Ивгъуыд къуыри Республикæ Хуссар Ирыстоны фæсивæдон организаци «Иугонд Алани»-йы уæнгтæ Коцты Михаилы сæргъ-лæудæй нæ республикæмæ æрхуыдтой сæ уæрæсейаг коллегæты – Æппæтуæрæсейаг æхсæнадон организаци «Молодая Гвардия Единой России»-йы минæвæртты, цæмæй сæ хæстæгдæр базонгæ кодтаиккой ирон адæмы культурæ, æгъдæуттæ æмæ традицитимæ. Уыимæ иумæ ма æрдзырдтой сæ дарддæры æмгуыстадыл, фидæны сæ цæуыл хъæудзæнис бакусын æмæ фæсивæды цавæр программæты руаджы æрбангом кæнын хъæуы, стæй æхсæнадон царды активон хайад исыны фарстытыл æрдзурын.
Фæсивæдон организаци «Иугонд Алани»-йы сæргълæууæг Коцты Михаил нын куыд фехъусын кодта, афтæмæй сæ уæрæсейаг уазджытæн бацæттæ кодтой сæрмагонд программæ. Се ‘рцыд баст уыд, нæ республикæйы Æхсардзинад æмæ адæмы иудзинады бон кæй нысан кодтам, уыимæ.
Хуссар Ирыстоны фæсивæдон организацийы минæвæрттæ сæ уазджытæн радзырдтой æмæ сæ базонгæ кодтой ацы бæрæгбоны историимæ, афтæ ма нæ паддзахиуæгад куыд æндидзыдта æмæ хæдбардзинадмæ куыд æрцыдыстæм, хуссарирыстойнæгтæн ацы бæрæгбон цы нысан кæны, æппæт уыцы ахсджиаг хъуыддæгтимæ. «Мæн, сæйраджыдæр, фæнды, цæмæй лæмбынæгдæр радзурæм, нæ уæрæсейаг коллегæтæн, цы уæззау фæндæгтыл цыдыстæм фæстаг 20 азы бæрц, стæй куыд цагъды кодтой нæ цардбæллон лæппутæ сæ райгуырæн зæххы сæрвæлтау, афтæ ма алкæцы ирон хæдзар, бинонтæ дæр цы уæззау дугæн бафæрæзтой æнæ рухс, æнæ дон æмæ æнæ газæй, уыдæттæ. Нæ адæм, уæндонæй кæрæдзийы фарсмæ æрлæугæйæ, куыд стох кодтой, цы стыр трагедитæ ныл сæмбæлд, уыдон мах радзырдтам фæсивæдон организацийы делегацийæн», – загъта Хуссар Ирыстоны политикон парти «Иугонд Алани»,-йы фæсивæдон хайады къухдариуæггæнæг Коцты Михаил.
Делегацийы уæнгты хорз суазæг кодтой хуссарирыстойнаг коллегæтæ, сорганизаци сын кодтой чысыл экскурси æмæ уый фæстæ дидинджытæ сæвæрдтой, 1991-1992 азты гуырдзиаг фашистты къухтæй Хуссар Ирыстоны хъахъхъæнджытæй æмæ сабыр адæмæй чи фæмард, уыдоны мемориалы раз нæ горæты 5-æм астæуккаг скъолайы кæрты. Дарддæр уазджытæ сæ фæндаг акодтой æмæ сын нæ горæты Шанхайы районы уырыссаг батальоны казармæтыл. Фысымтæ сын радзырдтой, 2008-æм азы фидауынгæнджытæ Хуссар Ирыстоны адæмы куыд хъахъхъæдтой, уый, зæгъгæ, гуырдзиаг фашисттæ сæ сæйраг хæсыл нымадтой ирон адæмы скуынæг кæнын æмæ нын нæ бæстæйæ «сыгъдæг быдыр» саразын.
Экскурсийы рæстæджы ма фæсивæд дидинтæ сæвæрдтой уырыссаг хъайтар Денис Ветчиновы цырты раз дæр. Ам дæр уазджытæн Коцты Михаил цыбыртæй æрдзырдта, уырыссаг салдат цы æгъдауæй фæмард æмæ цы хъайтардзинад равдыста, æппæт уыдæттæ.
