Ирон адӕм Дунескӕнӕг Иунӕг Стыр Хуыцаумӕ, йе сконд зӕдтӕ ӕмӕ дауджы-тӕм иумӕ кувынц сӕ бӕрӕгбӕтты, кувӕндӕтты. Нӕ сыгъдӕгдӕр рӕтты, адӕм зӕххӕн уӕлӕрвтимӕ бастдзинад кӕм бафиппайдтой, ахӕм бынӕтты. Афтӕ уыдис мингай азты размӕ, скифтӕ, сӕрмӕттӕ ӕмӕ аланты дугты дӕр ӕмӕ ныр дӕр.
Ӕртӕ ӕртӕдзыхоны,
ӕртӕ хӕбизджыны цы амонынц
Ирон адӕм Иунӕг Стыр Хуыцауы, йе сконд зӕдтӕ ӕмӕ дауджыты ном арынц сӕхи конд нӕртон ӕлутон бӕгӕныйӕ ӕмӕ ӕртӕ ӕртӕдзыхонӕй, кӕнӕ ӕртӕ ӕхцинӕй (хӕбизджынӕй). Уыимӕ, уӕливыхты кæрӕдзийӕ фӕхицӕн кӕнынц, цал сты, уый уӕлӕмӕ, арвмӕ, ома, Стыр Хуыцаумӕ куыд зына. Хуыцау, ды нын цард радтай, ӕмӕ цӕрӕм зӕхх, дон ӕмӕ хуры фӕрцы, зӕгъӕгау. Ӕртӕ уӕливыхы амонынц зӕхх, дон ӕмӕ хур. Йӕ цардӕй чи ахицӕн вӕййы, ууыл йӕ хур аныгуылы, ӕмӕ йӕ кӕндты дыгай кӕрдзынтӕ уымӕн ӕрӕвӕрӕм фынгыл.
Кувӕндоны фынгӕвӕрд
Кувӕндонмӕ хойрагӕй ӕмӕ фыдызгьӕлӕй хӕсгӕ сты ӕртӕ ӕртӕдзыхоны кӕнӕ æртӕ хӕбизджыны, ӕргӕвст нывондаджы ӕртӕ фӕрсчы, кӕнӕ физонӕг, кӕнӕ дзыкка. Нӕ фӕтчы кувӕндоны бынмӕ хӕссын карк ӕмӕ хуыйы фыд, ӕйчытӕ. Нӕ сӕ ӕвӕрынц бӕрӕгбоны фынгыл дӕр, нӕ сӕ кувынц Хуыцаумӕ, зӕдтӕ ӕмӕ дауджытӕм. Мардӕн сӕ хӕлар кӕнынц.
Кувӕндонмӕ нӕ фыдӕлтӕ нуазинагӕй хастой æрмӕстдӕр бӕгӕны ӕмӕ дзы кодтой ӕртӕ сидты: Стыр Хуыцаумӕ скувын – кувӕндон кӕй номыл у, уымӕ батабутӕ кӕнын. Стӕй йыл бинонты, кӕнӕ сыхбӕсты, кӕнӕ хъӕубӕсты бафӕдзӕхсын: кувӕндоны фынг кӕй номӕй уа, уыдоны бафӕдзӕхсын.
Кувӕндон у сыгъдӕг бынат, Стыр Хуыцау, адӕм сӕ фарн кӕуыл бафтыдтой, ахӕм бынат, ӕмӕ дзы алцыдӕр хъуамӕ уа сыгъдӕг. Йӕ бынмӕ адӕм дӕр цӕуынц сыгъдӕг зӕрдӕ, сыгьдӕг дзаума, буар ӕмӕ хъуыдытӕй дӕр. Кувӕг лӕг дӕр дзы кувы табугӕнгӕ зӕрдӕрухсӕй, райзӕрдӕйӕ, рӕсугъд фӕндиӕгтӕ ӕмӕ бӕллицтимӕ.
Кувӕндоны бынмӕ нӕлгоймӕгтӕ цӕуынц худаистӕй. Кувӕндоны бынмӕ нӕ фӕтчы цӕуын сау дарӕсы, хӕцӕнгарзимӕ, сылгоймӕгтӕн – нӕлгоймаджы хӕлӕфты, гом тӕрттӕ ӕмӕ дӕлӕрмттӕй, цыбыргонд дӕлгуырты, ронбӕгъдӕй.
