Амæйразмæ газет «Хурзæрин»-ы 10 ноябры номыры мыхуыр æрцыд, уæгъдибар хъæбысхæстæй ирон богалтæн ацæугæ æнусы 1962 азы сæ къухты цахæм æнтыстытæ бафтыд, уый, тыххæй зонæнтимæ. Дарддæр уæ базонгæ кæндзыстæм, уыцы аз ма хъæбысхæсты дыууæ хуызæй ирæттæй хорз фæстиуджытæ чи равдыста, уыцы богалтимæ дæр.
КЪЛАСИКОН ХЪÆБЫСХÆСТ
Уыдон уыдысты зоналон æвзарæн ерыстæ ССР Цæдисы фыццаг бынат бацахсыныл, уагъд æрцыдысты Ригæйы горæты 28-29 июлы æмæ дзы сæ тыхтæ æвзæрстой 62 богалы. Хорз сарæхст ам æрдæгрог уæзы (57-63 кг) ирон хъæбысæйхæцæг Мыстулаты Ю. æмæ бацахста дыккаг призон бынат. Ахæм ерыстæ ма цыдысты Гомелы дæр æмæ ам та сæ тыхтæ æвзæрстой бæстæйы 67 хуыздæр хъæбысæйхæцæджы. Уым та фесгуыхт Советон Æфсады богал Тбилисæй Дриашвили Ш. æмæ рамбылдта æртыккаг призон бынат.
Уыцы аз 23-26 августы Цæгат Ирыстоны сæйраг горæт Дзæуджыхъæуы цыдысты иуæгон-командон Æппæтцæдисон ерыстæ æвзæнгты хсæн. Ацы ран сæ тыхтæ æвзæрстой 15 цæдисон республикæ, стæй ма Мæскуы æмæ Ленинградæй, æдæппæт 149 хъæбысæйхæцæджы. Ацы тохты иттæг хорз æнтыст йæ къухты бафтыд къласикон хъæбысхæсты ирон богал Золойты А.-йæн æмæ рамбылдта фыццаг бынат.
ХЪÆБЫСХÆСТ САМБО
Уыдон уагъд цыдысты 27 октябрæй 1 ноябрмæ горæт Кишиневы ССР Цæдисы иуæгон-командон фыццаг бынат бацахсыны сæраппонд æмæ дзы 12 командæйæ хайад райстой 189 хъæбысæйхæцæджы. Ацы ерысты æрдæгастæуккаг уæзы категорийы дыккаг бынат рамбылдта бархи спортивон æхсæнады богал Тбилисæй Пухашвили А. Ахæм ерыстæ ма цыдысты Бакойы 23-25 августы æмæ дзы 9 командæйæ хайад райстой 98 самбисты. Уæззау уæзы уæлахиздау сси бархи спортивон æхсæнад «Колмеурне»-йы уæнг Цгъойты К.
ХУЫБИАТЫ Никъала
Comments are closed, but trackbacks and pingbacks are open.