Зынгæ ирон ахуыргонд æмæ педагог, Стыр Фыдыбæстæйон хæсты хайадисæг Мамиты Гигайы 110 юбилейон аз банысан кæныны тыххæй ХИПУ-йы цы мадзал ауагъдæуыд, уырдæм æрбацыдысты университеты лектортæ, студенттæ, Гигайы хиуæттæ æмæ зонгæтæ.
Мадзал байгом кодта ирон литературæйы историйы кафедрæйы сæргълæууæг, профессор Плиты Гацыр. Уый банысан кодта, зæгъгæ, Гигайы чидæриддæр зыдта, уыдон æй бахъуыды кодтой хорз хистæр æмæ хъомылгæнæгæй.
Гига райгуырд æмæ схъомыл Къостайыхъæуы, астæуккаг скъола дæр каст фæцис уым. Уый фæстæ йæ ахуыр адарддæр кодта Цхинвалы хъæууон фæсивæды скъолайы. Фæстæдæр каст фæцис Цæгат Ирыстоны педагогон техникум æмæ куыста ахуыргæнæгæй. 1936 азы та Гига каст фæцис Цæгат Ирыстоны педагогон институт. Йæ ахуыр адарддæр кодта аспирантурæйы. Уыцы иу рæстæджы ирон ли-тературæйæ лекцитæ каст Дзæуджыхъæуы педагогон институты.
Гига хайад иста Стыр Фыдыбæстæйон хæсты. Æрыздæхт 1949 азы æмæ дарддæр кодта ахуыр-хъомыладон куыст. Бахъахъ-хъæдта кандидатон диссертаци æмæ йæ амæлæты бонмæ куыста Хуссар Ирыстоны паддзахадон педагогон институты.
Уый кодта сфæлдыстадон куыст дæр. Рауагъта æмдзæвгæты æмæ радзырдты æмбырдгæндтæ, афтæ ахуыргæнæн чингуытæ дæр. Фыста, сæйраджыдæр, сывæллæттæн. Цы чингуытæ сын рауагъта, уыдоны ирдæй зыны, иттæг хорз кæй зыдта сывæллоны миддуне æмæ сын уый фæрцы сæ зæрдæмæ æнцонæй ардта фæндаг.
Университеты ирон æвзаг æмæ æвзагзонынады кафедрæйы профессор Битарты Зоя та йæ раныхасы банысан кодта, зæгъгæ, ахæм мадзæлттæ уадзын у æнæмæнг-хъæуæг. Уымæй, зæгъгæ, æрыгон фæлтæртæн зонын кæнæм нæ ахуыргæндты, бæрзонд кæнæм нæ адæмы кад. Уыимæ ма Зоя æрдзырдта, Гига цахæм уыд йе ‘мкусджытæ, адæм æмæ студентты ‘хсæн, уый тыххæй дæр.
Ирон литературæйы историйы кафедрæйы профессор Хъазиты Мелитон та йæ раныхасы банысан кодта, зæгъгæ, Гигайы базыдтон, институтмæ бацæуыны тыххæй фæлварæнтæ куы лæвæрдтон, уæд.
Йæ ныхæстæм гæсгæ Гигайæн хъæздыг уыдысты йæ юмористон æнкъарæнтæ. Иу хатт дæр-иу æй, зæгъгæ, чи федта, кæимæ-иу аныхас кодта, уыдон-иу æй æнæмæнгдæр бахъуыды кодтой. Уый та, дам, уымæн, æмæ, дам-иу йæ хъуыдыджын ныхæсты алы хатт дæр разындысты йæ юмористон æнкъарæнтæ.
Йæ раныхасы Гигайы раздæры студенткæ Æлборты Эммæ та банысан кодта, зæгъгæ, цы лектортæ мын уыд, уыдонæй мын алкæмæ дæр уыд хъарм ахаст, фæлæ уыцы миниуджытæ фылдæр уыдысты Гигамæ. Уымæн æмæ, иннæ лектортæм абаргæйæ, уымæн йæ ахаст студенттæм уыдис цасдæрбæрцæй фæлмæндæр, æндæргъуызон. Æнцондæрæй, зæгъгæ, хъардтой нæ зæрдæтæм æмæ нын уымæй фадат арæзта йæ зæрдæмæ æнцон-дæрæй бахизынæн.
Уырыссаг филологи, журналистикæ æмæ фæсарæйнаг æвзæгты факультетты декан Биазырты Аллæ та банысан кодта, зæгъгæ, Гигайы æз базыдтон æрмæстдæр йæ фыстытæм гæсгæ. Уыдоны тыххæй та зæгъдзынæн уый, æмæ хъæздыг кæй сты хъомыладон æмæ эстетикон миниуджытæй. Йæ уацмыстæ амад сты зондамындтытыл, рæстæй цæрын, æгъдæуттæ ма рох кæныныл. Алкæцы дæр дзы, зæгъгæ, кæсæджы æфтауы раст хъуыдытыл.
Мадзалы ма раныхас кодтой 6-æм скъолайы ирон æвзаг æмæ литературæйы ахуыр-гæнæг Дыгъуызты Лианæ æмæ университеты историйы факультеты доцент Басаты Лев.
Уый фæстæ университеты студенттæ Цхуырбаты Оксанæ, Сиукъаты Ларисæ, Сиу-къаты Виктория, Тедеты Алисæ æмæ æн-дæртæ кастысты Гигайы фыст æмдзæвгæтæ.
Кæронбæттæны Мамиты Гигайы æввахс хион Мамиты Людæ раарфæ кодта, мадзал ауадзыны хъуыды кæмæ æрцыд, чи йæ бацæт-тæ кодта æмæ дзы хайад чи райста, уыдонæн.
ГÆЗЗАТЫ Иван
Comments are closed, but trackbacks and pingbacks are open.