Мысæн мадзал – Цъинагары хъæуы дæр

7-æм августы изæры авд сахатыл Цъинагары хъæууон администрацийы  бæстыхайы цурмæ æрбамбырд сты Дзукъаты хъæу, Гдулет æмæ Цъинагары хъæуты цæрджытæ.

Уырдæм ма æрбацыдысты Ленингоры районы администрацийы сæргълæууæджы хæдивæг Быценты Вадим, Хуриты Гивийы номыл Цъинагары астæуккаг скъолайы директор Гуссойты Ласко, ахуыргæнджытæ æмæ скъоладзуатæ, районы мидхъуыддæгты управленийы æмæ кульутрæйы хайады минæвæрттæ. Æрбамбырдуæвджытæн сæ цæсгæмттыл зынд æрхæндæгдзинад, сног та сын сты 2008 азы августы хæстон цауты тæссагдзинæдтæ. Хъуыстысты æрхæндæг музыкæйы зæлтæ. Сыгъдысты цырæгътæ æмæ афтæ зынд цыма дзыллæты бæсты дæр цырæгътæ дзыназынц. Æрæмбырдуæвджытæ венок æмæ дидинджытæ сæвæрдтой фæмардуæвджыты цыр-тыл.

Мысæн изæр байгом кодта, ацы рæнхъыты автор, Ленингоры районы администрацийы культурæйы хайады Цъинагары зонæйы сæй-раг специалист Уалыты Зоя. Уый цыбыртæй æрдзырдта 2008 азы августы трагикон цауты тыххæй. Банысан кодта ирон адæм гуырдзыйы аххосæй иу æнусы дæргъы цалдæр геноциды кæй баййæфтой, уый тыххæй. Ацы аз 100 азы сæххæст 1920 азы ирон адæмы геноцидыл, фæлæ  уый фаг нæ фæкаст гуырдзиаг фа-шисттæм æмæ та нын дыккаг хатт сарæзтой геноцид.

Мысæн мадзалы раныхас кодта Цъинагары астæуккаг скъолайы директор Гуссойты Ласко. Уый зæрдыл æрлæууын кодта фæмардуæвæг хæстонты хъæбатырдзинæдты тыххæй. Загъта, зæгъгæ, ирон адæм хъуамæ цæрой æмгомæй, цæмæй сæм æддагон знаг ма-куыуал æрбауæнда. «2008 азы 7-æм августы адæм сæ изæры зылдтытæ куы бакодтой æмæ сæ уæтты куы æрулæфыдысты, уæд айхъуыстысты тыхджын æхстытæ. Фидауынгæнджытæ акастысты æмæ федтой, Тбилисы трассæйæ Хурвалеты хъæуы ‘рдæм кæй æрбацæуынц бирæнымæц æфсæддон машинæтæ. Маши-нæтæй рахызтысты гуырдзиаг лæгмартæ æд хотыхтæ æмæ апырх сты хъæутыл. Гуырдзиаг агрессортæ бацыдысты Цъинагары хъæууон администрацийы бæстыхаймæ æмæ дзы æрсагътой Гуырдзыстоны тырыса, фæлæ гуырдзиаг фашистты тырыса раппæрстой нæ хъæбатыр лæппутæ. Гуырдзиаг абырджытæ хастой, сæ зæрдæмæ цы цыд, æппæт уыдæттæ. Пырх кодтой хæдзарон дзаумæттæ. Фæлæ фыдлæг æмæ фыдбонæн бирæ цæрæнбон нæй æмæ абон цæрæм хæдбар республикæйы. Абон кæд æнкъард мадзалмæ æрбамбырд стæм, уæд нырæй фæстæмæ Ирыстон хызт уæд ахæм æнамонддзинæдтæй».

Мысæн мадзалы хайадисджытæ иу уысм æмырæй алæугæйæ ссардтой фæмардуæвджыты рухс нæмттæ.

Мысæн мадзал сорганизаци кодтой Гуссойты Ласко, Быценты Вадим, Культурæйы хæдзары директор Бестауты Эмзар.

УАЛЫТЫ Зоя,

РХИ-йы Культурæйы сгуыхт кусæг