджы уыцы тæхæн аппарат æрбавдыстой гуырдзиаг фарс, æхсæнгарзæй æхсты фæдтæ йыл нæ уыд, фæлæ йыл цъæррæмыхстытæ уыд. Евроцæдисы миссийы хъусдарджытæ йæ сахуыр кæныны тыххæй ахастой. Фæлæ æхстыты тыххæй ницы æмбæлон дзуапп райстам. Æхстытæ уыд, фæлæ гæнæн ис, æмæ аппаратыл нæ сæмбæлдысты. Сæ ныхæстæм гæсгæ, тæхæн аппарат æрæппæрста, зындгонд Давид Кацарава цы аппаратæй пайда кодта, уый. Нæ фарстæн, зæгъгæ, уый цы арæзта арæнтæм хæстæг, нæ райстам æмбæлон дзуапп», – дзырдта Мурат.

Дунеон хъусдарджыты позицийы тыххæй Джиоты Мурат банысан кодта, зæгъгæ, уыдон æппындæр ногæй ницы загътой. Хуссарирыстойнаг фарс бирæ хæттыты нысан кæны уыцы хъуыддаг – дунеон организациты минæвæрттæ хъуамæ ирдæй æвдисой сæ позици.

КЪÆБУЛТЫ Маринæ

Comments are closed, but trackbacks and pingbacks are open.