26 июны Республикæ Хуссар Ирыстоны Президент Бибылты Анатоли фембæлд республикæйы фæсивæдон æхсæнадон организаци «Иугонд Ирыстон»-ы активимæ. Фембæлды райдиан паддзахады сæргълæууæг Фæсивæды боны цытæн раарфæ кодта æрæмбырдуæвджытæн. Уый фæстæ мæсæллæйы ныхæстæ загъта стыр ахуыргонд, фыссæг, æхсæнадон архайæг, Ирыстоны зындгонд фырт, Стыр Фыдыбæстæйон хæсты ветеран Джусойты Нафийы амæлæты фæстиуæгæн æмæ иу минут æдзæмæй алæугæйæ ссардтой ахуыргонды рухс ном.
Дарддæр Бибылты Анатоли бузныджы ныхæстæ загъта фæсивæдæн сæ фарс-хæцынады æмæ йыл кæй баууæндыдысты, сæ æмбæстагон позицийы æмæ сæ бæстæйы хъысмæтмæ куыдфæндыйы цæстæй кæй нæ кæсынц, уый тыххæй æмæ банысан кодта, райгонд сæ кæй у, уый.
«Æз райгонд дæн æппæтæй дæр æмæ сымахæй алкæмæй дæр. Райгонд дæн, ахæм фæсивæд нæм кæй ис, уый тыххæй. Кæй зæгъын æй хъæуы, Ирыстоны фæсивæд иууылдæр хорз сты, уый фæстиуæгæн мах æппæтдæр хъуамæ аразæм, цæмæй нæ фæсивæд æмбарой, сæ Райгуырæн бæстæйы кæй хъæуынц. Уымæн æмæ уыдоныл баст у Ирыстоны сомбон. Мах нæ фæсивæдимæ иумæ, æппæт къахдзæфтæ дæр хъуамæ аразæм нæ бæстæйы æмæ æхсæнады размæдзыды тыххæй. Тагъд рæстæджы мын фембæлд уыдзæн республикæйы æппæт фæсивæдимæ. Уый уæ инициативæ уыд, æмæ йæ тагъд сæххæст кæндзынæн», – загъта Бибылты Анатоли.
Йæ рады республикæйы фæсивæдон æхсæнадон организаци «Иугонд Ирыстон»-ы сæрдары хæдивæг Бежанты Æхсар дæр бузныджы ныхæстæ загъта Президентæн йæ фарсхæцынады тыххæй.
«Бузныг, фæсивæды фарс кæй хæцыс, сæйраджыдæр, республикæйы фæсивæдон æхсæнадон организаци «Иугонд Ирыстон»-ы фарсмæ кæй лæууыс æмæ сын кæй æххуыс кæныс, уый тыххæй. Фæсивæдон организаци «Иугонд Ирыстон» арæзт куы æрцыд, уæдæй фæстæмæ æнкъары дæ фарсхæцынад æмæ кæддæриддæр хæцыд дæ политикон цæстæнгасы фарс. Мах архайæм Паддзахад Аланийы фæсивæды хæрзиуæгæн кусыныл æмæ нæ ныфс ис, не ‘нтыстытæ дын æхсызгон кæй сты æмæ дарддæр дæр кæй уыдзысты, уымæй», – загъта фæсивæдон æхсæнадон организаци «Иугонд Ирыстон»-ы сæрдары хæдивæг Бежанты Æхсар.
Фембæлды рæстæджы æрæмбырд-уæвджытæ алыгъуызон фарстатæ лæвæрдтой Бибылты Анатолимæ. Сæй-раджыдæр фæсивæды цымыдис кодта æвзæнгты ‘хсæн, уыцы нымæцы РХИ-йы паддзахадон университет чи фæцис, уыдоны æмæ ма Уæрæсейы уæлдæр ахуыргæнæндæтты чи ахуыр кодта, уыдоны ‘хсæн æгуыстдзинады фарст, афтæ ма курдиатджын æвзæнгты фарс-хæцынады проблемæ дæр.
Паддзахады сæргълæууæг куыд загъта, афтæмæй Ирыстон кæддæриддæр зындгонд уыд курдиатджын адæймæгтæй.
«Зонын æй, уæ организацийы курдиат-джын адæймæгтæ бирæ ис. Зонын æй, ис уæм аивады адæймæгтæ, кафджытæ, актертæ, нывгæнджытæ, спорты хуызтæй чемпионтæ, кæцытæ схызтысты стыр бæрзæндтæм, уый фæстиуæгæн, кæй зæгъын æй хъæуы, курдиатджын фæ-сивæды хъæуы фарсхæцынад. Курæг уæ дæн, цæмæй бакусат курдиатджын фисивæдæн баххуыс кæныны тыххæй программæйыл», – загъта Президент æмæ ма йæ ныхасмæ бафтыдта, зæгъгæ, инициативон фæсивæды æрдыгæй æн-хъæлмæ кæсы ног фæндæттæм, ног хъуыдытæм æмæ фæсивæды æххуысæй ис гæнæн Хуссар Ирыстоны рæзтæн.
«Нæ тых нæ иудзинады ис. Нæ республикæйы къухдариуæгады хъæуы уæ хъуыдытæ, сымах та – къухдариуæгады фарсхæцынад», – бахахх кодта Президент.
Фембæлды кæрон Бибылты Анатоли æхсæнадон организаци «Иугонд Ирыс-тон»-æн бакодта зæрдылдарæн лæвар.
Нæ уацх.
Comments are closed, but trackbacks and pingbacks are open.