УФ-йы Паддзахадон Думæйы фоторавдыст «Вклад народов России в победу в специальной военной операции»-йы равдыстой сæрмагонд æфсæддон операцийы УФ-йы адæмты хъайтар минæвæртты портреттæ. Се ‘хсæн сты Ирыстоны хъæбултæ – Джиоты Станислав æмæ Махъоты Хазбийы портреттæ. Равдысты нæм къамтæй кæсынц Хъæбатырдзинады ордены кавалертæ æмæ УФ-йы Хъайтартæ.
2022 азы марты Уæрæсейы Федерацийы Хъахъхъæнынады министрад фехъусын кодта, зæгъгæ, бастдзинады станцы хистæр, прапорщик Джиоты Станислав йæ цардæн тæссаг уавæрты уæрæсейаг дæлхайы сифтонг кодта стабилон бастдзинадæй. «Цæугæдоныл ахизынæн понтонон хид аразыны рæстæджы, къорды сæйраг тыхтæй дард уæвгæйæ, уæрæсейаг æфсæдты дæлхæйттæ бахаудтой минометон æхстыты бын. Бацайдагъ æнæмсæр хæст. Джиойы фырты спутникон ифтонгадимæ машинæ дæлхæйтты бастдзинад ифтонг кодта. Бынатмæ æввахс спырх снаряд æмæ йе схъистæй нал скуыста машинæ», – радзырдтой ведомствойы.
Джиоты Станислав схызт машинæйы сæрмæ æмæ æрдæг сахатæй фылдæр йæ къухтæй хæцыд, чи азылын ис, уыцы антеннæйыл, цæмæй бахъахъхъæд æрцыдаид спутникы сигнал æмæ уыцы-иу рæстæджы разамынад кодта йæ дæлбар æфсæддон службæгæнджытыл.
Джиоты Станислав хорзæхджын æрцыд Хъæбатырдзинады орденæй.
***
Медицинон службæйы дæлбулкъон Махъоты Хазби хæстон архайдтыты рæстæджы оперативонæй равæрдта быдырон госпиталь æмæ сифтонг кодта эвакуаци, цæфты химæрайст.
Цæрæн пункт ссæрибар кæныны фæдыл карз тохты рæстæджы, ныхмæлæууæджы артиллерион æхсты фæстиуæгæн Махъоты Хазби контузи райста æмæ цасдæр рæстæг йæхимæ не ‘рцыд. Йæхи куы æрæмбæрста, уæд сорганизаци кодта госпиталы цæфты эвакуаци бæстыхайы ныккæндмæ æмæ сын афтæмæй бахъахъхъæдта сæ цард. Æдæппæтæй дæлбулкъон Махъоты Хазбийы разамынады медицинон батальон эвакуаци скодта 1000 æфсæддон службæгæнæгæй фылдæр. Махъоты Хазби сæрмагондæй йæхæдæг медицинон æххуыс бакодта 120 æфсæддон службæгæнæгæн æмæ сын уымæй бахъахъхъæдта сæ цард.
Махъоты Хазби хорзæхджын æрцыд Хъæбатырдзинады орденæй.
