Спорт

ФРАНЦЫ ÆМБЫРДГОНД КОМАНДÆ – ЧЕМПИОНАТЫ УÆЛАХИЗДЗАУ

Францы æмбырдгонд командæ футболæй дунейы чемпионаты финалы рамбылдта Хорватийы æмæ ссис йæ уæлахиздзау. Хъазт уагъд æрцыд Мæскуыйы «Лужники»-йы стадионы æмæ фæцис 4:2 хыгъдæй. Французæгтæн хыгъд байгом кæнын бантыст 18 минутыл хорватаг размæбырсæг Марио Манджукичы автоголы фæрцы. Уымæй 10 минуты фæстæдæр хорватæгты æрдæгхъахъхъæнæг Иван Перешич сæмхуызон кодта хыгъд. Фæлæ та французæгтæ 38 минутыл рахызтысты размæ. Пенальти хорз сæххæст кодта Антуан Гризманн.

Хъазты дыккаг æмбисы Францы командæйы хъазджытæ Поль Погба (59 минут) æмæ Килиан Мбаппе (65 кг) бакъуырдтой фæйнæ пуртийы. Хорватийы размæбырсæг Манджукичæн ма йæ бон ссис йæ командæйæн дыккаг пурти бакъуырын дæр.

Ныр Францы командæ дунейы чемпион ссис дыккаг хатт. Уый размæ та командæ фæуæлахиз 1998 азы.

Банысан кæнын хъæуы уый, æмæ ма фæстаг хатт дунейы чемпионаты финалон хъазты афтæ бирæ пуртитæ бакъуырд кæй æрцыд 60 азы размæ.

Францы тренер Дидье Дешам та историйы мидæг у æртыккаг, кæцы дунейы чемпионат рамбылдта куыд футболист æмæ куыд тренер, афтæ. Уый размæ ма ахæм æнтыст сæ къухты бафтыд бразилиаг Марио Загало æмæ немыцаг Франц Беккенбауэрæн.

Бон раздæр та уагъд æрцыд чемпионаты 3-аг бынат бацахсыны сæраппонд хъазт. Уым та Бельгийы команæ 2:0 хыгъдæй рамбылдта Английы æмæ ссис турниры бронзæйон призер.

Чемпионаты хуыздæр хъазæгыл нымад æрцыд Хорватийы æрдæгхъахъхъæнæг Лука Модрич, кæцы аст хъазты мидæг бакъуырдта дыууæ пуртийы. Уый ссис «Сыгъзæрин пурти»-йы призы хицау. «Æвзист майдан» та лæвæрд æрцыд Бельгийы æрдæгхъахъхъæнæг Эден Азарæн, кæцы 6 хъазты мидæг расгуыхт æртæ хатты. «Æвзист пурти» та райста французаг размæбырсæг Антуан Гризманн. Уый та 7 хъазты бакъуырдта 4 пуртийы.

Хуыздæр æвзонг хъазæгыл нымад æрцыд Францы æмбырдгонды 19-аздзыд Килиан Мбаппе. Хуыздæр къулдуаргæсыл нымад æрцыд Бельгийы хъазæг Тибо Куртуа.

Финалон хъазтмæ кастысты Франц æмæ Хорватийы президенттæ Эммануэль Макрон æмæ Колинда Грабар-Китарович, афтæ ма УФ-йы президент Владимир Путин. Социалон хызæгты ирон къордты апарахат къам, цыран Владимир Путин райста Черчесты Станиславы къух. Чемпионаты финалон хъазтмæ каст РХИ-йы Президент Бибылты Анатоли дæр.

 

УÆГЪДИБАР ХЪÆБЫСХÆСТ

Мадриды уагъдæрцæуæг «Испаны Гран-при»-йы æнтыстджынæй сæхи равдыстой ирон богалтæ. Рамбылдтой æртæ сыгъзæрин æмæ иу æвзист майданы. Фыццаг бынæттæ бацахстой Бадиты Артур (65 кг), Фриты Таймураз (86 кг) æмæ Тæпсиаты Тамерлан (92 кг). Дыккаг та ссис Цæрæхаты Сæрмæт (79 кг).

Хуриты Батрадз