Азы дæргъы ахуыргæнджытæ бæрзонддæр кодтой сæ квалификаци

Æрвылаз дæр Ахуыргæнджыты квалификаци бæрзонддæргæнæн институты бацархайныц æмæ курсытæ сорганизаци кæнынц Республикæ Хуссар Ирыстоны скъолаты æмæ уæлдæр ахуыргæнæндæтты ахуыргæнджытæн. Курсытæ рацæуынц дæсгай специалисттæ куыд нæ республикæйы территорийыл, афтæ уымæн æддейæ дæр.

Куыд иннæ азты, афтæ та 2018 азы дæр курсытæ æмæ семинартæ уагъд æрцыдысты нæ республикæйы сæдæгай ахуыргæнджытæн. Институты директор Къæбулты Заирæ  нын бæстондæрæй радзырдта 2018 азы квалификаци бæрзонддæргæнæн курсыты фæдыл сæ бакæнгæ куысты тыххæй. «2018 азы 4-9 июны курсытæ уагъд æрцыдысты истори æмæ æхсæнадзонынады 46 ахуыргæнæгæн. Курсытæ сын ауагътой   Цæгат Кавказы Федералон университеты специалисттæ. 29-31 августы курсытæ уагъд цыдысты физкультурæ, ОБЖ (цардархайды æдасдзинад хъахъхъæнын), ИКТ-йы ахуыргæнджытæн. 5-11 сентябры та –  уырыссаг æвзаг æмæ литературæ, англисаг æвзаг, географи, райдиан кълæсты ахуыргæнджытæн – æдæппæтæй 125 ахуыргæнæгæн. 24-29 сентябры курсытæ рацыдысты математикæ, биологи, физикæ æмæ химийы 100 ахуыргæнæджы.  Уыдонæн се ‘ппæтæн дæр курсытæ æмæ тренингтæ ауагътой Цæгат Кавказы Федералон университеты специалисттæ. Ацы университеты специалисттæ æмæ ацы зылды юридикон институты специалисттæ ма курсытæ ауагътой РХИ-йы ахуырадон уагдæтты директортæ æмæ ахуыры хайы сæргълæуджытæн.

2018 азы 10-12 сентябры Пушкины номыл Мæскуыйы уырыссаг æвзаджы институты специалисттæ лекцитæ бакастысты хуссарирыстойнаг 60 ахуыргæнæгæн. 2018 азы 8-12 октябры  Адæмты хæлардзинады Уæрæсейаг университеты специалисттæ «Русская словесность»-æй лекцитæ ауагътой 45 ахуыргæнæгæн. 22-24 октябры уырыссаг æвзаг æмæ литературæйы  ахуыргæнджытæн курсытæ бакастысты  горæт Мæскуыйы ООО «Оценка качества образования»-йы специалисттæ.

2018 азы 10-15 декабры Хуссар Ирыстонмæ æрцыдысты Цæгат Ирыстон-Аланийы Квалификаци бæрзонддæргæнæн институты специалисттæ, кæцыйы сæргъ  лæууыд педагогон зонæты кандидат, РЦИ-Аланийы сгуыхт ахуыргæнæг Людмила Исакова. Уыдон арæх æрцæуынц республикæмæ. Хуссар Ирыстоны скъолаты уырыссаг æвзаджы 50 ахуыргæнæгæн проект «Реализация образовательной политики по продвижению и популяризации русского языка в Республике Южная Осетия»-йы фæлгæтты  нæ горæты 2-æм астæуккаг скъолайы курсытæ ауагътой ацы институты кусджытæ – педагогон зонæдты кандидаттæ Дзæхоты Ларисæ æмæ Тменаты Алексей. Сентябры мæйы Цхинвалы бирæпрофилон колледжы ахуыргæнджыты иу къорд стажировкæ рацыдыдысты горæт Пятигорскы «Сервис, туризм æмæ дизайн»-ы институты базæйыл», – радзырдта Къæбулты Заирæ.

