Хуссар Ирыстоны Национ банг ацы ахуыры аз сфидар кодта стипендитæ ХИПУ-йы уырыссаг æмæ ирон филологийы хуыздæр студенттæн. Уый тыххæй Национ бангы сæргълæууæг Джиоты Жаннæ фехъусын кодта журнал «Русское слово в Южной Осетии»-йы специалон рауагъды презентацийы рæстæджы.
Банысангонд факультеттæй дыгай студенттæ райсдзысты фондз мин сомы стипенди.
Уымæй уæлдай ма, Джиоты чызг ХИПУ-йы музейæн радта Уæрæсейы ‘рдыгæй Хуссар Ирыстоны хæдбардзинад банымайыныл 15 азы сæххæсты цытæн зæрдылдарæн монетæ, афтæ ма «Республикæ Хуссар Ирыстоны Зæрдылдарæн монетæты» каталог, кæцы мыхуыры рацыд 2013 азы. Уым ис алы монетæйæн дæр йæ къам, йæ характеристикæ, афыст æмæ историон-тематикон бæлвырдгæнæн ирон æмæ уырыссаг æвзæгтыл.
