Фæстаг азты нæ республикæйы æрцыд бæрæг позитивон ивындзинæдтæ. Æндидзыд цæуы нæ республикæ, нæ цæстыты раз бонæй-бон рæсугъддæр кæны нæ уарзон хæстæфхæрд горæт Цхинвал. Кæй зæгъын æй хъæуы, æвæрццаг ивындзинæдтæ цæуы алы фадыджы дæр, уыцы нымæцы культурæйы къабазы дæр. Æндидзын райдыдтой библиотекæтæ дæр, кæд нырма бирæ бакусын хъæуы, уæддæр. Алыгъуызон цымыдисон мадзæлттæ ауадзынц нæ горæты библиотекæтæ, уыцы нымæцы æвзæнгты æмæ сывæллæтты республикон библиотекæтæ дæр. Æрмæст иу мысæн мадзалы æвзæнгты республикон библиотекæйы хайад райстой 40-50 ахуыргæнинаджы бæрц æмæ уый та хуыздæрæрдæм æндавы рæзгæ фæлтæры монон хъомыладыл. Цæмæй æмткæй нæ республикæйы уæвæг библиотекæты куыст фæхуыздæр уа, уый тыххæй РХИ-йы Культурæйы министрад бакуыста уагæвæрд Хуссар Ирыстоны библиотекæты ‘хсæн æрвылазон конкурс ауадзыны тыххæй. Йæ фæстиуджытæм гæсгæ бæрæг цæудзæн республикæйы хуыздæр библиотекæйы куыст.

Конкурсы нысæнттæ æмæ хæстæ сты ахæм: цæрджыты библиотекон лæггæдтæ фæфылдæр кæнын, чиныджы размæ кæнын; практикæйы ног проекттæ ныббиноныг кæнын; библиотекæйы специалистты квалификаци фæбæрзонддæр кæнын; РХИ-йы цæрджытæн лæггæдты ассортименты гъæд фæбæрзонддæр æмæ фæуæрæхдæр кæнын; нырыккон библиотекæйы имиджæй эффективонæй спайда кæнын.

Конкурсы хайадисджытæ сты РХИ-йы Культурæйы министрады системæйы биб-лиотекæтæ. Конкурс ауадзыны уавæртæ æмæ уæлахиздзау сбæрæг кæныны критеритæ та сты ахæм: Конкурс уагъд цæуы ацы азы 27-æм майæ 2017 азы 27-æм маймæ. Библиотекæты куыстæн аргъ скæныны критеритæ: куысты афæдзы планы сæйраг хæстæ сæххæст кæнын; чиныгкæсджытæн лæггад кæныны куысты ног формæтæ æмæ методтæ ныббиноныг кæнын; чиныджы размæ кæнын, ног информацион технологитæй пайда кæнын; чиныгкæсджыты æвзонг контингент æрбакæнын; регионалон æмæ горæтон мадзæлтты библиотекæты хайадист; библиотекæйы рекламон архайд.

Организацион комитеты архайд: конкурс «Азы хуыздæр библиотекæ»-йæн хатдзæгтæ саразыны тыххæй арæзт æрцыд конкурсон къамис. Хорзæхджын кæныны уавæртæ: «Азы хуыздæр библиотекæйы» ном лæвæрд цæуы РХИ-йы библиотекæйæн азы куысты фæстиуджытæм гæсгæ ахæм номинациты: хуыздæр горæтон библиотекæ; хуыздæр районон библиотекæ; хуыздæр хъæууон библиотекæ.

Конкурсы къамисы сконды сты: 1. Дзеранты Джульеттæ — РХИ-йы Культурæйы министры хæдивæг. 2. Хъотайты Д. —  Сывæллæтты республикон библиотекæйы методист. 3. Сланты Заирæ — Анахарсисы номыл республикон национ библиотекæйы ирон абонементы сæргълæууæг. 4. Букуылты Маринæ — Цхинвалы централон библиотекæйы библиотекарь. 5. Дриаты Нателæ — РХИ-йы Культурæйы министрады библиотекæты куысты фæдыл сæйраг специалист.

Бæстондæрæй нын конкурсы тыххæй радзырдта РХИ-йы Культурæйы министры хæдивæг Дзеранты Джульеттæ. «Раздæр чиныгæн адæм цы стыр аргъ кодтой, ахæм аргъ ын нал ис абон. Уымæн та ис йæхи аххосæгтæ. Раздæр Интернет нæ уыд æмæ адæм бар-æнæбары цыдысты библиоте-кæтæм чиныгагур. Фæлæ абон Интернеты цынæ ссардзынæ. Уый иуæй хорз у, иннæмæй та — æвзæр. Адæмæн сæ фылдæр нал цæуынц библиотекæтæм, сæ къухмæ чиныг никуыуал райсынц. Раздæр та адæм радты лæууы-дысты чингуыты рафыстмæ (подписка), бирæтæ-иу дзы æнæхъæн æхсæвтæ дæр фæлæууыдысты рады, цæмæй рафысты цы чингуытæ уыд, уыдонæй сæ исты уæддæр фæуыдаид. Фæлæ абон бирæтæ уыцы «подпискайы» чингуытæ æрбахæссынц библиотекæмæ, лæвар уын сæ кæнæм, мах сæ нал пайда кæнæм, зæгъгæ.

