Спорты бæрæгбон – Дзæуджыхъæуы

Дзæуджыхъæуы уагъд цæуы 19-22 аздзыд боксерты ‘хсæн Европæйы чемпионат. Ерысты хайад исынц 39 бæстæйæ 240 спортсмены.

Чемпионат официалонæй байгом кæныны церемони уагъд æрцыд спорты галуан «Манеж»-ы, цыран хайад райстой РХИ-йы Президент Бибылты Анатоли, Цæгат Ирыстон-Аланийы Сæргълæууæг Битарты Вячеслав, Уæрæсейы Боксы федерацийы генералон секретарь Умар Кремлев, боксæй Уæрæсе æмæ Хуссар Ирыстоны сгуыхт тренер Сланты  Витали,  цытджын уазджытæ Цæгат Кавказы республикæтæй. Дунеон ерыстæ уагъд цæуынц 8-17 марты.

Ерыстæ гом кæнгæйæ, Битарты Вячеслав банысан кодта, зæгъгæ, Ирыстоны спортивон æмбуархæстæй ерыстæ сты спорты популярон хуызтæй сæ иутæ. «Махмæ аргъ кæнынц æмæ æмбарынц æмбуархæсты аивад. Боксæн ис бирææнусон истори æмæ ссис Олимпион змæлды æнæфæхицæнгæнгæ хай. Бокс æнæхъæн дунейы дæр у  популярон,  йæ табугæнджыты нымæц рæзы азæй азмæ», – загъта РЦИ-Аланийы Сæргълæууæг. Уый арфæ ракодта ерысты организатортæ æмæ тæрхонгæнджытæн, бафæндыд æй уыдонæн рæсугъд æмæ раст уæлахизтæ,  боксуарзджытæ æмæ йæ уазджытæн та бафæндыд, цæмæй Ирыстоны зæххыл спорты бæрæгбоны рæстæджы арвитой хорз рæстæг.

Уый фæстæ чемпионаты хайадисджытæ, уазджытæ æмæ бирæнымæц табугæнджытæн раарфæ кодта Умар Кремлев. «Дзæуджыхъæуы уарзынц бокс, тырнынц æнтыстытæм. Ам ис ахæм спортсментæ, кæцытæн сæ бон у не стыр Райгуырæн бæстæйы ном дунеон аренæйы хъахъхъæнын. Арфæ кæнын æппæт командæтæ-хайадисджытæн. Мæ зæрдæ уын зæгъы хорз æмæ аккаг тохтæ», – загъта уый.

Спортивон мадзалы хайадисджытæн бакастæуыд Уæрæсейы Федерацийы Спорты министр Павел Колобковы арфæ, уый фæстæ æвдыст æрцыд видеоролик ирæтты – аланты фыдæлты истори, сæ тых, хъомыс, лæгдзинад æмæ хъæбатырдзинады тыххæй.

Банысан кæнын хъæуы уый дæр, æмæ Уæрæсейы æмбырдгонд командæйы кæй архайынц 20 спортсмены, уыцы нымæцы Цæгат Ирыстоны минæвар Абайты Алан дæр. Уый ныридæгæн 64 кг уæзы категорийы акодта дыууæ тохы. Фыццаг уал фæуæлахиз Болгарийы минæвар Венсан Киркоровыл. Дыккаг фембæлды  тыхджындæр уыд Словакийы боксер Михаил Ткачæй. Ныр та Алан 13 марты финалы ¼ хайы тох кæндзæн испайнаг боксер Адриан Тиам Креусимæ.

Нæ уацх.