«Спутник – Хуссар Ирыстон»-ы пресс-центры брифингы рӕстӕджы Женевӕйы дискусситы хуссарирыстойнаг делегацийы сӕргълӕууӕг Коцты Константин куыд фехъусын кодта, уымӕ гӕсгӕ Хуссар Ирыстон ӕмӕ Абхазы республикӕтӕн сӕйраг у, ӕдасдзинады юридиконæй бӕрнджын гарантитӕ сын куы уа, уый. Йӕ ныхӕстӕм гӕсгӕ ацы документыл куыст дӕргъвӕтин рӕстӕджы цӕуы. Уыд ахӕм рӕстӕг дӕр ӕмӕ фӕрстӕ цасдӕрбӕрцӕй цӕттӕ куы уыдысты ацы документыл къухтӕ ӕрфыссынмӕ, ӕгӕрыстӕмӕй, гуырдзиаг фарс дӕр разы уыд документы текстыл.
Ныртӕккӕ, зӕгъгӕ, кӕд архайӕм ацы хъуыддагыл, уӕддӕр нӕ къухты уадиссаг ӕнтыстытӕ не ‘фты. Зӕрдыл ӕрлӕууын кодта, 2010 азы Хуссар Ирыстон, Абхаз ӕмӕ Гуырдзыстон сӕ раздӕры къухдариуӕггӕнджыты руаджы хъусынгӕнинаг куы сарӕзтой сабырадыл иузӕрдион кӕй сты ӕмӕ тыхӕй пайда кӕй нал ӕрцӕудзӕн, уый тыххæй. Уыимӕ иумӕ хуссарирыстойнаг ӕмӕ абхазаг фӕрстӕ фехъусын кодтой, закъоны бындурыл хихъахъхъӕнынады бар кӕй дӕттынц сӕхицӕн.
«Хъӕуы юридиконæй бӕрнджын гарантитӕ, цыран сӕрмагонд документы бын фыст уыдзӕн ӕртӕ бӕстӕйы къухдариуӕггӕнджыты къухфыстытӕ. Фӕлӕ гуырдзиаг хайадисджыты хъуыдымӕ гӕсгӕ, уыцы гарантитӕ хъуамӕ дӕтта Уӕрӕсе. Фӕлӕ уый хъаугъайы фӕрстӕй нӕ уыд, Уӕрӕсе ӕрмӕстдӕр ӕр-цыд ӕххуысмӕ Хуссар Ирыстонмӕ», – банысан кодта Константин.
Йӕ ныхӕстӕм гӕсгӕ, гуырдзиаг фарс зыгъуыммӕ кӕны факттӕ, бӕлвырд кӕны, ома, дам, Уӕрӕсе дӕр у бабырсӕг фарс. Ам, зӕгъгӕ, егъау нысаниуӕг ис женевӕйаг дискусситӕн, цыран йӕ хайадисджыты рӕгъмӕ хаст цӕуы рӕстдзинад.
Банысан кодта, зæгъгæ, ӕппӕт зындзинӕдтӕм нӕкӕсгӕйӕ, Хуссар Ирыстон дискусситы боны фӕткӕй нӕ исы, тыхӕй пайда кӕй нал ӕрцӕудзӕн, уыцы фарст ӕмӕ архайдзӕн, цӕмӕй йыл куыст цӕуа ӕмӕ йыл къухтӕ фыст ӕрцӕуа.
Паддзахадон арӕнты делимитаци ӕмӕ демаркаци
Хуссар Ирыстон ӕмӕ Гуырдзыстоны ‘хсӕн паддзахадон арӕнты делимитаци ӕмӕ демаркацийы куыст хъуамӕ иумиагӕй конд цӕуа. Арӕнты делимитаци ӕмӕ демаркацийы фӕдыл бадзырдтытӕм рахизын хуымӕтӕг уынаффӕ у – цӕмӕй алы адӕймаг дӕр ӕмбара, паддзахадон арӕнтӕ кӕуылты цӕуынц ӕмӕ йӕ фехалыны бар кӕй нӕй, уый.
