Сывæллæтты республикон библиотекæйы уагъд æрцыдис Уæрæсейы боны цытæн мадзал. Ардæм фæуазæг Хуссар Ирыстоны Президент Бибылты Анатоли. Хайад ма дзы райстой библиотекæйы æвзонг чиныгкæстджытæ æмæ сæ ныййарджытæ. Райдианы библиотекæйы директор Джиоты Аллæ радзырдта библиотекæйы архайд æмæ æнтыстытыл, Уæрæсейы боны цытæн цы æрмæджытæ æмæ равдыстытæ сарæзтой, уыдон тыххæй.
– Нæ сывæллæттæн куыд уырыссаг æвзагмæ, афтæ ирон æмæ æндæр æвзæгтæм дæр ис иттæг хорз æвзыгъддзинæдтæ, фæлæ стырдæр хъусдард здахæм уырыссаг æвзагмæ. Ахæм ахаст дарæм нæ мадæлон æвзагмæ дæр. Дыууæ æвзаг хорз базонын ахуырдзауæн стыр зындзинад нæ хæссынц æмæ нæм фыццаг хъуамæ разына нæ ирон æвзагмæ уарзондзинад, уый фæстæ та тырнæм, куыд хуыздæр æй базонæм, уымæ – æрæмбырдуæвджыты раз дзырдта Бибылты Анатоли дæр. Уыимæ ма президент банысан кодта, зæгъгæ, æвзагмæ мæгуырау ахастæн ис стыр мæгуырау фæстиуджытæ. Уымæн æмæ цæмæй нæ адæм æндæр адæмты ‘хсæн аккаг бынат ахсой, уый тыххæй не ‘взаг хъуамæ уа фидар, кæна тыхджындæр.
Чиныг уарзын æмæ кæсыны тыххæй та президент æвзонг чиныгкæсджытæн бацамыдта, зæгъгæ, æвзонг чиныгкæсæджы цайдагъ кæны царды раст фæндагыл æмæ сын йæ цæст бауарзта цæмæй сæм цы тырнындзинæдтæ сæвзæры, уыдон рæзой æппынæдзух.
Библиотекæйы методист Мæргъиты Маринæ йæ раныхасы банысан кодта, зæгъгæ, абон нæ сæйрагдæр хæстæй иу у цæмæй æвзонг чиныгкæсæгæн уарзын кæнæм библиотекæ æмæ чиныг. Библиотекæмæ фыццаг хатт цы æвзонг чиныгкæсджытæ æрбацæуынц, фыццаг хатт чиныг чи ахæссы, уыдон стæмтæй дарддæр свæййынц нæ æдзухон чиныгкæсджытæ.
– Мах не ‘нхъæлмæ кæсæм чиныгкæсæг нæм кæд æрбацæудзæнис уымæ, цæуæм сæм нæхæдæг дæр – зæгъы дарддæр Маринæ. Библиотекæйы кусджытæ æхсæнадон бынæтты хайад цы мадзæлтты фæисынц, уым æвзонг æмбæстæгтимæ фæуадзынц агитацион куыст. Куы æрбацæуынц, уæд та сыл фембæлæм мидбылхудтимæ. Райдианæй сын радзурæм библиотекæйы куысты сусæгдзинæдты тыххæй. Уый фæстæ та сын библиотекæйы саразæм чысыл экскурстæ, равдисæм æмæ сын радзурæм бæрæгбонты æмæ зындгонд адæймæгты тыххæй цы равдыстытæ саразæм, уыдон тыххæй. Базонгæ сæ кæнæм библиотекæйы цы хъазæн бынæттæ ис, уыдонимæ дæр.
Раныхасгæнæг куыд банысан кодта, уымæ гæсгæ ахæм ахасты фæрцы сæ чиныгкæсджыты нымæц азæй азмæ кæны фылдæр.
Йæ цыбыр раныхасы библиотекæйы æвзонг чиныгкæсæг Тасойты Анастасия та банысан кодта: «Фыццаг хатт библиотекæмæ куы æрбацыдтæн, уæдæй рацыд дæс азы. Арæх æрбацæуын чиныг хæссынмæ, фæлæ иунæг хатт дæр нæ уыд æмæ мæ йæ кусджытæ хорз ма райсой, ма мыл баузæлой æмæ мын ма баххуыс кæной чиныг равзарыны хъуыддаджы».
Горæты централон библиотекæйы ди-ректор Ирина Прокопенко та йæ раныхасы банысан кодта, зæгъгæ, куыд хъусæм æмæ абон нæхи цæстытæй цы уынæм, уымæ гæсгæ куыстмæ уæ хъæппæрисон æмæ æнувыд ахастæй уарзын кæнут уæхи, уæ куыст æмæ чиныг. Йæ цæст сын бауарзта ноджы стырдæр æнтыстытæ.
Уый фæстæ æвзонг чиныгкæсджытæ Гæбæраты Георги, Аннæ, Мария, Бестауты Лизæ æмæ æндæртæ ирон æмæ уырыссаг авторты æмдзæвгæтæ кастысты Уæрæсейы боны цытæн.
Мадзалы кæрон Бибылты Анатоли биб-лиотекæйæн балæвар кодта сывæллæттæн фыст уырыссаг æмæ ирон авторты чингуытæ.
Гæззаты Иван
Comments are closed, but trackbacks and pingbacks are open.