Æз афтæ хъуыды кæнын æмæ чиныг йæ нысаниуæг макуы хъуамæ фесафа. Рæзгæ фæлтæртæ чиныг кæсын куынæ бауарзой, уæд сæ дарддæры хъысмæт цахæм уыдзæн? Кæй зæгъын æй хъæуы, бæллиццаг нæ уыдзæн. Фæстаг рæстæджы куыд РХИ-йы Хицауады ‘рдыгæй, афтæ Культурæйы министрады ‘рдыгæй дæр хуыздæр хъусдард здæхт цæуы библиотекæтæм. Нæ горæты цы цыппар библиотекæйы кусджытæ ис, уыдоны арæх ауадзынц алыгъуызон мадзæлттæ,  фысджыты юбилейтæ,  номарæн изæртæ, алыгъуызон нысаниуæгджын бæрæгбонты цытæн мадзæлттæ æмæ æндæртæ. Фæлæ нæ республикæйы иуæй-иу хъæуты библиотекæты куыст у хуыздæрхъуаг. Ис ахæм библиотекартæ,  сæ зæрдæтæ кæмæн риссынц, сæ дæлбар библиотекæты бæстыхæйттæ æдзæллаг уавæрмæ кæй æрцыдысты, уый тыххæй. Ахæм кусджытæ чингуытæ бафснайынц, æгæрыстæмæй, сæ хæдзæртты дæр. Фæлæ, хъыгагæн, ис ахæмтæ дæр, кæцытæ куыстмызд цы исынц, уый йедтæмæ æппындæр сæ хæстæ не ‘ххæст кæнынц. Сæ дæлбар библиотекæты дуæрттæ никуы бакæнынц æмæ сæ алыварс та схæмпæл вæййы.

Мах, Культурæйы министрады кусджытæ арæх ацæуæм æмæ бабæрæг кæнæм республикæйы районты, хъæуты библиотекæты уавæр. Кæй зæгъын æй хъæуы, дæргъвæтин азты дæргъы хæстон уавæрты цард йæ уæззау фæд ныууагъта культурæйы къабазы дæр. Æмæ алцæмæн та уыцы иурæстæджы ацаразæн нæй. Уымæ гæсгæ библиотекæты кусджытæ сæ хæстæ куыд æмбæлы афтæ куы æххæст кæной, цæрджыты фæстæмæ библиотекæмæ æрбакæныныл куы архайой, уæд сын уыдзæн зæрдæ-рухсгæнæн фæстиуджытæ. Ацы конкурсы нысаниуæг дæр, уый мидæг ис. Зæгъæм, Балтайы хъæуы скъолайы кæд бирæ сывæллæттæ нæй, уæддæр ацы хъæуы библиотекæйы кусæг архайы ахуырдзаутимæ алыгъуызон мадзæлттæ ауадзыныл. Йæ мадзæлттæм фæхоны Культурæйы министрады кусджыты дæр. Иудзырдæй, кусы, цæмæй йæ дæлбар уагдон æхгæд ма æрцæуа. Библиотекæты кусджытæ иууылдæр афтæ куы кусиккой, уæд сæ хъуыддæгтæ уаиккой бирæ хуыздæр. Культурæйы министрад сын кæны методикон æххуыс. Фæстаг рæстæджы чингуыты фонд æххæст цæуы, РХИ-йы чингуыты рауагъдад цы чингуытæ рауадзы, уыдонæй. Хорз уаид æмæ нын Хицауад мыхуыры фæрæзтæ рафыссынæн цы æхцайы рахицæн кæны, уыдон куы фæфылдæр кæниккой, уæд-иу библиотекæтæ рафыссиккой фылдæр уæрæсейаг газеттæ æмæ журналтæ.

2014-2015 азты ахуыры азы Культурæйы министрад Цхинвалы музыкалон ахуыргæнæндоны бакодта курсытæ библиотекæты хъуыддæгты фæдыл, афтæ ма хореографион факультет дæр, уымæн æмæ «Симд»-ы профессионалон кафджытæй бирæтæм сæ профессийы фæдыл ахуырад нæй.  Цард размæ цæуы, алцы дæр ивы æмæ уадз,   нæ библиотекæты кусджытæ дæр сæ квалификаци бæрзонддæр кæной», — радзырдта Дзеранты Джульеттæ.

Зæгъæн ис афтæ, æмæ ацы конкурс хуыздæрæрдæм кæй бандавдзæн нæ республикæйы библиотекæты куыстыл, уымæн æмæ сæ алчи дæр тырндзæн хуыздæр мадзал ауадзынмæ, фылдæр чиныгкæсджыты сæхимæ æрбакæнынмæ.

Джиоты Екатерина

Comments are closed, but trackbacks and pingbacks are open.