25 сентябрæй 2 октябрмæ Хуссар Ирыстоны территорийыл æрцыдис иу фыдракæнд. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Республикæйы фæндæгтыл уыдис иу фæндагон-транспортон цау. Аварийы фæстиуæгæн рынчындонмæ алыгъуызон цæфтимæ бахаудтой дыууæ адæймаджы.
Алыгъуызон бархалыны фæдыл горæты милицийы управленийы кусджытæ бæрндзинадмæ æркодтой аст адæймаджы.
Фæндагон змæлды æдасдзинады инспекци къуырийы дæргъы сбæлвырд кодта 300 фæткхалæн цауы. Уыдонæй 18 уыдысты нозтджынæй машинæ скъæрыны цаутæ.
25 сентябры милицийы наркотикты æрзылдыл контроль кæныны управленийы кусджытæ оперативон информацийы фæдыл басгæрстой горæтгæрон донбыл территори æмæ дзы ссардтой дыууæ гæны къутæры.
27 сентябры Ленингоры районы милицийы управленийы кусджытæ оперативон информацийы фæдыл басгæрстой Орчъосаны хъæугæрон æмæ дзы ссардтой æмæ скуынæг кодтой 49 гæны къутæры.
27 сентябры рынчындонмæ уæззау уавæры бахаудта нæ горæты 36-аздзыд цæрæг. Куыд рабæрæг, афтæмæй уый спайда кодта наркотикон буарад «Метадон»-æй æмæ медицинон препарат «Лирика»-йæ.
28 сентябры Знауыры районы милицийы хайадмæ фехъусын кодтой, зæгъгæ Терегуаны хъæуы зынг сирвæзт 56-аздзыд бынæттон цæрæджы хисæрмагонд хæдзарыл. Зынгхуыссынгæнæн службæйы кусджытæ æвæстиатæй бацыдысты, фæлæ уæдмæ дыууæуæладзыгон хæдзар басыгъд æд фæллой.
28 сентябры рынчындонмæ уæззау уавæры бахаудта Дзауы поселочы цæрæг 10-аздзыд æнæххæст кары сывæллон. Куыд рабæрæг, афтæмæй ацы сывæллоныл, йæ хистæр æфсымæримæ хъæды уæвгæйæ, фæирвæзт дамбаца – нæмыг сæмбæлд сæрыл, ахызт хъуыры æмæ ма бахъыгдардта риу дæр.
1 октябры изæры авд сахатмæ ‘ввахс Къуайсайы милицийы хайадмæ фехъусын кодтой, зæгъгæ, бынæттон 52-аздзыд цæрæг ацыд хъæдмæ гагадыргътæ тонынмæ æмæ нал æрæздæхт хæдзармæ. Оперативон агурæн мадзæлттæ ауадзыны фæстиуæгæн, чи фесæфт, уыцы адæймаджы сæрæгасæй ссардтой Къозы хъæумæ æввæхс.
Наркотикты æрзылды контроль кæныны управленийы кусджытæ баурæдтой нæ горæттаг 43-аздзыд цæрæджы. Уый спайда кодта наркотикон буарадтæ «Метадон» æмæ «марихауана»-йæ, æмæ ма медицинон препарат «Лирика»-йæ дæр. Баурæдтой ма 38-аздзыд горæттаг цæрæджы дæр, медицинон препарат «Лирика»-йæ спайда кæныны тыххæй, фæлæ наркотикты фæдыл медицинон басгæрстмæ нæ бакуымдта æмæ йæ тæрхондон фæивар кодта. Уымæй уæлдай ма баурæдтой 38-аздзыд горæттаг цæрæджы. Уый дæр спайда кодта «метадон» æмæ «марихуана»-йæ.
Цхинвалы районы милицийы кусджытæ рейдон мадзæлтты рæстæджы баурæдтой фондз шофыры. Сæ зæрдæ сæм фехсайдта наркотиктæй спайда кæнынæй, фæлæ фæткхалджытæ нæ бакуымдтой медицинон басгæрстмæ æмæ сæ тæрхондон фæивар кодта. Баурæдтой ма Цхинвалы районы Зары хъæуы 26-аздзыд æмæ горæттаг 30-аздзыд цæрджыты. Шофыртæ спайда кодтой марихуанайæ.
