27-æм марты Культурæйы кусæджы боны цытæн Цхинвалы музыкалон ахуыргæнæндоны уагъд æрцыдис цытджын мадзал. Бæрæгбонон мадзалмæ хуынд æрцыдысты нæ республикæйы Æлборты Феликсы номыл музыкалон ахуыргæнæндоны бæстыхайы Президент Бибылты Анатоли æмæ РХИ-йы Хицауады Сæрдар Пухаты Эрик.
Ацы бæрæгбон баст у нæ адæмы монон хъæздыгдзинад, традицитæ, хæрзнамысон хæзнатæ хъахъхъæнын æмæ сæ фидæны фæлтæртæм адæттыны бæрнджын æмæ цытджын хæс кæмæ æрхауд, уыцы адæмимæ. Культурæйы къабазы кусджыты профессионалондзинад æмæ арæхсты фæрцы нæ бæстæйы цæрджытæ сæ цард æрвитынц цымыдисон æмæ рæсугъдæй.
Цытджын мадзалы æппæт ацы къабазы кусджытæ дæр сæ профессионалон бæрæгбоны цытæн райстой Республикæ Хуссар Ирыстоны Президент Бибылты Анатолийы зæрдиаг арфæтæ. Уый йæ раныхасы банысан кодта, зæгъгæ, Хуссар Ирыстоны культурæйы рæзт æмæ ахадындзинад у нæ паддзахадон политикæйы приоритетон фæдыздæхтытæй сæ иу. «Марты мæйы ис ахæм бонтæ, кæцытæ адæймагæн хæссынц циндзинад. Æхсызгон хъуыддаг у уый, æмæ ацы бон – Культурæйы кусæджы бон мах кæй нысан кæнæм музыкалон скъолайы бæстыхайы, цыран куыстой нæ республикæйы бирæ зындгонд адæймæгтæ. Абон ацы скъолайы кусынц ахæмтæ, кæцытæ нын нæ сывæллæттæн уарзын кæнынц аивад æмæ культурæ.
Культурæйы цытджын кусджытæ, айсут ноджыдæр мæ иууыл зæрдиагдæр арфæтæ. Уæ профессионалон бæрæгбоны сымахæн мæ цæст уарзы фидар æнæниздзинад, хæрзиуджытæ, сфæлдыстадон уæлтæмæнад, æвидигæ энерги æмæ ног æнтыстытæ нæ диссаджы Фыдыбæстæ – Республикæ Хуссар Ирыстоны хæрзиуæгæн уæ куысты. Мæ зæрдæ уын зæгъы бирæ хъæлдзæг бонтæ, цæмæй уæ царды уа фарн æмæ амондæй хайджын», – загъта Бибылты Анатоли.
Зæрдæбын арфæты фæстæ мадзал адарддæр кодтой бæрæгбонон концертæй. Хайад дзы райстой Æлборты Феликсы номыл Цхинвалы музыкалон ахуыргæнæндоны хореографион хайад. Уыдоны ʻхсæн ма уыдысты музыкант Æлборты Владимир, РХИ-йы сгуыхт артисткæ Гатыгкоты Нинæ, стæй музыкалон ахуыргæнæндоны националон инструментты оркестр.
Нæ уацх.
Comments are closed, but trackbacks and pingbacks are open.