Спорты дыууæ хуызæй ауагътой ерыстæ

Ӕрвылаз дæр милицийы сæрмагонд нысаниуæджы къорды кусджытæн ауадзынц ерыстæ  спорты алыгъуызон хуызтæй. Ахæм турниртæ æнæмæнгхъæуæг сты тыхон структурæты кусджытæн, уæлдайдæр та специалон нысаниуæг кæмæн ис, уыдонæн. Ныридæгæн ОМОН-ы уагъд æрцыдысты ерыстæ турникыл хи исынæй æмæ штанга уæлгоммæ хуысгæйæ исынæй. Ерыстæ уагъд цæуынц къорды сырæзтыл 29 азы сæххæсты сæраппонд.

Тренировкæтæй иууыл хуымæтæг æмæ эффективондæр у турник. Йæ фæрцы тыхджын кæнынц къухты æмæ фæсонты нуæрттæ, хуыздæр кæны физикон фæлтæрддзинад, фæхуыздæр вæййы адæймаджы фердæхт. Ерысты иумийагæй нысæнттæ æвæрдтой куыд командæтæн, афтæ ма индивидуалон æгъдауæй дæр. Фæуæлахизуæвджытæ, цæмæдæр гæсгæ, систы сæ ротæты номыртæм гæсгæ, – 1-æм опера-тивон ротæ бацахста фыццаг бынат, 2-æм оперативон ротæ дыккаг бынат æмæ 3-æм оперативон ротæ та æртыккаг бынат. Индивидуалон зачетæй та фыццаг бынат бацахста Тедеты Таймураз, дыккаг бынат – Дзеранты Георги æмæ æртыккаг бынат та Ӕлборты Эльбрус.

Штангæ исын дæр нымад у иууыл хуыздæр спорты хуызыл. Уымæн æмæ йæ фæрцы адæймаджы хæцъæфтæ рæзынц, фидар кæны æмæ адæймагыл тых æфтауы. Спецкъорды кусæгæн та фыццаджыдæр, фæхуыздæр фæййы йæ фæразондзинад, кæцы æнæмæнгхъæуæг у службæйон хæстæ æххæст кæнынæн. Ам та ерысты хайадисджытæ дих æрцыдысты цыппар уæзы категорийыл æмæ очкотæ истой куыд командон æгъдауæй, афтæ индивидуалонæй дæр. Алкæцы спортсменæн дæр уыд æртæ хатты уæз сисыны бар æмæ йæ алы бацыдæн дæр, куыд йæ бон у, афтæ йæ фылдæр кæн.

Ацы ерысты дæр тох кодтой хъазуатонæй, алчидæр тырныдта рамбулынмæ. Уымæ гæсгæ очкотæ банымайыны фæстиуæгæн рабæрæг ис, дыууæ командæйы кæй сты æмхуызон бæрæггæнæнтимæ. Тæрхонгæнджытæ фæндон рахастой, цæмæй дыууæ командæ дæр райсой фыццаг бынæттæ. Уымæ гæсгæ фыццаг бынатыл ацыдысты 1-æм æмæ 3-æм оперативон ротæтæ, дыккаг бынат бацахста 4-æм оперативон ротæ æмæ æртыккаг та 2-æм опе-ративон ротæ. Индивидуалон зачеты та 75 килограммы уæзы фæуæлахиз Харебаты Марат, 85 кг – Пухаты Алан, 95 кг – Коцты Азæмæт æмæ уæззау уæзы категорийы та – Хæмыцаты Сослан.

Джиоты Александр