Журнал «Фидиуæг» Турчы бæстæйы
Æрæджы Турчы Хуссар Ирыстоны минæвар Хоситы Бурхан журнал «Фидиуæг»-ы редактор Годжыцаты Неллийæн фехъусын кодта, зæгъгæ, йе ‘мбæстаг ирæттæ стыр зæрдиагæй рафыстой хуссарирыстойнаг журнал «Фидиуæг». Ныридæгæн ирон журналмæ чи бацымыдис кодта, уыдон сты 27 бинонтæ. Уыдон зæрдиагæй æнхъæлмæ кæсынц, ирон аив дзырд сæм кæд фæхæццæ уыдзæнис, уымæ.
Сентябры мæйы Турчы цæрæг ирæттæй Цхинвалмæ республикæйы бæрæгбоны сæраппонд фæуазæг сты цалдæрæй Хоситы Бурханы сæргълæудæй æмæ, уавæрæй спайда кæнгæйæ, æввахсдæр базонгæ сты ирон мыхуыры органты коллективтимæ. Хъуыддагон ныхас кодтой газет «Хурзæрин» æмæ журнал «Фидиуæг»-ы разамынадимæ æмæ уæд сæ хъуыды раргом кодтой, зæгъгæ, ныртæккæ Турчы цæрæг ирæттæн кæй ис мадæлон æвзаг бахъахъхъæныны проблемæ æмæ тырнынц, цæмæй æрбангомдæр уой Ирыстоны цæрæг адæмимæ сæ фыдæлты рæсугъд æгъдæуттæ, традицитæ, культурæ æмæ æвзаг бахъахъхъæныны сæраппонд. Сæ фембæлдтыты рæстæджы баныхас кодтой, цæмæй сорганизаци кæной видеохид Цхинвал æмæ Турчы горæтты цæрæг ирæттимæ æмæ сын æнтысгæ дæр бакодта. Ацы фембæлды Годжыцаты Нелли рæгъмæ рахаста, цæмæйдæриддæр журнал «Фидиуæг» хæццæ кæна Туркмæ æмæ уым ирæттæ зонгæ кæной Ирыстоны хабæрттимæ дæр æмæ уыимæ иумæ журналы куы кæсой, уæд се ‘взаг дæр нæ рох кæндзысты.
Годжыцаты Нелли нын куыд радзырдта, уымæ гæсгæ ныридæгæн «Фидиуæг»-ы рафыстой æрдæг азæн æмæ посты æххуысæй бынатмæ фæхæццæ кæндзысты æртæ номыры иумæ. «Ацы хъуыддагыл мах архайæм чысыл рæстæг. Хоситы Бурхан нын баныфсæвæрдта, иу ссæдз адæймагæн кæй рафыссын кæндзæн ирон журнал. Турчы цæрæг ирæтты ‘хсæн ис, сфæлдыстадон фæндагыл чи лæууы, ахæм адæймæгтæ æмæ æнхъæлмæ кæсæм уыдон æрмæджытæм дæр. Уымæй дарддæр ма нын Хоситы Бурхан баныфсæвæрдта, кæй æртымбыл кæндзæн æрмæджытæ Турчы бæстæйы номдзыд адæймæгты тыххæй зонæнтæ æмæ уыдон дæр хъуамæ ныффысса, сæ къамтæ сын æрæмбырд кæна, цæмæй сæ мыхуыры рауадзæм æмæ сæ бынæттон адæм дæр зоной. Ацы хъуыддаг дæр у ахсджиаг, фыццаджыдæр, кæй æрбангомдæр уыдзыстæм æмæ кæрæдзиимæ кæй зонгæ кæндзыстæм, уымæй. Фадат дæтты, цæмæй Турчы цæрæг ирæттимæ, æхсæнадимæ нæ бастдзинæдтæ сфидар кæнæм. Нæхи равдисыны тыххæй нæ. Уыдонæн сæ зæрдæмæ афтæ тынг хъары, ам цыдæриддæр цæуы хорзæй æмæ æвзæрæй, æмæ нæ хъæуы кæрæдзийы фарсмæ æрбалæууын. Ацы хъуыддаг сæхицæй рацыдис æмæ сын сæ хъарм ахаст мах æнæрахатгæ не стæм. Ирон æвзаг æмæ культурæйы райрæзтыл Турчы бæстæйы чи кусы, ахæм активисттæ ис се ‘хсæн æмæ сыл æнæмæнг хъæуы фыссын. Журналы ныртæккæ чи рафыста, уыдон арæхсынц кæсын кириллицæйы шрифтæй. Фæлæ сæ фылдæр сты, æрмæст латинаг шрифтыл чи зоны кæсын, ахæмтæ. Уымæ гæсгæ архайдзыстæм алы амæлттæй дæр, цæмæйдæриддæр «Фидиуæг»-ы номыртæ ракæнæм латинаг шрифтмæ æмæ сæ æрвитæм электрон хуызы. Чизоны, Турчы цæрæг ирæттæй дзæвгар адæм куы рафыссой журналы, уæд æй латинаг шрифтыл дæр мыхуыр кæнæм. Бæрæг бæлвырд нæу, фæлæ зæгъынц афтæ, зæгъгæ, ныридæгæн Турчы цæрынц 40 мин ирон адæймагæй фылдæр. Уыдонæй, зæгъæм, иу мин адæймаджы куы рафыссой ирон журналы, уæд нæ хæс уыдзæн, цæмæй йæ латинаг графикæйыл дæр саразæм. Фыццаг къахдзæфтæ аразæм æмæ мæ уырны, дарддæр нын фылдæр æнтыстытæ кæй уыдзæн, стæй Турчы цæрæг не ‘мтуг ирæттæ фылдæрæй кæй рафысдзысты ирон журнал».
ЦХУЫРБАТЫ Ларисæ
