Централон æвзарæн къамис райдыдта дæттын æвдæм æрсидт Парламентмæ депутаттæм кандидатты бæлвырдгæнæнтæ. Бæрæг куыд у, афтæмæй Централон æвзарæн къамисмæ фыццаг йæ документтæ балæвæрдта политикон парти «Иугонд Ирыстон» æмæ регистраци дæр фыццаг уый æрцыд.
Уый фæстиуæгæн сабаты Централон æвзарæн къамисы минæвар Цхуырбаты Маринæ депутаттæм кандидаты бæлвырдгæнæн цытджын æгъдауæй радта политикон парти «Иугонд Ирыстоны» лидер Тадтаты Алан æмæ ныры Парламенты депутат Касаты Ацæмæзæн.
Бæрæг куыд у, афтæмæй политикон парти «Иугонд Ирыстон»-ы уæнгтæй депутаттæм кандидатты республикон номхыгъды ис 18 адæймаджы, уыдон иууылдæр æрцыдысты регистраци æмæ сын сæ кандидатон бæлвырдгæнæнтæ, Конституцион закъон бахынцгæйæ, Цхуырбаты Маринæ радта партийы лидермæ.
Кандидаты бæлвырдгæнæнимæ иумæ партийы лидер райста политикон парти «Иугонд Ирыстон»-æй кандидатты республикон партийы номхыгъды ресгистрацийы тыххæй уынаффæ дæр.
Цхуырбаты Маринæ куыд банысан кодта, афтæмæй уыдонæн ныр бар ис райдайой сæ агитацион процесс, уыцы нымæцы агитацион баннертæ бакæнынæн дæр.
Тадтаты Алан арфæйы ныхæстæ загъта Плиты Беллæйы сæргълæудæй Централон æв-зарæн къамисы уæнгтæн, оперативон куыст кæй кæнынц æмæ документтæ бæрæг кæныныл цы фыдæбон бакодтой, æппæт уыдæтты тыххæй. Дарддæр дæр сабыр, æнтыстджын куыст цы кæной, загъта сын уыцы фæндиæгтæ. Йæ ныхæстæм гæсгæ, йæ ныфс ис, æвзæрстытæ конструктивонæй кæй ацæудзысты, уымæй.
Уый ма арфæйы ныхæстæ загъта, парламентон æвзæрс-тыты хайад чи хъуамæ райса, æппæт уыцы кандидаттæн дæр.
Цхуырбаты Маринæ куыд бамбарын кодта, афтæмæй «Иугонд Ирыстон»-æй дарддæр ма ис иумандатон æвзарæн округтæй кандидатты номхыгъд дæр, уыцы кандидаттæй алчи дæр Централон æвзарæн къамисмæ хъуамæ æрбавдиса, сæ æвзарæн округты цы къухфысттæ æрæмбырд кæной, уыцы номхыгъдтæ.
«Къухфыстты гæххæттытæ куы æрбадæттой, уæд Централон æвзарæн къамис 14 боны æмгъуыдмæ хъуамæ сахуыр кæна уыцы гæххæттыты æмæ уый фæстæ райса уынаффæ, регистраци сæ чи æрцæудзæн, уыдоны тыххæй», – банысан кодта Централон æвзарæн къамисы минæвар æмæ ма йæ ныхасмæ бафтыдта, зæгъгæ, регистраци куы æрцæуой, уыцы бонæй кандидаттæн сæ бон у райдайын агитацион куыст. Телеуынынады, радио æмæ газетты фæрстыл та агитацион архайд райдайдзысты, æвзæрстыты бонмæ ма 20 боны куы хъæуа, уæд, ома 20 майæ.
ОСИАТЫ Индирæ
Comments are closed, but trackbacks and pingbacks are open.