Кувӕндоны бын бӕрӕгбоны сӕйрагдӕр у хъӕлдзӕгдзинад, райзӕрдӕдзинад. Хъӕ-бӕр нозт ӕм хӕссын кӕй райдыдтам, дӕргъвӕтин сидтытӕ дзы кӕи фӕкӕнӕм, ӕмӕ дзы расыг адӕм ӕнӕуаг дзыхӕй кӕй дзурынц, кӕрӕдзийӕн фыдбылыз кӕй ра-кӕнынц, уый тыххӕй нын, ӕвӕццӕгӕн, нӕ кувын нӕдӕр Стыр Хуыцау исы, нӕдӕр зӕдтӕ ӕмӕ дауджытӕ. Бӕллӕхтӕ дӕр ныл, чи зоны, уый фыдӕй цӕуы.
Кувӕндоны мысайнаг
Кувӕндоны нӕ фыдӕлтӕ ӕвӕрдтой ӕрмӕстдӕр згъӕр ӕхца – ӕртӕ суарийы. Ӕртӕ суарийы кӕд дӕр ахадгӕ ӕхца уыдысты, ныр ницыуал у сӕ бӕркад, ӕртӕ суарийы згъӕр ӕхца дӕр нал ис, фӕлӕ ис фӕндзгай сомтӕ. Ӕртӕ фондз сомы дӕр, ӕртӕ суариау, бӕззынц кувӕндоны мысайнагӕн. Ӕрмӕст сӕ хъӕуы ныхсын, уый фӕстӕ урс гӕххӕтты, кӕнӕ урс хӕцъилы, кӕнӕ бӕмбӕджы батухын. Афтӕмӕй, сыгъдӕгӕй хӕсгӕ сты кувӕндоны бынмӕ. Гӕххӕттын ӕхцайӕн ныхсӕн нӕй, ӕмӕ йӕ чъизийӕ мысайнагӕн ӕвӕрын нӕ фӕтчы.
Ирон кувӕндоны мысайнаг ӕхца ӕмбырдгӕнӕны тыххӕй нӕу, фӕлӕ табуйагӕн, фӕтчыхъӕдӕн, кувӕндоны къултӕ, ӕмбӕрзт, ӕддаг бакаст фӕфидардӕр, фӕаивдӕр кӕнынӕн. Йӕ кӕцыдӕр чысыл хай та ӕфтыд цӕуы, адӕм йӕ бӕрӕгбонмӕ цы мысайнӕгтӕ ӕрӕмбырд кӕнынц, уыдонмӕ.
Фӕдзӕхсӕн
Кувӕндоны бынӕй фæстӕмӕ цы хойраг, фыдызгъӕл, нозт ӕрхӕссынц, уыдон хуыйнынц – фӕдзӕхсӕн, кӕй номыл конд уыдысты, уыцы зӕд, дуаг сыл йӕ фарн бафтауы кувӕндоны бын. Ӕмӕ дзы бинонтӕй алчидӕр хъуамӕ сахода, сыхы куывды та дзы хистӕр рауадзы сӕрмагонд сидт. Кувӕндоны кувинӕгтӕй уадзын нӕ фӕтчы. Куывддзаутӕ йӕ куыд сыгъдӕгӕй ӕрбаййӕфтой, афтӕ сыгъдӕг ӕмӕ райдзастӕй йӕ хъуамӕ ныууадзой. Ӕрмӕст иуӕй-иу кувӕндӕтты дзуары номыл конд бӕгӕныйӕ бӕрцуаты бӕрӕг ран ныууадзынц иннӕ азмӕ – иннӕ азы фӕдзӕхсӕнӕн.
Цӕхх – фынджы сӕр
Цӕхх фынджы сӕр у, фынгыл фыццагдӕр уый ӕрӕвӕрынц, стӕй та – кард. Цӕхх уымӕн, ӕмӕ хойраг ӕдзӕххӕй нӕ, фæлæ ӕныгуызӕй дӕр зӕрдӕйыл не ‘мбӕлы ӕмӕ, цӕмӕй, фынгыл цы ӕрӕвӕрой, уый цӕххъуагӕй мачи бафауа, хӕрзадӕн ӕй айсой Стыр Хуыцау, цы зӕд, цы дуаджы ном дзы ссарой, кӕнӕ дзы рухсаг кӕмӕн зæгъой, уыдон, хӕрзадӕн дзы саходой фынгыл бадӕг адӕм.
Цӕххы фӕстӕ кард ӕрӕвӕрынц уымӕн, цӕмӕй, фынгыл цы бӕркад ӕрӕвӕрой, уымӕ хӕрам тыхтӕн бавналыны хъомыс мауал уа. Уыдон цыргъагӕй тынг тӕрсынц, ӕввахс ӕм нӕ цӕуынц. Ӕмӕ фынджы бӕркад иууылдӕр баззайы, цы хьуыддагӕн уыд, уымӕн.
ЦГЪОЙТЫ Хазби
