29-æм октябры Тыбылты Алыксандры номыл Хуссар Ирыстоны паддзахадон универститеты конференцзалы ауагъд æрцыдис 1-æм медико-социалон реабилитацийы фарстыты фæдыл 1-æм хуссарирыстойнаг-уæрæсейаг симпозиум. Симпозиумы куысты архайдтой Уæрæсе, Хуссар Ирыстон, Донецк æмæ Луганскы республикæты дохтыртæ. Хайад дзы райста РХИ-йы Хицауады Сæрдар Пухаты Эрик.
Симпозиумы сæ хъуыдытæ дзырдтой Хуссар Ирыстоны Æнæниздзинад хъахъхъæнын æмæ социалон рæзты министр Тотчиты Георги, университеты ректор Тедеты Вадим, Хицауады Сæрдар Пухаты Эрик, УФ-йы Федерацион Советы Социалон политикæйы фæдыл комитеты аппараты къухдариуæггæнæг Игорь Михалев, Уæрæсейаг зонæдты академийы академик Сергей Пузин, Сеченовы номыл фыццаг Мæскуыйаг паддзахадон медицинон университеты спортивон медицинæ æмæ медико-социалон реабилитацийы кафедрæйы сæргълæууæг Евгени Ачкасов, Хуссар Ирыстоны Хъалонтæ æмæ фиддонты парламентон комитеты сæрдар Коцты Жаннæ, Æнæниздзинад хъахъхъæнын æмæ социалон рæзты министры уынаффæгæнæг Игорь Галь æмæ æндæртæ.
Симпозиумы хайадисджыты раз йæ бацæттæгонд докладимæ ралæууыд Хуссар Ирыстоны Æнæниздзинад хъахъхъæнын æмæ социалон рæзты министр Тотчиты Георги.
Райдианы уый банысан кодта, зæгъгæ, медико-социалон реабилитацийы проблемæтæ ног не сты æмæ саразын хъæуы, хуыздæр фæстиуджытæ кæмæй исæм, ахæм системæ.
Кæй зæгъын æй хъæуы, къорд азты нæ рынчынтæ истой медицинон æххуыс, фæлæ ивы рæстæг. Уый та стыр ивындзинæдтæ хæссы куыд медицинæйы, афтæ нæ царды алы къабазмæ дæр. Министр фæстæдæр куыд банысан кодта, афтæмæй уыцы ивындзинæдтæ æмæ ногдзинæдты рæстæджы нæ рынчынтæн æмбæлон медицинон лæггæдты хъуыддаг цасдæрбæрцæй фæлæмæгъдæр.
Министры æмæ ма уый фæстæ чи раныхас кодта, уыдон се ‘ппæт дæр банысан кодтой, зæгъгæ, цæмæй цухдзинæдтæ иуварс æрцæуой, уымæн ацы симпозиум фæуыдзæнис стыр ахъаз, уымæн æмæ симпозиумы хайадисджыты фæндæй ахæм мадзæлттæ Уæрæсе æмæ Хуссар Ирыстоны ‘хсæн уагъд цæудзæнис афæдз иу хатт. Сæ хорздзинад, зæгъгæ, ис уый мидæг, æмæ æргом цæудзысты цухдзинæдтæ. Сæ аиуварс кæныны тыххæй та ист цæудзæнис æмбæлон мадзæлттæ.
Раныхасгæнæг ма банысан кодта, зæгъгæ, цæмæй рынчынтæн цæуа æмбæлон медицинон æххуыс, æнтысгæйæ рацæуой реабилитацион этаптæ, уый тыххæй ис бынат, хъæуæг ифтонгад, фæлæ фаг нæй хорз специалисттæ. Уый тыххæй та фæнд кæнынц, цæмæй фидаргонд æрцæуа ахæм фæтк, æмæ дохтыртæ æнæзивæгæй цæуой сæ квалификаци Уæрæсейы раззагдæр рынчындæтты фæбæрзонддæр кæнынмæ.
Раныхасгæнæг ма банысан кодта, зæгъгæ, нæ вæййы ахæм цаутæ, æмæ рынчындонмæ æрбахауд рынчын æмæ йæм не ‘рцыд хъус-дард. Уыимæ ма банысан кодта, зæгъгæ, иуæй-иу рынчынтæ сæхæдæг куы нæ бацархайой се ‘нæниздзинад фæхуыздæр кæныныл, уæд æрмæст дохтырæн уыцы æнтыст йæ къухты зынæй æфтдзæнис. Ацы хъуыды та зæгъы уымæн, æмæ кæд рынчынтæн тамако дыма кæнæ нуаза карз нуазинæгтæ, уæддæр рынчындоны хос скæныны фæстæ уыцы цайдагъдзинæдтæ нæ ныууадзынц.
Министр куыд банысан кодта, афтæмæй абон цы цухдзинæдты кой ракодтой, уыдон цæмæй иуварс æрцæуой, уый тыххæй хъæудзæнис фæрæзтæ дæр. Уыцы фарсты фæдыл ныхас цыд Хицауады разамынадимæ, цæмæй йæм уым дæр сæ хъусдард аздахой.
Уый фæстæ ма докладтимæ симпозиумы хайадисджыты раз ралæууыдысты Игорь Михалев, Сергей Пузин, Григорий Игнатенко æмæ æндæртæ. Раныхасгæнджытæй сæ иу куыд банысан кодта, афтæмæй рынчынты хæлцмæ нæй æмбæлон хъусдард. Æрымысгæ, æнæбындур диетæты нормæтæм гæсгæ хæлц дзуапп нæ дæтты адæймаджы æрвылбонон калориты бæрцæн, зæгъгæ, адæймаджы суткæйы минималон калоритæ кæд сты иу мин дыууæ сæдæ, уæд нæ рынчынтæ та суткæйы дæргъы исынц æрмæстдæр авд сæдæ калорийы бæрц. Арæх уый аххосæй сæдых вæййы рынчын æмæ низ та уыцы рæстæджы кæны тыхджындæр.
Гæззаты Иван
Comments are closed, but trackbacks and pingbacks are open.