Æхсæнхицауадон къамисы радон рабадтæй
19 апрелы Цхинвалы уагъд æрцыд Уæрæсейы Федерацийы æмæ Республикæ Хуссар Ирыстоны ‘хсæн социалон-экономикон æмгуыстады фæдыл Æхсæнхица-уадон къамисы радон, дыууынæм рабадт .
Къамисы куысты хайад райсынмæ республикæмæ æрцыд уæрæсейаг делегаци, йæ сæргъ УФ-йы Хицауады Сæрдары хæдивæг Витали Мутко, афтæмæй. Рабадты сæйраг фарст уыд 2020-2022 азты Инвестпрограммæйы фæлгæтты финанскæнынады структурæ æмæ мадзæлттæ сфидар кæнын.
Фидæны Инвестпрограммæмæ хаст æрцыдысты республикæйы райрæзты приоритетон фæдыздæхтытæ, кæцытæ баст сты социалон объекттæ, фæндæгты, инженерон хызæгты арæзтад, экономикæйы реалон секторы рæзтимæ.
Хуссар Ирыстон æмæ Уæрæсейы Федерацийы æхсæн Æхсæнхицауадон къамис йæ куыст кæны 2010 азæй фæстæмæ. Рабадтытæ уагъд æрцæуынц аз дыууæ хатты, Мæскуы æмæ Цхинвалы.
Рабадты рæстæджы Витали Мутко бузныджы ныхæстæ загъта Хуссар Ирыстоны фарсæй Æхсæнхицауадон къамисы уæнгтæн æмæ сæрмагондæй та, республикæйы сæргълæууæг Бибылты Анатолийæн. «Мах райгондæй баззадыстæм 2018-2019 азты Инвестпрограммæйы фæлгæтты арæзт цы социалон объекттæ æрцыд, уыдонæй. Медицинон уагдæттæ ифтонг æрцыдысты нырыккондæр ифтонггæрзтæй. Уыдон æнæмæнг дзуапп дæтдзысты сæ нысанæн æмæ ныр уæхимæ хос цæудзæнис рынчынтæн. Æхсызгон мын у, кæй уæм фæзындзæнис гуырæн хæдзар дæр. Рынчындоны цы исæн, операцион интенсивон терапийы хайадтæ ис, уыдон сты нырыккон æмæ ифтонг. Сывæллæтты рынчындон у иттæг фенддаг. Мæн уырны, цы медперсонал дзы кусы, уыдон кæй сты квалификациджын. Ног гуырæн хæдзар эксплуатацимæ лæвæрд куы æрцæуа, уæд дзы æмгъуыдæй раздæр гуырд сывæллæтты хайад кæй уыдзæн, уый дæр дзурæг у республикæйы размæцыдыл», – дзырдта УФ-йы Хицауады Сæрдары фыццаг хæдивæг.
Уæрæсейаг чиновникы зæрдæмæ иууыл тынгдæр фæцыд университеты комплекс. Ау-диторитæ æмæ спортивон зал уæрæх райдзаст кæй сты, уый банымадта хорзыл æмæ æмткæй райгондæй баззад, уæлдæр ахуыргæнæндонæн йæ куыст бирæпрофилон кæй у, уымæй.
2020-2022 азтæн Инвестпрограммæйы тыххæй дзургæйæ, Витали Мутко банысан кодта, Уæрæсейы Федераци кæй рахицæн кæндзæнис 4,5 миллиард сомы. Уырдæм хаст æрцæудзæн 52 мадзалы. Уыдон скъуыддзаг кæндзысты, ног инвестицион программæмæ цы инфраструктурæйы объекттæ хаст æрцæудзысты, уыдон. Сæ хъус дардзысты,ахсджиаг объекттæн сметæйон документтæ куыд арæзт цæуынц æмæ сын цас финанстæ хицæн цæуынц, уыцы фарстатæм. Мах, зæгъгæ, иумæ бакæнын хъæуы стыр куыст.
Республикæйы сæргълæууæг Бибылты Анатоли куыд банысан кодта, афтæмæй цæуы ахсджиаг иумæйаг куыст Хуссар Ирыстон æмæ Уæрæсейы Федерацийы æхсæн Æмцæдисад æмæ интеграцийы фæдыл бадзырды реализацийыл. «Уæрæсеимæ интеграцион процесстæ æмæ æхсæнхицауадон ахастытæ сты стратегион приоритеттæ. Республикæ размæ цæуы Инвестпрограммæйы фæрцы, кæцыйы фæлгæтты арæзт æмæ цалцæг æрцыдысты социалон æмæ культурон нысаниуæджы, афтæ ма инженерон æмæ фæндагон инфраструктурæйы объекттæ. Уый æвæрццагæй бандæвта Хуссар Ирыстоны уавæрыл, уынгты хæрзарæзтад бындуронæй фæивта. Инвестпрограмфмæ 2018-2019 азтæн æххæст æрцыд 100 процентæй. Арæзтадон-цалцæггæнæн процесс нæ уæрæсейаг æфсымæрты руаджы дарддæр кæны. Финанскæнынад цæуы æмгъуыдтæ нæ фехалгæйæ.
Уымæ гæсгæ мах аразджытæм æнхъæлмæ кæсæм гъæдджын куыстмæ. Объекттæ та хъуамæ эксплуатацимæ лæвæрд цæуой снысангонд æмгъуыдтæм. 2020-2022 азты Инвестицион програм-мæйы нывæзты ма ис экономикæйы реалон секторы проекттæ дæр. Уыдонæн æххуыс цæудзæн паддзахадон бюджетæй дæр, цæмæй хæрзвадат уавæрты кусой», – дзырдта Бибылты Анатоли.
Ууыл Æхсæнхицауадон къамисы рабадтæн йæ официалон хай фæцис æмæ дыууæ фарсы æмсæрдæрттæ Витали Мутко æмæ Пухаты Эрик сæ къухтæ æрфыстой рабадты суагъæйыл.
Уый фæстæ Уæрæсейы Федерацийы Хицауады Сæрдары хæдивæг фехъусын кодта, йемæ кæй æрхаста, советон дуджы 1967 æмæ 1972 азты Хуссар Ирыстоны автономон область хæдзарадон æмæ культурон арæзтады цы хорзæхтæ райста, уыдон – Ленины орден æмæ Адæмты Хæлардзинады орден. Хорзæхты радта Бибылты Анатолимæ.
«Сымах сæрыстыр хъуамæ уат уæ фыдæлтæй. 1940 æмæ 1970 азты уæ сæудæджерады рæзт уыд 20 хатты бæрзонддæр. Сымахмæ куыстой заводтæ, фабриктæ. Æнтыстджынæй уæм рæзт хъæуонхæдзарад. Куыстуарзаг æмæ уæм нысанмæздæхт адæм ис. Æз стыр райзæрдæимæ æрхастон ацы хорзæхтæ, кæцыты аккаг сты уæ хистæр фæлтæр. Мæ зæрдæ уын зæгъы нырæй фæстæмæ дæр ахæм æнтыстытæ», – дзырдта Витали Мутко.
Бибылты Анатоли банысан кодта, хорзæхтæ лæвæрд кæй æрцæудзысты Национ музеймæ.
УАЗÆГТЫ Марфа
Comments are closed, but trackbacks and pingbacks are open.