6 июны Хуссар Ирыстоны паддзахадон университеты профессортæ æмæ ахуыргæнджытæн уыд зонадон советы радон рабадт. Рабадты куысты хайад райстой Республикæ Хуссар Ирыстоны Президент Бибылты Анатоли, ахуырад æмæ зонады министр Гасситы Натали æмæ æндæр бæрнон адæймæгтæ. Рабадты дзырд цыдис дыууæ фарстыл. Фыццаг фарст уыд 2018-2019 ахуыры азæн абитуриенттæ райсын. Уый фæдыл университеты ректор Тедеты Вадим банысан кодта, зæгъгæ, мах нæ разы нæ æвæрæм факультеттæ фæфылдæр кæныны хæс, фæлæ ис чысыл ивындзи-нæдтæ. Хими æмæ биологийы факультетæй арæзт æрцыдис медицинæ æмæ биологийы факультет.
Университет фæстаг фондз азы куыд бакуыста æмæ йын цавæр æнтыстытæ ис, уый тыххæй ректор банысан кодта, зæгъгæ, рацæугæ азты къухты бафтыд бæрæг размæцыд, æмæ арфæйы ныхæстæ загъта коллективæн, паддзахады разамонджытæн.
Фæстаг фондз азы университетæн бантыст 100 чиныг æмæ брошюрæйæ фылдæр рауадзын. Уыцы æмгъуыдмæ университеты ауагъд æрцыдис 130 зонадон конференцийæ фылдæр. Уыимæ фæфылдæр квалификациджын специалистты нымæц.
Тедейы фырт стыр æнтыстыл нымайы, ахуыры азы дыккаг æмбисы ног университеты бæстыхайы ахуыр кæнын кæй райдыдтой, уый дæр. Æцæ-гæйдæр, университеты бæстыхай афтæ тагъд æмæ хæрзгъæдæй арæзт фæуыдзæнис – уый æнхъæл бирæтæ нæ уыдысты. Уымæй дарддæр ма университеты разамынд хорз бакуыста электронон-информацион ифтонгады фарстытыл.
Æнтыстытыл дзургæйæ, банысан кæнын хъæуы уый, æмæ фæстаг фондз азы Уæрæсейы æмæ фæсарæнты алыгъуызон уæлдæр ахуыргæнæндæттимæ кæй сарæзта 30 бадзырдæй фылдæр. Уый стыр ахъаз у дунейы зонад æмæ ахуырады фæлтæрддзинадимæ зонгæ кæнын æмæ дзы пайда кæнынæн.
Университеты разамынд, йæ профессортæ æмæ ахуыргæнджытæ ацæугæ фондз азы дæргъы хорз бакуыстой фæсивæды ахуыр-хъомылады хъуыддаджы дæр. Рæстæгæй рæс-тæгмæ уагъд цыдысты алыгъуызон мадзæлттæ. Уымæй дарддæр ма университеты баконд æрцыдис автоскъола, университетæн ис йæхи рауагъдад, видеостуди.
Раппæлинаг ма у уый дæр, æмæ университеты студенттæ æрвылаз дæр хайад кæй райсынц горæты уынгты æмæ æндæр бынæттæ æфснайыны куыстыты.
Филологон зонæдты кандидат Дзиццойты Юри та йæ раныхасы банысан кодта, зæгъгæ, мах не ‘ппæт дæр æвдисæн стæм Тедеты Вадимы иузæрдион куыст æмæ архайдæн, университеты æнтыстытæн. Уый æппынæдзух архайы ууыл, цæмæй фæфылдæр уой университеты музейы экспонаттæ. Уæлдай стыр бузныг дзы дæн, дунейы зындгонд ахуыргонд Абайты Васо къорд азты цы къæлæтджыныл бадт æмæ куыста, уый кæй самал кодта, уый тыххæй. Раныхасгæнæг ма банысан кодта, зæгъгæ, Вадимы фондз азы куыстмæ нæй фау æрхæссæн æмæ бахаста фæндон, цæмæй йын дыккаг æмгъуыдмæ раразмæ кæной йæ кандидатурæ.
Ахæм хъуыдытæ ма загътой университеты ахуыргæнджытæ Цхуырбаты Каринæ, Санахъоты Инал, Тедеты Залинæ æмæ æндæртæ.
Филологон зонæдты доктор, професор Плиты Гацыр та банысан кодта, зæгъгæ, ам цы бирæ рæстæг кусын, уымæй ахæм хорз уавæрты никуы уагътам ахуырадон советы рабадт æмæ уый дæр цасдæрбæрцæй у ректоры фæрцы. Уый ма загъта, зæгъгæ, Вадим Ботазы фырт иунæг кафедрæ дæр нæ уадзы æнæ стыр хъусдардæй. Афтæ иузæрдион архайд кæй кæны, уый фæрцы, зæгъгæ, нæ куысты уавæртæ дзæвгар фæхуыздæр сты æмæ æрсидт коллективмæ, цæмæй уыдон дæр зæрдиагæй архайой.
Уый фæстæ трибунæмæ рахызт Бибылты Анатоли. Уый райдианы залы уæвджытæн раарфæ кодта А.Пушкины райгуырдыл 119 азы сæххæсты æмæ уырыссаг æвзаджы боны сæраппонд. Арфæйы ныхæстæ ма загъта Остъаты Джульеттæ æмæ Дзиццойты Юрийæн сæ гуырæнбонты цытæн.
Дарддæр президент банысан кодта, зæгъгæ, райгонд æмæ сæрыстыр дæн ректоры куыстæй æмæ загъта, зæгъгæ, Тедейы фырт цалынмæ нæ куыста, уæдмæ къорд азты дæргъы университетæй хъуыст алыгъуызон дам-думтæ, бирæ хъомылгæнджыты хъуыд сæ сывæллæтты бартæ хъахъхъæнын. Фæстаг фондз азы ахæм мæгуырау цаутæ иунæг хатт дæр нал фехъуыстам æмæ уый дæр, кæй зæгъын æй хъæуы, у Вадим Ботазы фырты æнтыст.
Президент загъта, зæгъгæ, нæ сæйрагдæр хæстæй иу у, цæмæй Ирыстоны сомбонæн бацæттæ кæнæм, моралон æмæ монон хъæддыхдзинад кæмæ уа, ахæм квалификациджын кусджытæ. Цы куыстытæ бакодтат, уыдон, зæгъгæ, сты хорз, фæлæ мæ тынгдæр фехъусын фæндыд уæ зонадон æнтыстыты тыххæй. Афтæ мæм кæсы, æмæ абон университеты коллективы стырдæр хъусдард здахын хъæуы, скъолаты цы æвзыгъд ахуыргæнинæгтæ ис, уыдонмæ. Хъæуы сæ агурын, семæ æмбæлын, университетмæ сæ æрбахонын. Уый фæстиуæгæн ноджы сырæздзæнис уæ куысты ахадындзинад.
Президент ма банысан кодта, зæгъгæ, тагъд æвзæрст цæудзæн ног ректор. Ацы хъуыддаджы æз иууылдæр ме ‘ууæнк æвæрын сымахыл. Уымæн æмæ аккагдæры сымах зонут хуыздæр, уе ‘хсæн кæй ис , уый тыххæй.
Советы уæнгтæ æмхъæлæсæй ректоры бынатмæ дыккаг æмгъуыдмæ кандидатæй раразмæ кодтой Тедеты Вадимы кандидатурæ.
Гæззаты Иван
Comments are closed, but trackbacks and pingbacks are open.