12-æм майы нæ горæты 6-æм астæуккаг скъолайы актон залмæ радон хатт æрбамбырд бирæ адæм. Уым уагъд æрцыд поэзийы изæр ирон, уырыссаг æмæ англисаг æвзæгтыл. Мадзал бацæттæ кодтой ацы скъолайы англисаг æвзаджы ахуыргæнджытæ Гæззаты Юринæ, Бететы Юля, Гæбæраты Фатимæ æмæ Къусраты Иринæ.
Поэзийы изæрмæ æрбацыдысты РХИ-йы Ахуырад æмæ зонады министрады минæвæрттæ: Будзиты Замирæ, Зассеты Анжелæ, Къæбулты Заирæ, Коцты Ланæ, ахуыргæнджытæ Бедойты Элеонорæйы сæргълæудæй, скъоладзауты ныййарджытæ, нæ горæты скъолаты ахуыргæнджытæ.
Залмæ бахизгæйæ, адæймаджы цæст уайтагъд схæцыд сценæйы размæ æвæрд судзгæ цырæгътыл. Уыдон, цыма Казаны 175-æм гимназы трагедийы рæстæджы чи бабын, уыцы рæзгæ удты тæригъæдыл хъынцъым кодтой, уыйау сыгъдысты цæссыгкалгæйæ.
Уæдмæ сценæмæ рахызтысты мадзаламонджытæ 9-æм æмæ 8-æм кълæсты ахуырдзаутæ Бахъаты Олеся æмæ Битеты Алан. Уыдон æрæмбырдуæвджытæм бахатыдысты, цæмæй, иу уысм æмырæй алæугæйæ, ссарой Казаны гимназы трагедийы амæттæгты рухс нæмттæ. Уый фæстæ райдыдта мадзал.
«Уæ бонтæ хорз, зынаргъ уазджытæ. Ныфс нæ ис, поэзиимæ баст чи у, нæ абоны уыцы мадзалæй æхцондзинад кæй райсдзыстут, уымæй», – дзырдта мадзаламонæг Бахъаты Олеся англисаг æвзагыл. Уый фæстæ йын йæ ныхæстæ уырыссаг æвзагмæ тæлмац кодта иннæ мадзаламонæг Битеты Алан. Афтæ уыд æнæхъæн мадзалы дæргъы.
Райдианы ахуырдзаутæ æрдзырдтой зынгæ англисаг фыссæг Уильям Шекспиры цардвæндаг æмæ сфæлдыстады тыххæй нырма англисаг æвзагыл æмæ уый фæстæ та – уырыссаг æвзагыл. Бакастысты йын йæ уацмыстæй скъуыддзæгтæ англисаг, уырыссаг æмæ ирон æвзæгтыл. Зарæг кинофильм «Ромео и Джульетта»-йæ тынг хорз сæххæст кодта 7-æм къласы ахуыргæнинаг Гуыбеты Виктория.
Уалынмæ экраныл фæзынд Къостайы, нæхи Къостайы сурæт, йæ райгуырæн Нары комы пейзаж, йæ хæдзар-музей, мæсгуытæ æмæ а.д. Сывæллæттæ англисаг æмæ уырыссаг æвзæгтыл æрдзырдтой Къостайы цардвæндаг æмæ сфæлдыстадыл. Поэт йæ сæйраг хæсыл кæй нымадта Райгуырæн бæстæйæн лæггад кæнын. Йе сфæлдыстад кæй у мидисджын, аив, нывæфтыд æмæ зæрдæмæхъаргæ. Йæ алы уацмыс дæр йедзаг кæй у Ирыстоныл сагъæстæй. Англисаг, ирон æмæ уырыссаг æвзæгтыл бакастысты Къостайы «Ныстуан». Кæстæркъласонтæ та – «Гино, гино, гис!». Скъоладзаутæ дзырдтой, Къостайы сфæлдыстад тæлмац кæй æрцыд дунейы 108 æвзæгтæм. Экраныл равдыстой, æн-дæр нациты минæвæрттæ сæхи æвзæгтыл Къостайы æмдзæвгæтæ куыд кастысты, уый, æмæ та адæймаджы зæрдæ сæрыстырдзинады æнкъарæнтæй байдзаг. Уымæн æмæ ирон адæмы дуне базыдта æмæ зоны Къостайы хуызæн гениты фæрцы.
