Адæмон сфæлдыстады республикон центр хоны фестивальты хайад райсынмæ

19 майы РХИ-йы Культурӕйы министрады цур Адӕмон сфӕлдыстады республикон центр ауадздзӕн дыууӕ фестваль-конкурсы: ӕртыккаг республикон фестиваль-конкурс бинонты сфӕлдыстадон коллективты ӕхсӕн «Бинонтӕ – курдиӕтты стъалыбардз» ӕмӕ фыццаг республикон фестиваль-конкурс ирон адӕмон зарӕгӕй «Айзӕлд».

«Бинонтӕ – курдиӕтты стъалы-бардз» фыццаг хатт уагъд ӕрцыд 2014 азы, хайад дзы райстой, нӕ республикӕйы аивадимӕ ӕнгом баст чи сты, ахӕм бинонты коллективтӕ. Дыккаг фестиваль та ауагъдӕуыд 2017 азы. 

Ацы фестивалы хайад райсын сӕ бон у ахӕм сфӕлдыстадон хӕдархайгӕ бинонты коллективтӕн, кӕцытӕ рӕхсынц зарынмӕ, кафынмӕ, гъе та театралон аивады сӕ курдиат равдисынмӕ.

Конкурсы хӕстӕ сты сфӕлдыстады фӕрцы бинонты ӕрбангом кӕнын, уыдонӕн сӕ курдиат раргом кӕнын.

Ирон адӕмон зарӕджы конкурс «Айзӕлд»-ы хайад райсын сӕ бон у куыд вокалон къордтӕ, афтӕ хицӕн адӕймӕгтӕн. Уыдон хъуамӕ сӕххӕст кӕной дыууӕ ирон адӕмон зарӕджы. Конкурсы хӕстӕ сты фӕсивӕды ирон адӕмон сфӕлдыстадмӕ ӕрбангом кӕнын, ирон адӕмон зарджытӕ чи ӕххӕст кӕны, уыдоны рабӕрӕг кӕнын.

Фестивальты хайад райсӕн ис кармӕ нӕ кӕсгӕйӕ. Хайадисджыты архайдӕн аргъ кӕндзӕн компетентон жюри. Уыдоны уынаффӕмӕ гӕсгӕ фӕбӕрӕг уыдзысты 1-аг, 2-аг ӕмӕ 3-аг бынӕтты уӕлахиздзаутӕ. Адӕмон сфӕлдыстады республикон центры номӕй уыдон хорзӕхджын ӕрцӕудзысты грамотӕтӕ ӕмӕ лӕвӕрттӕй. Ӕппӕт хайадисджытӕ та – дипломтӕй.

Фестивальты хайад райсыны тыххӕй курдиат ӕрбавдисын хъӕуы  10 маймӕ, Адӕмон сфӕлдыстады центрмӕ, кӕцы ис Харебаты Исахъы уынгыл, 51. 

Фестивальтӕ уагъд ӕрцӕудзысты киноконцертон зал «Чермен»-ы.