Уый фæстæ та, 25 декабры Хуссар Ирыстоны скъолаты ахуыргæнджытæн ацы проекты фæлгæтты дунеон педагогон форум  «Русский язык как фундаментальная основа единства образовательного пространства», зæгъгæ, ауагътой Цæгат Ирыстон-Аланийы Квалификаци бæрзонд-дæргæнæн институты авд специалисты, уыцы нымæцы ацы институты ректор Людмила Исакова æмæ дыууæ проректоры – зонады хайы фæдыл проректор ЧшиатыТатьянæ æмæ ахуыры хайы фæдыл проректор Дзæхоты Ларисæ, ацы институты гуманитарон зонæдты кафедрæйы сæргълæууæг Тменаты Алексей æмæ афтæ дарддæр. Форум уагъд æрцыд Анахарсисы номыл республикон библиотекæйы конференц-залы. Уырдæм уыйбæрц ахуыргæнджытæ æрбацыд æмæ дзы алкæйы бынат дæр нæ фæцис. Хуссар Ирыстоны фарсырдыгæй та форумы куысты хайад райстой РХИ-ы Ахуырад æмæ зонады министр Гасситы Натали, ацы министрады цур квалификаци бæрзонддæргæнæн институты директор Къæбулты Заирæ æмæ республикæйы скъолаты уырыссаг æвзаг æмæ литературæйы ахуыргæнджытæ. Цæгат Ирыстон-Аланийы Ахуырады кусджыты квалификаци бæрзонддæргæнæн институты проректор, РЦИ-Аланийы ахуырады сгуыхт кусæг Дзæхоты Людмилæйы доклады темæ уыд:  «И мы сохраним тебя, русская речь, Великое русское слово». Тменаты Алексей форумы хайадисджытæн доклад бакаст ахæм темæйыл: «Продвижение и популяризация русского языка в сфере образования Республики Южная Осетия», зæгъгæ.

Банысан кæнын хъæуы уый дæр, æмæ курсон мадзæлтты рæстæджы нæ горæты 2-æм астæуккаг скъолайы базæйыл  5-11 кълæсты ахуырдзаутæн уагъд кæй æрцыд олимпиадæ уырыссаг æвзагæй. Йæ уæлахиздзауты Людмила Исакова схорзæхджын кодта зынаргъ лæвæрттæй æмæ сæ ахуыргæнджыты та – æхцайы премитæй. Уымæй дарддæр ма уыдон чингуытæ балæвар кодтой гимнази «Альбион»-ы ахуырдзау, Мæскуыйы уырыссаг æвзаджы конкурсы уæлахиздзау Цхуырбаты Марияйæн. Афтæ ма схорзæхджын кодтой Цхинвалы 1-æм астæуккаг скъолайы ахуырдзау, филологийы къабазы Сывæллæтты сфæлдыстады галуаны уагъдцæуæг «Шаг в науку»-йы конференцийы уæлахиздзау Сидорова Аленайы æмæ йæ ахуыргæнæг Халиева Иринæйы.

Къæбулты Заирæ ма куыд банысан кодта, уымæ гæсгæ Цæгат Кавказы Федералон университеты æмæ РХИ-йы Ахуырады министрад æрмæст курсытыл не ‘рлæудзысты. Къухтæ фыст æрцыдысты æмгуыстады тыххæй къорд документыл. Ис сын æмархайды фæндагон картæ. Университет цæттæ у хуссарирыстойнаг абитуриентты магистратурæмæ бацæттæ кæнынмæ æмæ сæ диссертацитæ бахъахъхъæнынæн баххуыс кæнынмæ. Уый ма куыд банысан кодта, уымæ гæсгæ РХИ-йы Ахуырад æмæ зонады министрады куырдиатмæ гæсгæ, Хуссар Ирыстоны скъолайы кары агъоммæйы уагдæтты ахуыргæнджытæн курсытæ уагъд  æрцæудзысты ацы азы.

Банысан кæнын ма хъæуы уый дæр, æмæ курсытæ рацæуæг ахуыргæнджытæн лæвæрд кæй æрцыдысты бæлвырдгæнæнтæ æмæ форумы хайадисджытæн та  – сертификаттæ.

Джиоты Екатеринæ