Бибылты Анатоли раарфæ кодта Республикæ Хуссар Ирыстоны Паддзахадон æдасдзинады комитеты кусджытæн Æдасдзинады органты кусæджы боны цытæн.
Президент фембæлд Паддзахадон æдасдзинады комитеты разамынад æмæ рæнхъон скондимæ ведомствойы.
Мадзалы хайад райстой РХИ-йы Æддагон развæдсгæрсты службæйы разамонæг Уарзиаты Алексей, РХИ-йы Хисæрмагонд паддзахадон службæйы къухдариуæггæнæг Андрей Захарченко, РХИ-йы УФ-йы Æдасдзинады федералон службæйы арæнгæрон управленийы хистæр Владимир Шемелинин, УФ-йы Æдасдзинады федералон службæйы минæвар Евгений Рогозин.
Республикæ Хуссар Ирыстоны Паддзахадон æдасдзинады комитеты сæрдар Олег Ширан йæ раныхасы банысан кодта, зæгъгæ, бирæ азты дæргъы бæрзонд профессионализм æмæ æнувыддзинад æвдисгæйæ, спецслужбæты кусджытæ ифтонг кæнынц паддзахад æмæ йе ‘мбæстæгты æдасдзинад, суверенитет æмæ территориалон æнæхъæндзинад.
Бибылты Анатоли раарфæ кодта, паддзахадон æдасдзинадæн дзуапп чи дæттынц, æппæт уыцы ведомствотæн æмæ банысан кодта, зæгъгæ, паддзахадон æдасдзинады органты алы кусæгæй дæр домдæуы бæрзонд профессионализм, аналитикон æвзыгъддзинæдтæ æмæ уыцы стыр куыст æххæст кæнын, кæцымæ хауынц контрразвæдсгарæн æмæ развæдсгарæн архайд ифтонг кæнын, антитеррористон мадзæлттæ, экономикон æдасдзинад ифтонг кæнын, афтæ ма информацион æдасдзинады тыххæй мадзæлттæ уадзын.
Президент сæрмагондæй банысан кодта Паддзахадон æдасдзинады комитеты куысты ахæм здæхт, куыд паддзахадон арæнтæ хъахъхъæнын.
«Мæн фæнды стыр бузныг зæгъын Республикæ Хуссар Ирыстоны Арæнгæрон службæйæн. 2019 азы Гуырдзыстоны ‘рдыгæй провокаци куы уыд, Хуссар Ирыстоны территорийыл пост куы сæвæрдтой, уæд растдæр Арæнгæрон службæ бацыд республикæйы арæны ацы фадыгмæ, цыран раздæр мах нæ уыдыстæм», – загъта Президент.
Бибылты Анатоли бузныджы ныхæстæ загъта паддзахадон æдасдзинады ветерантæн, кæцытæ сæхи аккагæй равдыстой гуырдзыйы агрессийы рæстæджы æмæ аиуварс кодтой Хуссар Ирыстоны территорийыл къорд теракты. Уый ма банысан кодта Уæрæсейы Федерацийы Æдасдзинады Федералон службæимæ æмархайды æмвæзад, кæцыйы руаджы скъуыддзаг цæуынц бирæ хæстæ.
Президент банысан кодта, республикæ абон дæр кæй цæры Гуырдзыстоны ‘рдыгæй æртхъирæнтæ æмæ провокациты уавæры.
«Мæн уырны, уыцы æртхъирæнтæ кæй тынгдæр кæндзысты, Гуырдзыстон не сразы уыдзæн, Хуссар Ирыстон хæдбар субъект кæй у, ууыл. Бæрæг æндыгъддзинад, æнæдызæрдыгæй, уыдзæн 2022 азы апрелы Республикæ Хуссар Ирыстоны Президенты æвзæрстытæм хæстæгдæр рæстæджы. Фæлæ мæ ныфс ис, цы æртхъирæнтæ уой гæнæн, уыдонæн анализ кæй араздзысты паддзахадон æдасдзинады комитеты, æндæр службæты, цæмæй фæтк æмæ æдасдзинад уа Хуссар Ирыстоны террито-рийыл», – загъта Бибылты Анатоли.
Уый стыр аргъ скодта Паддзахадон æдасдзинады комитеты сæрдары архайдæн. Президенты Барамындæй уымæн лæвæрд æрцыд радон æфсæддон цин – инæлар-лейтенант.
РХИ-йы Паддзахадон æдасдзинады комитеты кусджытæн раарфæ кодтой сæ уæрæсейаг коллегæтæ. Уæрæсейы Æдасдзинады федералон службæйы директор Александр Бортниковы номæй арфæ бакаст РХИ-йы УФ-йы Æдасдзинады службæйы официалон минæвар Евгений Рагозин.
Comments are closed, but trackbacks and pingbacks are open.