Спорт

ГРЕКЪАГ-РОМАГ ХЪÆБЫСХÆСТ

Ростовы уагъд æрцыд Уæрæсейы чемпионат грекъаг-ромаг хъæбысхæстæй. 55 кг уæзы категорийы дыккаг бынат бацахста ирон богал Хъæбæлоты Витали.

Финалмæ цæугæйæ Витали фыццаг тохы тыхджындæр уыд Курганы областы минæвар Фирдавс Хайбулоевæй – 3:0. Дарддæр 9:0 хыгъдæй фæуæлахиз хъалмыхъхъаг Игорь Фаустовыл. Æрдæгфиналы та 11:0 хыгъдæй рамбылдта Алтайы крайы командæйы уæнг Юри Тапайы. Æрмæст финалы фæхæрд фæсивæды ‘хсæн Европæйы чемпионаты призер Виктор Ведерниковæн.

УÆГЪДИБАР ХЪÆБЫСХÆСТ

Уæгъдибар хъæбысхæстæй 2016 азы Олимипион чемпион Рæмонты Сосланæн йæ бон не суыдзæн Уæрæсейы чемпионаты хайад райсын. Уый тыххæй хъусын кæны Сосланы тренер Мæргъиты Анатоли. «Сосланæн æввахс рæстæджы хъæудзæн йæ уæрагыл операци саразын. Операци йын сараздзысты кæнæ Уæрæсейы, кæнæ та Италийы.

Уæрæсейы чемпионат уагъд æрцæудзæн 12-14 марты Улан-Удэйы æмæ суыдзæн Токиойы Олимпиадамæ бахауыны фæдыл сæйрагдæр этаптæй сæ иу.

ФУТБОЛ

Дзæуджыхъæуы футболон командæ «Алани» Турчы цæттæгæнæн сборты рæстæджы акодта дыууæ контролон хъазты. Фыццаг уал алайнæгтæ 5:3 хыгъдæй рамбылдтой сербаг командæ «Радничики»-йы. Ирыстоны сæйраг футболон командæйы сконды расгуыхтысты Ислам Машуков, Дзахойты Давид, Хæбæлаты Алан, Суанты Руслан æмæ Саулохты Давид.

Чысыл фæстæдæр та «Алани» æндæр скондæй ахъазыд ноджы иу сербаг командæ – «Напредак»-имæ. Ам та дзæуджыхъæуккæгтæ фæуæлахиз сты 1:0 хыгъдæй. Хъазты иунæг иу пурти бакъуырдта Гуырцъыты Батраз.

Хуриты Батрадз