Хуссар Ирыстоны рынчындæттæ райстой хостæ Республикæ Цæгат Ирыстон-Аланийæ æххуысы фæлгæтты. Уый размæ Хуссар Ирыстоны коронавирусон инфекци апарахаты уавæрыл телефонæй дзургæйæ æруынаффæ кодтой Президент Бибылты Анатоли æмæ РЦИ-Аланийы сæргълæууæг Битарты Вячеслав.
Республикæ Цæгат Ирыстон-Аланийы сæргълæууæг бахæс кодта, цæмæй республикæмæ арвитой хосты парти, кæцытæ хаст æрцыдысты коронавирусон инфекци профилактикæ æмæ хос кæныны фæдыл Уæрæсейы Федерацийы Æнæнинздзинад хъахъхъæныны методикон рекомендацитæм, афтæ ма республикæйы рынчындæттæн медицинон туаггуыр.
Бибылты Анатоли бузныджы ныхæстæ загъта Цæгат Ирыстоны къухдариуæгадæн, оперативонæй кæй баххуыс кодта, уый тыххæй.
Æнæниздзинад хъахъхъæныны министры хæстæ æххæстгæнæг Тотчиты Георги загъта, зæгъгæ, æххуысы фæлгæтты райстой дексаметазон – 1000 ампулæйы, гепарин – 1200 ампулæйы, артлегиа (олокизумаб) – 30 змæсты, афтæ ма 50 баллоны туаггуыримæ.
«Ацы хостæ дих æрцæудзысты республикæйы рынчындæтты ‘хсæн. Æз бузныг дæн Цæгат Ирыстоны коллегæтæй сæ бакæнгæ æххуысы тыххæй», – загъта Тотчиты Георги.
Президенты пресс-службæйы куыд фехъусын кодтой, афтæмæй цыппæрæмы Бибылты Анатоли Республикон медицинон бирæпрофилон центрмæ барвыста антикогулянты иу парти, коронавирусон инфекцийæн æнæмæнгхъæуæг хос Гепарин 1200 ампулæйы.
COVID-19-имæ тох кæныны хъуыддагмæ йæ хайбавæрд бахаста Республикæ Хуссар Ирыстоны Национ банк дæр. Рынчныдæттæм æрвыст æрцыдысты авд бактерицидон рециркуляторы уæлдæф ссыгъдæг кæнынæн.
Comments are closed, but trackbacks and pingbacks are open.