Семинар – сабидæтты сæргълæуджытæн

Ацы бонты РХИ-йы Ахуырад æмæ зонады министрады цур Ахуыргæнджыты квалификаци бæрзонддæргæнæн институты кусджытæ уагдоны директор Къæбулты Заирæйы сæргълæудæй сорганизаци кодтой семинар нæ горæты скъолайы кары агъоммæйы уагдæтты сæргълæуджытæ æмæ методисттæн. Семинары темæ уыд «Скъолайы кары агъоммæйы уагдæтты хъуыддагдард иугъуызон формæмæ æркæнын».

Семинары хайад райстой 25 адæймаджы бæрц. Йæ ауадзыны сæйраг нысан уыд локалон æмæ æндæр документаци аразыны фæдыл иугонд домæнтимæ базонгæ уæвын. Семинар уагъта скъолайы кары агъоммæйы уагдæтты фæдыл Ахуыргæнджыты квалификаци бæрзонддæргæнæн институты хистæр методист Мамиты Лали, кæцы бацæттæ кодта хуызæгтæ «номенклатурон хъуыддæгтæм» гæсгæ æмæ равдыста æрæмбырдуæвджытæн, бацамыдта сын хъуыддагдарды сусæгдзинæдтæ. Семинары куысты рæстæджы йæ хайадисджытæм сæвзæрдысты юридикон характеры къорд фарстытæ, кæцытæн лæмбынæг дзуаппытæ радта РХИ-йы Ахуырад æмæ зонады минист-рады квалификациджын юрист Лапачи Мзия.

Къæбулты Заирæ куыд банысан кодта, уымæ гæсгæ квалификаци бæрзонд-дæргæнæн институты алкæцы специалист æрвылмæй дæр ауадзы ахæм семинартæ алкæцы дисциплинæйы фæдыл, уагдоны дирекци ахуыры азы райдианы цы график сфидар кодта, уымæ гæсгæ. Семинартæн ис хорз фæстиуджытæ, уымæн æмæ йæ хайадисджытæ сæ куысты фæдыл базонгæ вæййынц бирæ ногдзинæдтимæ, кæцы сын фæпайда вæййы сæ дарддæры куысты. Ацы семинары рæстæджы сабидæтты къухдариуæггæнджытæ базонгæ сты куыд уагдоны, афтæ æддейæ æрбацæугæ документаци раст аразын куыд хъæуы, уыимæ. Семинартæ æмиу кæнынц республикон методбаиугæнды куыстимæ, кæцытæ азы дæргъы æвдисынц предметон ахуырады иууыл актуалондæр темæтæ.

Ахуыргæнджыты квалификаци бæрзонддæргæнæн институты дирекци бузныджы ныхæстæ зæгъы, Ахуырады министрады юрист Лапачи Мзияйæн семæ æмгуыстад кæй кæны, уый тыххæй.

Джиоты Екатеринæ