Ацы аз июны мæйы нæ горæты скъолатæй цалдæры ахуыргæнинæгтæ хайад райстой горæт Ханты-Мансийскы Æмфыдыбæстæйонты V æппæтдунеон хъæзтыты. Ацы æмбырд-гондмæ цы æвзонг лæппутæ æмæ чызджытæ бахаудтой, уыдон ам бынаты аивгъуыйгæ азы æмæ 2019 азы бынæттон ерысты равдыстой иууыл хуыздæр æн-тыстытæ. Уымæ гæсгæ уыдон хайад райстой банысангонд хъæзтыты æмæ хорз æнтыстытæ равдыстой ерысты рæстæджы. Хуссарирыстойнаг æвзонг шахматист та райста хорзæх «шахматтæй хъазты иууыл рæсугъддæр парти»-йы номинацийы. Уый йæ ныхмæлæууæджы рамбылдта 12 цыдæй.
Æвзонг уæлахиздзауты знон йæхимæ райста Президент Бибылты Анатоли. «Стыр бузныг уын, ахæм хорз фæстиуæгимæ кæй æрцыдыстут республикæмæ. Сымах цы хъару, уæлахизмæ тырнынад æмæ цы æппæт ерыстæм серьезон ахаст равдыстат, уымæ гæсгæ уын уыд хорз æмæ бæрзонд æнтыстытæ Æмфыдыбæстæйонты æппæтдунеон хъæзтыты рæстæджы. Ацы хорзæхтæ сымах уымæн фесты, цæмæй дарддæр дæр архайат æмæ тырнат ноджы стырдæр уæлахизтæм. Ацы къахдзæфтæй сымах уæ сомбонæн æвæрут бын. Æмæ мæ ныфс ис, кæй сæххæст уыдзысты æппæт уæ фæндтæ», – банысан кодта Бибылты Анатоли. Президент ма бузныджы ныхæстæ загъта «Россотрудничество»-йæн, кæцы йе ‘ххуысы къух фæдаргъ кодта, цæмæй нæ ахуыргæнинæгтæ хайад райсой Æмфыдыбæстæйонты æппæтдунеон хъæзтыты. Уый фæстæ командæйы сæргълæуджытæ æмæ уæлахиздзауты Президент схорзæхджын кодта Кады грамотæтæй.
ТАНДЕЛАТЫ Виленæ
Comments are closed, but trackbacks and pingbacks are open.