«Юг-Телеком»-ы коммерцион директор Джиоты Эрна нын куыд радзырдта, афтæмæй сæ компани ацы бонты йæ интернет бастдзинад фæхуыздæр кæндзæнис.
«Нæ интернет бастдзинадæй ныртæккæ пайда кæнынц нæ горæты цæрджытæн сæ 70 проценты. Горæтæн æддейæ нæ бастдзинад ис Цхинвалы районы Тъбеты хъæуы дæр. Куыд алы куыстуат, афтæ махмæ дæр рæстæгæй-рæстæгмæ фæзыны чысыл зындзинæдтæ. Бастдзинад æмæ интернеты модификаци æппынæдзух домынц хызæджы гъæд фæхуыздæр кæнын æмæ уый æмбæлон æмвæзадыл æвæрын. Цхинвалы алы микрорайоны дæр кæд базæйон станцтæ ис, уæддæр хатт бахъæуы ногтæ саразын, уымæн йæ æмæ интернеты лæггæдты тыгъдад кæны бонæй-бон фылдæр. Горæты та цы базæйон станцтæ уыд, уымæн йæ фарсмæ аразæм нæ кабелон хызæгтæ. Уый фæстиуæгæн та фæхуыздæр уыдзæн канд интернеты гъæд нæ, фæлæ йæ мегабайтон тыгъдад дæр. Ацы хабар рагæй саразинаг уыд, фæлæ уый тыххæй бацæттæ кæнын хъуыд базæйон станцы ног объекттæ», – зæгъы уый.
Тагъд æнгæс куыстытæ бакæндзысты Дзауы районы дæр. Уыдон ма фæнд кæнынц ацы районы хъæуты æмткæй интернетæй сифтонг кæнын. Нырмæ уыдон архайдтой интернетмæ хизын смартфонтæ æмæ модемты руаджы. Цæрджытæй цæуы бирæ куырдиæттæ, курынц, цæмæй фæтагъд кæной куыстытæ æмæ сæ сифтонг кæной æнæлимитон интернетæй. Ахæм куырдиæттæ цæуы республикæйы иннæ районты цæрджытæй дæр. Фæлæ сæйраг офисы куыд зæгъынц, афтæмæй проектон-сметон куыстытæ компани йæхи сæрмагонд инвестицитæй кæй æххæст кæны, уымæ гæсгæ чысыл къуылымпытæ ис сæ куысты. Зæгъынц, зæгъгæ, «Юг-Телеком» Хуссар Ирыстоны территорийыл цы архайд кæны, уымæн æрмæст коммерцион бындур нæй.
«Юг-Телеком»-ы ма нын куыд загътой, афтæмæй сæ бастдзинады ифтонгадтæ кæд ногтæй баивтой, уæддæр бастдзинады лæггæдтæ баззадысты æнæ аивгæйæ. Абонентон лæггæдты аргъ бафидынæн горæты бирæ рæтты ис сæрмагонд терминалтæ.
Уазæгты Марфа
Comments are closed, but trackbacks and pingbacks are open.