Ног ахуыры азыл нæ горæты 3-æм асктæуккаг скъолайы ахуыргæнджыты коллектив æмæ скъоладзаутæ сæмбæлдзысты 12-æм астæуккаг скъолайы бæстыхайы. Ахæм уынаффæ рахастæуыд, Ахуырад æмæ Уæлвæткон уавæрты министрадты минæвæрттæй конд къамис цы хатдзæгтæ сарæзтой, уый фæстæ.
3-æм скъола байгом 1934 азы æмæ рæстæджы, стæй – зæххæнкъуысты, цалдæр хæсты фæстиуæгæн æрцыд аварион уавæрмæ æмæ сывæллæттæн ныр тæссаг у ам ахуыр кæнынæн. Уыимæ йæ бакондæй фæстæмæ капиталонæй цалцæг никуы æрцыд. Æрдæгпырх къултæн кæлы сæ сæрст, рудзгуытæ сты æдзæллаг уавæры. Бирæ рæтты цар у æркæлынæввонг, цалдæр ран систæ дæр фæиппæрд сты кæрæдзийæ. Зын бауырнæн у, уал азы дæргъы ахуыргæнджытæ сæ ныфс куыд хастой ацы бæстыхайы ахуырадон процесс уа-дзынмæ. Фæлæ, уымæ нæ кæсгæйæ, уæддæр ахуырадон процесс цыд планмæ гæсгæ. Скъола ахæм уавæры кæй ис, уый бандæвта скъоладзауты нымæцыл дæр. Азæй-азмæ сæ нымæц кæны къаддæр, уымæн æмæ алы ныййарæджы дæр фæнды, цæмæй сæ сывæллæттæ ахуыр кæной æмбæлон, æдас уавæрты.
Ахуырад æмæ зонады министр Гасситы Натали куыд банысан кодта, афтæмæй 3-æм скъола æхгæд не ‘рцæудзæн. «Уый бахъахъхъæд æрцæудзæн æххæстæй, куыд ахуыргæнджыты, афтæ скъоладзауты æрдыгæй дæр. Горæты администрацийы ахуырады управлени бакуыста ацы фарстайыл, ома, цалынмæ скъолайы фарст скъуыддзаг æрцæуа, уæдмæ уал рæстæгмæ ахуыр кæндзысты æндæр скъолайы. Уый та уыдзæн 12-æм скъола. Иунæг проблемæ нын у, ныййарджытæ æппæрццагæй кæй кæсынц, сæ сывæллæттæ 2-аг сменæйы кæй ахуыр кæндзысты, уымæ. Фæлæ, мæнмæ гæсгæ, уым ницы зындзинæдтæ уыдзæн. Махмæ ис ахæм кружоктæ, секцитæ, кæцытæ уагъд фæцæуынц фыццаг сменæйы дæр. Уымæ гæсгæ сывæллæттæн сæ бон у райсомæй уыдонмæ цæуын, фæссихор та кæндзысты ахуыр. Ацы фарст у æнцон аскъуыддзаггæнæн», – банысан кодта Гасситы Натали.
Уый ныййарджытæм æрсидт, цæмæй сæ сывæллæтты ма ракæной ацы скъолайæ. «Кæд, æцæгæйдæр, уе скъолайы патриоттæ стут, кæд æмæ уæ сывæллæттæ сæ ахуыргæнджытыл сахуыр сты, уæд сæ макуыдæм ракæнут. 3-аг скъолайы проблемæимæ хорз зонгæ у нæ паддзахады сæргълæууæг дæр. Ныфс мæ ис, уый æввахс рæстæджы кæй райсдзæн æм-бæлон уынаффæ æмæ ацы скъола ногæй æндидзыд кæй æрцæудзæн, уымæй»,- загъта министр.
Скъолайы бæстыхайы ма цæмæй ноджыдæр басгарой æмæ йын йæ уавæр сбæлвырд кæной, уый тыххæй специалисттæ хуынд æрцæудзысты Цæгат Ирыстонæй. Уыдон сараздзысты хæдбар экспертизæ, кæцыты хатдзæгыл баст уыдзæн скъолайы бæстыхайы дарддæры хъысмæт.
Скъолайы педколлектив æмæ къухдариуæгадæн сæ ацыд æндæр скъоламæ рæстæгмæ кæй у, уый сын уыдис тынг æхсызгон. Уыдон ныфс ис, се скъола, æнæмæнгдæр, цалцæггонд кæй æрцæудзæн. Ахуыры хайы сæргълæууæг Чугуты Иринæ куыд загъта, уымæ гæсгæ цытджын линейкæ уагъд æрцæудзæн сæхи скъолайы кæрты. «Линейкæ уагъд æрцæудзæн 3-æм скъолайы кæрты, уроктæ та райдайдзысты ног бынаты»,- загъта уый. Афтæ ма банысан кодта, зæгъгæ йæ ныфс ис нæ республикæйы разамынад кæй бахъахъхъæндзæн Цхинвалы рагондæр скъолатæй сæ иуы, кæцы нымад у историон цыртдзæвæныл.
Кокайты Заринæ
Comments are closed, but trackbacks and pingbacks are open.