Спорт

УÆЗЗАУ АТЛЕТИКÆ

Мæскуыйы уагъд æрцыд уæззау атлетикæйæ Европæйы чемпионат. Ерысты хайад райстой Ирыстоны уæззау атлетикæйы скъолайы хъомылгæнинæгтæ дæр. Чызджыты ‘хсæн æвзист майдан рамбылдта Соттиты Янæ. Уый 76 кг уæзы категорийы архайгæйæ, дыууæ истæн скодта 246 кг (112+134). Ерысты уæлахиздзау та ссис Украинæйы минæвар Ирина Деха, кæцы равдыста 248 кг бæрæггæнæн.

Соттиты Янæйæн гæнæн ис æмæ суыдаид Европæйы чемпионкæ дæр. Уый толчок кæй хонынц, уым штангамæ фæстаг бахызты систа 137 кг, ома, Дехайы бæрæггæнæнæй иу кг фылдæр, фæлæ йын æй тæрхонгæнджытæ нæ банымадтой.

Ноджы ма иу ирон спортсменæн бантыст майдан рамбулын. Ерысты бронзæйон призер ссис Наниты Тимур. Уымæн ахæм æнтыст йæ къухты бафтыд 109 кг уæзы категорийы. Тимур дыууæ истæн скодта 401 кг (184+217).

 

ТЕННИС

Уæрæсейаг теннисисттæ Хъæрæцаты Аслан, Даниил Медведев, Андрей Рублев æмæ Карен Хачанов хайад райсдзысты Токиойы Олимпион хъæзтыты. Уый тыххæй фехъусын кодта Уæрæсейы Теннисы федерацийы президент Шамиль Тарпищев.

Олимпион хъæзтыты теннисистты турниры хайад райсдзысты 64 нæлгоймаджы æмæ 64 сылгоймаджы.

Банысан кæнын хъæуы уый дæр, æмæ Хъæрæцаты Аслан кæй у фыццаг ирон теннисист, кæцы хайад райсдзæн Олимпион хъæзтыты.

ХУРИТЫ Батрадз