Хуссар Ирыстоны паддзахадон университеты уагъд æрцыд презентаци историйы кафедрæйы доцент Джиоты Зæлинæйы чиныг «Скифты политикон истори»-йæн. Ацы мадзалмæ фæуазæг сты нæ республикæйы Парламенты сæрдар Тадтаты Алан, университеты педагогон коллектив æмæ нæ бæстæйы зынгæ ахуыргæндтæ. Видеобастдзинады фæрцы ма дзы хайад райстой цæгатирыстойнаг ахуыргæндтæ Цыбырты Алексей æмæ Туаллæгты Алан, афтæ ма ирон æвзагмæ чиныджы тæлмацгæнæг Годжыцаты Нелли.
Райдианы ныхасы рацыд ХИПУ-йы ректор Тедеты Вадим, кæцы æрдзырдта чиныджы автор, æрыгон ахуыргонды бакæнгæ куысты тыххæй, чиныджы ахадындзинадыл æмæ ма тынг хорзыл банымадта, дыууæ æвзагыл кæй рацыд – ирон æмæ уырыссаг. «Тынг хорз уаид, ахæм чингуытæ ма нæм куы цæуиккой англисаг æвзагыл дæр. Уымæн æмæ нæ фыдæлты истори бирæты цымыдис кæны æмæ сын фадат уаид йемæ бæстонæй базонгæ уæвынæн», – банысан кодта университеты ректор.
Тадтаты Алан дæр стыр бузны-джы ныхæстæ загъта чиныджы ав-торæн æмæ чидæриддæр йæ рауадзынмæ хайбавæрд бахаста, æппæт уыдонæн. «Абон махыл сæмбæлд цины хабар, уымæн æмæ рухс федта диссаджы чиныг, кæцы стыр ахъаз фæуыдзæн нæ рæзгæ фæлтæрæн сæ фыдæлты истори ахуыр кæныны хъуыддаджы. Мæн фидарæй уырны, чиныг кæй уыдзæн популярон æмæ ма дзы кæй бахъæудзæн ноджы фылдæр экземпляртæ ныммы-хуыр кæнын», – загъта Парламенты сæрдар.
Ацы чиныджы мидисыл бæстондæр æрдзырдта ХИПУ-йы ирон æвзаг æмæ иумæйаг æвзагзонынæдты кафедрæйы сæргълæууæг, зынгæ историк æмæ ацы чиныджы зонадон редактор Дзиццойты Юри.
«Ацы чиныджы ис цыппар сæргонды æмæ дзы алкæцыйы дæр дзырд цæуы скифты экономикон, социалон æмæ æхсæннацион цардыл нæ, фæлæ политикон историйыл, кæд æмæ дзы уыдон дæр уæвынад кæнынц, уæддæр. Мах дарддæр дæр бирæ кусын хъæудзæнис, цæмæй ирдæй равдисæм, скифтæ нæ фыдæлтæ кæй уыдысты, уый. Уымæн æмæ ныры дуджы фæзындис ахæм ахуыргæндтæ, кæцытæ дызæрдыг кæнын райдыдтой ацы хъуыддагыл. Ацы чиныгыл скъоладзаутæ æмæ студенттæ куыд цымыдисæй сæмбæлдысты, уымæ гæсгæ зæгъæн ис æмæ чиныг рауад тынг хорз, йæ сахуыр кæнын у æнцон куыд ирон, афтæ уырыссаг æвзагыл дæр», – банысан кодта Дзиццойты Юри.
Мадзалы раныхасгæнджытæ иууылдæр банысан кодтой чиныджы ахсджиагдзинад. Чиныджы референттæ – хусссарирыстойнаг этнограф Мæргъиты Ирбег æмæ цæгатирыстойнаг историк æмæ археолог Туаллæгты Алан стыр райгондæй баззадысты авторы бакæнгæ куыстæй. Цыбырты Алексей та баныфсæвæрдта, зæгъгæ, ацы чиныгæн æнæмæнгæй арæзт æрцæудзæн презентаци Цæгат Ирыстоны дæр.
Йæхи ‘рдыгæй Джиоты Зæлинæ стыр бузныджы ныхæстæ загъта æрæмбырдуæвджытæн, чидæриддæр æм йе ‘ххуысы къух фæдаргъ кодта, æппæт уыдонæн.
Æмбæрстгонд у, ацы чиныгæн не ‘хсæнады цæйбæрц ахадындзинад ис, фæлæ, хъыгагæн, йæ тираж сæдæ экземпляр йедтæмæ нæу.
Джиоты Александр
Comments are closed, but trackbacks and pingbacks are open.