***
Æппæтуæрæсейаг æхсæнадон организаци «Молодая Гвардия Единой России»-йы минæвæрттæн ма фембæлд уыдис Тыбылты Алыксандры номыл Хуссар Ирыстоны Паддзахадон университеты студенттимæ. Ардæм ма æрбацыдысты университеты ахуыргæнджытæ дæр. Студенттæн уæрæсейаг фæсивæдон организацийы минæвæртты æрцыды тыххæй радзырдта Коцты Михаил. «Молодая Гвардия»-йы Координацион советы сæрдар Денис Давыдов та æрдзырдта йæхи тыххæй, ахæм æрыгонæй кæй лæууы стыр организацийы сæргъ æмæ йын куыд бантыст, студент уæвгæйæ, бæрнон бынаты кусын, уый. Денис Давыдов студентæй тынг хорз ахуыр кодта æмæ активон хайад иста алыгъуызон фæсивæдон мадзæлтты. Уый студенттæм æрсидт, цæмæй уыдон дæр сæ рæстæг æнæхъуаджы ма хардз кæной æмæ аразой сæ хорз фидæн, уой кæддæриддæр хорз хъуыддæгты уæлхъус æмæ æххуыс кæной се ‘рыгон республикæйæн. Денис Давыдов ма студенттæн дæнцæгæн æрхаста не ‘мзæххон Цхуырбаты Аланæйы. Уый дæр у «Молодая Гвардия»-йы централон штабы кусæг, кæцы систа документалон киноныв «Не время для героизма», зæгъгæ, ахæм номимæ. «Аланæйы фæндыд бакусын. Уый æхсæнадон царды федта стыр хъуыддаг æмæ йæ фæндыд адæмы рæгъмæ рахæссын. Уый тыххæй йын баххуыс кодта нæ организаци дæр, æхцайы фæрæзтæ йæ бирæ хъуыд æмæ йын «нæ» нæ загътам. Киноныв рауад тынг цымыдисон æмæ уалдзæджы æвдыст æрцыд 71-æм æппæтадæмон кинофестивалы горæт Каннæйы. Сымахæн дæр уæ бон бирæ у, фæсивæд, æмæ кусут уæхиуыл. Абон саразæн цæмæн уа, уый райсоммæ ма ‘ргъæвут, уæд уын уыдзæнис æнтыстытæ дæр», – загъта Денис Давыдов.
Цхуырбаты Аланæ дæр студенттæн цыбыртæй радзырдта, ахæм æнтыстытæ йæ къухы куыд бафтыдысты, уыдæттæ æгæрон уарзон та йын у йæ фыдæлты зæхх Дзауы районы Хуымысæрты хъæу. Аланæ ма банысан кодта, зæгъгæ, хорз хъуыддаг у Хуссар Ирыстоны фæсивæдон организаци «Молодая Гвардия»-имæ кæй райстой сразыдзинад, уый æмæ нырæй фæстæмæ та æмархайд кæй кæндзысты æвзонг организацитæ, кæрæдзийæн фæлтæрддзинад дæттын æмæ фæсивæды æрбангом кæныны сæраппонд.
Кæронбæттæны ма студенттæ сæ фарстытæ лæвæрдтой уæрæсейаг фæсивæдон организацийы минæвармæ æмæ-иу райстой æмбæлон дзуаппытæ. «Сымах куыдфæндыйы цæстæй куы кæсат уæ равзаргæ профессимæ кæнæ хъуыддагмæ, уæд никуы уыдзыстут æнтыстджын. Цас бæрнджындæр уат уæ хъуыддаджы, уыйбæрц уын уыдзæнис фылдæр æнтыстытæ. Уый афтæ у бизнесы, спорты, æндæр къабæзты. Сымах ма хъуыды кæнут ууыл, æмæ та уын исчи исты радта, фæлæ аразут æмæ хъуыды кæнут хорз хъуыддæгтæ саразыныл. 2019-æм азмæ сфæнд кодтам стыр ахуырадон программæтæ ауадзын, кæцытæ ахъаз кæнынц фæсивæдæн сæ фæндтæ сæххæст кæнынæн. Тынг бирæ фæндтæ нæм ис æмæ кæд сымах дæр нæ фарсмæ æрбалæууат, уæд махæн тынг æхсызгон уыдзæнис сымахæн баххуыс кæнын», – загъта Денис Давыдов.
Студентон фæсивæд ацы фембæлдæй райстой стыр æхцондзинад, уымæн æмæ сын уæрæсейаг уазджытæ сæ фæндтæм æмæ ныфсытæм бафтыдтой ныфс. Чизоны сæ кæмæ цы хорз хъуыдытæ æмæ фæндтæ ис, ууыл ныр бæстонæй ахъуыды кæной æмæ Цхуырбаты Аланæйау уой цæвиттойнаг.
Цхуырбаты Ларисæ
Comments are closed, but trackbacks and pingbacks are open.