Паддзахадон уынаффӕгӕнӕг банысан кодта, зæгъгæ, советон рӕстӕгӕй нын цы нысангонд арӕнтӕ баззад, уыдон, арӕнтӕм ӕввахс цӕрджыты интересты цӕстӕнгасӕй, бынтон ахъуыдыгонд нӕ уыдысты.
Гуырдзыстонӕй хайадисджытӕ цӕттӕ нӕма сты арӕнты делимитацийы фарстыл уынаффӕ кӕнынмӕ, фӕлӕ ныфс бавӕрдта, кӕй ӕрцӕудзысты уыцы хъуыдымӕ. Уымӕн ӕмӕ Гуырдзыстоны фарсӕрдыгӕй ныридӕгӕн хъуысы, ома, ирӕттӕ ӕмӕ абхазӕгтимӕ хъӕуы уынаффӕ кӕнын, цӕмӕй бӕлвырд ӕрцӕуой, арӕнтӕ кӕуылты цӕудзысты, уыцы хӕххытӕ.
Делегацийы сӕргълӕууӕг куыд загъта, афтæмæй дунейы практикӕмӕ гӕсгӕ хъӕуы иумиаг куыст кӕнын, науӕд арӕнтыл ӕдзух уыдзӕн хъаугъатӕ ӕмӕ инциденттӕ.
Агрессивон ахаст сын нал уыд
Коцты Константины ныхӕстӕм гӕсгӕ, Женевӕйы дискусситы алы рабадты дӕр гуырдзиаг фарс йӕхи агрессивон фӕдары. Фӕлӕ ацы хатт сӕ агресси къаддӕр уыд. Иумиагӕй сисгӕйӕ, Гуырдзыйы ныры разамынад архайы, цӕмӕй Уӕрӕсейы ныхмӕ карз раныхӕстӕ ма кӕной ӕмӕ уавӕр ма карз кӕной. Фӕлӕ ӕндӕр бӕстӕты – Украинӕ, Ныгуылӕны ‘рдыгӕй Гуырдзыстонмӕ сидынц, цӕмӕй Уӕрӕсейы ныхмӕ бакæной дыккаг фронт.
«Бӕрӕг у уый, ӕмӕ Гуырдзыстон кӕй хъомысджын кӕны йе ‘фсӕддон тыхтӕ, йӕ территорийыл фылдӕр кӕны НАТО-йы уӕвынад – уыдон та сты тӕссагдзинад хӕссӕг. Уыцы аххосӕгтӕм гӕсгӕ ахсджиаг у, цӕмӕй куыст дарддӕр ӕрцӕуа, тыхӕй пайда кӕй нал ӕрцӕудзӕн, уыцы документыл», – банысан кодта уый.
Йӕ ныхӕстӕм гӕсгӕ, Хуссар Ирыстонӕн сӕйраг гаранти у, нӕ территорийыл уӕрӕсейаг ӕфсӕддон базӕйы уӕвынад ӕмӕ Уӕрӕсеимӕ ӕхсӕнпаддзахадон бадзырдтытӕ конд кӕй ис, уый. Ӕмӕ цӕмӕй уыцы хъуыддӕгтӕм ма ӕрцӕуӕм, уый тыххӕй пайда хъӕуы дипломатон фӕрӕзтӕй, сӕрмагондӕй та, тыхӕй пайда кӕй нал ӕрцӕудзӕн, уыцы сразыдзинадӕй.
Иумиагӕй сисгӕйӕ, дискусситӕ сты ахсджиаг регионы стабилондзинад ифтонг кӕныны хъуыддаджы – уыцы хъуыды банысан кодтой йӕ хайадисджытӕ дӕр.
КЪӔБУЛТЫ Маринӕ
