Республикæ Хуссар Ирыстоны сывæллæтты хæрзаудæн фонд «Подари крылья»-йы президент Цхуырбаты Татьянæ фонды кусджытæ, афтæ ма РХИ-йы сгуыхт артисткæ Саппиты Залинæимæ иумæ æрæджы сорганизаци кодтой æмæ ауагътой хæрзаудæн концерт не ‘мбæстаг рынчын лæппу Бестауты Дживерсæн баххуыс кæныны тыххæй. Хæрзаудæн концерт уагъд æрцыдис Цхинвалы киноконцертон зал «Чермен»-ы æмæ дзы хайад райстой куыд нæ республикæйы, афтæ Цæгат Ирыстон-Аланийы популярон зарæггæнджытæ дæр. Æрыгон лæппуйы фарсмæ æрбалæууыны сæраппонд концерты хайад райстой Дауыраты Эдуард, Хадыккаты Аллæ, Собиаты Русланæ, Харебаты Марта, Кристина Гогинова, Икъаты Ибрагим, Къæбысты Сæрмæт æмæ æндæртæ. Мадзалмæ æрбацыдис æртæ сæдæ адæй-магмæ æввахс. Уыдон æхсæн уыдысты нæ республикæйы Парламент æмæ Хицауады кусджытæ, РХИ-йы Уæрæсейы Федерацийы Æххæстбарджын минæвар Марат Кулахметов, «Россотрудничество»-йы къухдариуæггæнæг Сергей Скворцов, нæ горæты мэр Коцты Алан, æмæ Бестауты Дживерсы хъысмæт йæ зæрдæмæ æввахс чи райста, æппæт уыдон.
Бестауты Дживерсæн дохтыртæ сæвæрдтой диабетон ретинапотияйы диагноз. Ацы диагноз та у сæкæрнизы хуызтæй иууыл карздæр. Уæззау низимæ тох кæны Бестауы фырт, уый йæ низыхатты фæстиуæгæн бакуырм ис æмæ йын хъæуы схос кæнын. Цы операци йыл хъуамæ скæной æвæстиатæй, уый у тынг зынаргъ æмæ йæ æрмæстдæр аразынц Израилы. Лæппуйы хицæуттæ тынг тыхсынц æмæ æртымбыл кодтой цы æхцайы фæрæзтæ хъæуы, уыдонæн се ‘рдæг, фæлæ сын фаг не сты, æмæ уымæ гæсгæ æрбахатыдысты хæрзаудæн фонд «Подари крылья»-йы президент Цхуырбаты Татьянæмæ. Ныр лæппуйы æнæниздзинады тыххæй организацигонд æрцæуынц æндæр æмæ æндæр хæрзаудæн мадзæлттæ.
Хæрзаудæн концерт рауадис тынг цымыдисон. Артисттæй алкæй дæр бафæндыд, цæмæй тагъд рæстæджы Бестауы фырт раздæрау суына йæ цæстытæй æмæ та банкъара йæ алыварс дунейы æппæт хæрзиуджытæ, рæсугъддзинад æмæ амонд. Æмæ, æцæгæйдæр, цæстырухс фесафын у тынг уæззау хъуыддаг. Уымæ гæсгæ фонд «Подари крылья»-йы къухдариуæггæнæг ЦхуырбатыТатьянæ дæр сиды нæ республикæйы æппæт æмбæстæгтæм, цæмæй се ‘ххуысы къух фæдаргъ кæной, абон йе ‘нæниздзинад мæгуырау кæмæн у æмæ дунейы хуымтæ фенын йæ бæллиц кæмæн у, уымæ. Цхуырбаты Татьянæ йæ раныхасы стыр бузныг загъта Бестауты Дживерсы тыххæй хæрзаудæн акциты хайад чи райстой, уы-донæн. «Мæнæн тынг æх-сызгон у уый æмæ хæрзаудæн акцитæм уæлæхох чи нæ у, ахæм адæм нæм тынг бирæ кæй ис. Сæрмагондæй мæ стыр бузныджы ныхæстæ зæгъын фæнды, абон ацы концерт сорганизаци кæныны хъуыддаджы мæ фарсмæ чи æрбалæууыд, уыцы рæсугъд æмæ курдиатджын артисткæ Саппиаты Зали-нæйæн. Уый алыхатт дæр равдисы æмбаргæдзинад, уымæн йæ зæрдæ фæриссы уæззау рынчынтыл. Мæхæдæг æвдисæн вæййын йæ цæссыгтæн дæр. Бузныг ма мæ зæгъын фæнды концертмæ сывæллæтты чи æрбакодта, уыцы ныййарджытæн дæр. Уымæн æмæ уыдон ахæм хæрзиуæгон хъуыддæгты руаджы ахуыр кæнынц сæ сывæллæтты хорз æмæ æвзæр хицæн кæныныл. Æхсæнады ахæмтæ сомбон уыдзысты бирæ гуманондæр æмæ æмбаргæдæр. Мах хæрзаудæн акциты Дживерсæн æрæмбырд кодтам 250 мин сомы бæрц æмæ иууылдæр æрвыст æрцæудзысты рынчыны номыл бангы хыгъдмæ», – загъта Цхуырбаты Татьянæ.
Ахæм хæрзаудæн акцитæ, моралон æгъдауæй, стыр æххуыс сты рынчынæн æмæ йæ бинонтæн дæр, свæййынц сын ныфсдæттæг. Уадз, æмæ-иу рынчын æхцайы фыдæй æнæхосæй ма баззайа æмæ-иу йæхи фæндиаг сæнæниз уа. Уый тыххæй та хъæуы нæ адæмы стыр æмбаргæдзинад, кæрæдзиуарзондзинад, иудзинад. Уыцы хæрзиуджытæ та алыхатт дæр рынчынæн йæхи уд банкъары æмæ æгæрон бузныг вæййы йе ‘ххуысгæнджытæй.
ЦХУЫРБАТЫ Ларисæ
Comments are closed, but trackbacks and pingbacks are open.