Æрвылаз дæр нæ республикæйы астæуккаг скъолаты ахуыргæнджытæн уагъд æрцæуынц квалификаци бæрзонддæргæнæн курсытæ æндæр æмæ æндæр предметтæй. Курсытæ сорганизаци кæны РХИ-йы Ахуырад æмæ зонады министрады цур квалификаци бæрзонддæргæнæн институт Къæбулты Заирæйы сæргълæудæй. Хуссар Ирыстонмæ уæрæсейаг специалисттæ æрцыдысты ныр фæндзæм хатт, кæцыты ‘хсæн уыдысты профессортæ, доценттæ. Раздæр уыдон лекцитæ бакастысты нæ республикæйы астæуккаг скъолаты директортæ æмæ ахуыры хайы сæргълæуджытæн, афтæ ма лекцитæм байхъуыстой физикæ, хими, уырыссаг æвзаг æмæ литературæ, информатикæ, физкультурæ æмæ матемтаикæйы ахуыргæнджытæ. Ныр та – нæ республикæйы астæуккаг скъолаты англисаг æвзаджы ахуыргæнджытæн Цæгат Кавказы федералон университеты филологи, журналистикæ æмæ æхсæн-культурон коммуникациты гуманитарон институты лингвистикæ æмæ лингводидактикæйы кафедрæйы сæргълæууæг, педагогон зонæдты доктор, профессор Наталия Московская цыппар боны дæргъы квалификаци бæрзонддæргæнæн лекцитæ сты бакаст англисаг æвзаджы ахуыргæнджытæн нæ горæты 2-æм астæуккаг скъолайы бæстыхайы. Цыппар боны дæргъы уырдæм æмбырд кодтой куыд нæ горæты, афтæ нæ республикæйы районты скъолаты англисаг æвзаджы ахуыргæнджытæ æмæ цымыдисæй хъуыстой лекцитæм. Квалификаци бæрзонддæргæнæн курсыты хайад чи райста, уыцы ахуыргæнджытæн лæвæрд æрцыдысты сертификаттæ, уыдон Цæгат Кавказы федералон университеты «Лучшие практики российского образования для педагогов английского языка»-йы курсытæ кæй рацыдысты, уый тыххæй.
Нæ республикæйы ахуыргæнджытæ сæхæдæг дæр æмбарынц, ахæм лекцитæ тынг ахсджиаг кæй сты, уый. Уымæн æмæ зонад иу ран нæ лæууы, фæлæ размæ цæуы æмæ алкæцы ахуыргæнæгæн та уый фадат нæй, цæмæй республикæйæн æддæмæ ацæуа æмæ йæ квалификаци фæбæрзонддæр кæна. Англисаг æвзаджы ахуыргæнджытæй курсыты хайад чи райста, уыдон райгондæй баззадысты лекцитæй. Хуриты Ларисæ, 2-æм астæуккаг скъолайы англисаг æвзаджы ахуыргæнæг: «Тынг хорз лекцитæ нын бакаст Наталия Московская. Бирæ ногдзинæдтæ базыдтам. Бацамыдта нын англисаг æвзаг амоныны ног методтæ æмæ æндæртæ. Лекцитæ нын бакаст бæрзонд æмвæзадыл. Бузныгæй баззадыстæм нæ республикæйы Ахуырады министрады цур Квалификаци бæрзонддæргæнæн институтæй, ахæм хорз специалисты нæм кæй æрхуыдтой, уый тыххæй».
Банысан кæнын хъæуы уый дæр, æмæ Квалификаци бæрзонддæргæнæн институт дарддæр дæр кæй уадздзæн ахæм мастер-къластæ. Афтæмæй бæрзонддæр кæндзæн ахуыргæнджыты зонындзинæдты æмвæзад дæр, æмæ уый та хуыздæрырдæм бандавдзæн рæзгæ фæлтæры зонындзинæдтыл.
Джиоты Екатеринæ
Comments are closed, but trackbacks and pingbacks are open.