Спорт

ГРЕКЪАГ-РОМАГ ХЪÆБЫСХÆСТ

Новосибирскы уагъд цыд грекъаг-ромаг хъæбысхæстæй Уæрæсейы чемпионат. 55 кг уæзы категорийы бæстæйы чемпион ссис Хъæбæлоты Витали. Финалы уый фæуæлахиз Эмин Сефершаевыл 3:2 хыгъдæй.

Ныр Витали ссис Уæрæсейы æртæ хатты чемпион. Раздæр ма уый, ацы уæзы категорийы архайгæйæ, Уæрæсейы чемпионаты фæуæлахиз 2018 æмæ 2019 азты.

Новосибирскы ма ирон богалтæй бронзæйон призер ссис Джиоты Дмитри. Уый та архайдта 82 кг уæзы категорийы. Æртыккаг бынат бацахсыныл тохы фæуæлахиз Адлан Акиевыл -7:0.

УÆГЪДИБАР ХЪÆБЫСХÆСТ

Белорусы спортивон кад хъахъхъæнæг ирон богал Колыты Георги ссис уæгъдибар хъæбысхæстæй дунеон турнир «Анри Деглан»-ы уæлахиздзау. Ерыстæ уагъд цыдысты Ниццайы. Георгийы къухты ахæм æнтыст бафтыд 65 кг  уæзы категорийы.

Банысан кæнын хъæуы уый, æмæ къуыри раздæр та Георги кæй ссис Белорусийы чемпион.

***

Хуссарирыстойнаг хъæбысæйхæцæг Нарыкъаты Марат ссис æвзæнгты ‘хсæн РЦИ-Аланийы чемпионаты бронзæйон призер. 51 кг уæзы архайгæйæ, Марат акодта 4 тохы æмæ фæуæлахиз æртæйы. Мараты тренертæ сты Хъесаты Петр æмæ Багаты Вадим. 

ХУРИТЫ Батрадз