Зонгæ кодтой культурæйы зынгæ архайджыты сфæлдыстадимæ

Фæстаг цалдæр азы нæ горæты библиотекæты куыст бæрæг кæй фæхуыздæр, кæй фæактивондæр, уый ирдæй зыны, ацы уагдæтты кусджытæ нæ республикæйы нысанцæуæг бæрæгбонтæй иуы фæрсты дæр кæй никуы ахизынц æмæ сæ цытджын æгъдауæй кæй банысан кæнынц, уымæй дæр.

Хæрз æрæджы нæ горæты библиотекæтæ, уыцы нымæцы Æвзæнгты республикон библиотекæ дæр цытджын æгъдауæй банысан кодтой Культурæйы кусæджы бон. Ацы боны цытæн  нæ республикæйы уагъд æрцыдысты алыгъуызон мадзæлттæ.

Мæ куыстмæ цæугæйæ мæ фæндаг Æвзæнгты республикон библиотекæйыл кæй у, уымæ гæсгæ ацы уагдонмæ арæх бацæуын, стæй ма сæ мадзæлттæм дæр арæх фæхонынц йæ кусджытæ. Ацы бонты та радон хатт ацы библиотекæмæ бацæугæйæ, уым баййæфтон ахуырдзауты иу къорды. Уыдон цымыдисæй кастысты Æвзæнгты республикон библиотекæйы кусджытæ сæ директор Тототы Ленæйы сæргълæудæй Культурæйы кусæджы боны цытæн цы сæрмагонд къуым бацæттæ кодтой, уымæ. Уагдоны директор сын лæмбынæг базонгæ кодта зынгæ ирон дирижертæ Дудараты Вероникæ, Гергиты Валерийы биографитæ æмæ сфæлдыстадимæ, афтæ ма æндæр ирон зындгонд адæймæгты архайдимæ.

Сæрмагонд къуымы къулыл конд æрцыдысты, культурæйы къабазы сæ Райгуырæн Ирыстонæн чи скад кодтой æмæ йæ æнæхъæн дунейæн чи базонын кодтой, уыцы диссаджы ирон курдиатджын адæймæгты нывтæ. Сæ бынмæ стъолыл та æвæрд æрцыдысты культурæйы къабазы  фæдыл æмæ ацы къабазы ирон курдиатджын адæймæгтыл фыст чингуытæ. Куыд, зæгъæм, Саулохты Мэлсы «Об осетинской хореографии» æмæ «Махарбек Туганов», Гæбæраты Юрийы «Резьба по дереву», РХИ-йы культурæйы министрады хъæппæрисæй рауагъдгонд чингуытæ – «Искусство Вадима Бежанова» æмæ «Чочиев К.» (йæ рецензент у Джусойты Нафи), Багаты Барисы «Осетинский орнамент»,  «Осетинская свадьба. Традиции и обычаи», Гæздæнты В.йы «Традиционая культура осетин» æмæ æндæр чингуытæ. Стъолыл ма æвæрд æрцыдысты музыкалон къабазы ирон зындгонд гоймæгты тыххæй уацтæ фыст цы газетты уыд, уыдон дæр. Ахæм сæрмагонд къуымтæ ма ацы библиотекæйы кусджытæ бацæттæ кодтой Фыдыбæстæ хъахъхъæнæджы бон – 23-æм февралы æмæ Сылгоймæты дунеон бон – 8-æм марты сæраппонд дæр.

Нæ республикæйы цæрджытæй алкæмæндæр йæ бон у библиотекæмæ æрбацæуын сæ хъæбултимæ, сæ хъæбулы хъæбултимæ, цæмæй лæмбынæгдæр базонгæ уой Хуссар Ирыстоны, æмткæй Ирыстоны культурæйы къабазмæ се стыр хайбавæрд чи бахаста, уыцы зындгонд гоймæгты сфæлдыстадимæ.

Джиоты Екатеринæ