Экраныл фæзынд стыр уырыссаг поэт Александр Пушкины ныв. Скъоладзаутæ йын æрдзырдтой йæ цардвæндаг æмæ сфæлдыстадыл. Æртæ æвзагыл бакастысты Пушкины «Евгений Онегин»-æй скъуыддзæгтæ, равдыстой дзы сценкæтæ дæр, кæцытæ рауадысты тынг аив.
Уый фæстæ та ахуыргæнинæгтæ англисаг, уырыссаг æмæ ирон æвзæгтыл бакастысты Александр Блок, Чарльз Маккей, Роберт Бернс æмæ Редьярд Киплингы уацмыстæ, æрдзырдтой сын сæ цардвæндаг æмæ сфæлдыстадыл.
Гуыбеты Виктория англисаг æвзагыл зарæг «Красная, красная роза» куы æххæст кодта, уыцы рæстæджы хистæркъласон лæппутæ сценæйæ рахызтысты залмæ æмæ сырх уардитæ балæвар кодтой сылгоймæгтæн. Ацы ныв рауад рæсугъд æмæ зæрдæмæхъаргæ. Мадзалы кæрон Гуыбеты Виктория æмæ иннæ хайадисджытæ иумæ сæххæст кодтой зарæг «Мы – мир, мы – дети».
Уый фæстæ æрæмбырдуæвджытæн арфæйы ныхæстæ загъта 6-æм астæуккаг скъолайы директор Бедойты Элеонорæ. Бузныджы ныхæстæ загъта мадзалы организатортæ æмæ хайадисджытæн. «Стыр бузныг – сымахæн. Нæ хъомылгæнинæгтæ сæ зонындзинæдтæ равдыстой куыд англисаг, афтæ ирон æмæ уырыссаг æвзæгтæй дæр. Тынг хорз дзурынц англисаг æвзагыл. Уый у нæ уагдоны англисаг æвзаджы ахуыргæнджыты афæдзы хорз куысты фæрцы. Ацы мадзалмæ гæсгæ хатдзæгтæ саразæн ис сæ хорз куыстæн. Æмæ уыцы куыстæн та аргъ кæнын хъæуы. Ноджыдæр уын зæгъын стыр бузныг».
Йæ коллегæтæ – мадзалы организатортæ æмæ хайадисджыты адресыл хъарм æмæ æппæлæн ныхæстæ нæ бавгъау кодта ацы скъолайы ирон æвзаг æмæ литературæйы ахуыргæнæг Дыгъуызты Лианæ дæр. Уый банысан кодта, зæгъгæ, «нæ хъомылгæнинæгтæ сты тынг курдиатджын, кæцытæ уыцы иурæстæджы сæ зонындзинæдтæ равдыстой æртæ æвзагæй. Фæзæгъынц, зæгъгæ, дам, цал æвзаджы зонай, уал лæджы, дам, дæ æмæ уый раст у. Ацы æртæ æвзаджы сæ æнæмæнгæйдæр бахъæудзысты сæ дарддæры царды. Стыр æхцондзинад райстон мадзалæй».
«Алцы дæр уыд тынг хорз, рæстæг куыд ацыд, уый хатгæ дæр нæ фæкодтам, афтæ зæрдæрайæ бакастыстæм ахуыргæнинæгты ралæудтытæм. Бæдæйнаг сты йæ организатортæ дæр æмæ йæ хайадисджытæ дæр», – банысан кодта уырыссаг æвзаг æмæ литературæйы ахуыргæнæг Инна Зубко.
Банысан кæнын хъæуы уый дæр, æмæ мадзалы организатортæ стыр куыст кæй бакодтой сæ ахуыргæнинæгтимæ. Уый тыххæй сын зæгъын хъæуы уæлдай бузныджы ныхæстæ. Уымæн æмæ ахæм мадзал иу æвзагыл сорганизаци кæныныл дæр бахъæуы стыр тыхтæ æмæ хъарутæ бахардз кæнын æмæ ацы поэзийы изæры та сывæллæттæ сæ арæхстдзинад æмæ зонындзинæдтæ равдыстой уыцы иурæстæджы æртæ æвзагæй дæр. Уымæй дæр æртæ æвзагæй дæр равдыстой æмбæлон æмæ хорз зонындзинæдтæ.
Æрæмбырдуæвджытæ стыр æхцондзинад райстой поэзийы изæрæй æмæ бузны-джы ныхæстæ дзырдтой йæ организатортæн.
Джиоты Екатерина
Comments are closed, but trackbacks and pingbacks are open.