«Мах дуг» №10

Мыхуры рацыд литературон-аивадон æмæ æхсæнадон-политикон æрвылмæйон журнал «Мах дуг»-ы дæсæм номыр.

Æмбалты Цоцкойы райгуырдыл сæххæст 150 азы. Журналы мыхуыр æрцыд Гусалты Барисы разныхас «Ирыстоны фарн», зæгъгæ. Афтæ ма Цоцкойы сфæлдыстадон бынтæй цалдæр радзырд, Хъуылаты Валодяйы мысинæгтæ «Æмбалты Цоцко» æмæ «Зындгонд адæм Цоцкойы тыххæй».

«Ног æмдзæвгæтæ»-йы бынмæ мыхуыр цæуы Гæбуаты Галинæйы æмдзæвгæты цикл «Æрвон стъалыты тæмæн».ф

Хъайттаты Сергейы райгуырдыл сæххæст 100 азы. Уый цытæн  журналы мыхуыр æрцыдысты йæ радзырдтæ – «Знæгтæ», «Хъуыды ма кæныс?..».

Æрæджы йæ 80 азы йæхирдыгæй фесты зындгонд фыссæг, этнограф æмæ журналист Цгъойты Хазбийæн. Журналкæсджытæ æхсызгонæй бакæсдзысты Хазбийы новеллæтæ – «Сусæг зæгъинæгтæ», «Æнæаххосæй аххосджын» æмæ эссе «Фынтæ дæр цæуылдæр дзурынц».

«Мах дуг»-ы равдыст» нæ зонгæ кæны РЦИ-Аланийы сгуыхт нывгæнæг Фидараты Фидары конд нывтимæ. Йæ конд нывтæ сты хигъæдон, æвдыст сæ цæуы ирон адæмы цард, культурæ, хиæмбарынад.

Рубрикæ «Ног тæлмацтæ»-йы бынмæ журналы ацы номыры мыхуыр æрцыд Торчынты Хъазыбеджы æмдзæвгæтæй фыст роман «Зейнап», зæгъгæ, йæ кæрон. Ратæлмац æй кодта æмæ йыл литературон æгъдауæй бакуыста Годжыцаты Нелли.

Нæ чысыл хуртæн рубрикæ «Бакæсæм нæ хурты хуртæн» мыхуыр кæны Тохсырты Къостайы æмдзæвгæты цикл «Рухс бæркад», зæгъгæ, афтæ ма базон-базонтæ.

Хуыгаты Сергейы фыссæджы хъуыды, зæгъгæ, ахæм сæримæ «Прототип æмæ æрмæст уый тыххæй дæр нæ» мыхуыр æрцыд рубрикæ «Публицистикæ»-йы бынмæ.

Рубрикæ «Ирон прозæйы антологи»-йы бын журналкæсæг базонгæ уыдзæн  Ходы Камалы цыбыр биографиимæ. Бакæсдзæн ын йæ радзырд «Гамо».

Журналы ма мыхуыр æрцыд «Мæйы цаутыл афæлгæст» æмæ курдиатджын фыссæг æмæ поэт Хъауыраты Дауыры (Дзиойты Да-уырбег) амæлæты фæдыл журнал «Мах дуг»-ы редакцийы тæфæрфæс.

ДЗЕБЫСАТЫ Г.