«Растдон»-ы куыстуаты рауæрæх кæнын æмæ йын йæ продукци реализаци кæныны фарстатыл уынаффæ цыд РХИ-йы Президент Бибылты Анатоли æмæ «Евродон»-ы Генералон директор Уанеты Вадимы фембæлды рæстæджы.
«Вадим Шалвайы фырт, мах зонæм Ирыстоны раз уе дæ лæггæдты æмæ республикæмæ кæй æрцыдтæ, уый нын тынг æхсызгон у. Уырны мæ нæ иумиаг куыст нын фадат кæй ратдзæн фылдæр æнтыстытæ къухы бафтын кæнынæн.
Дæ куыстуаты продукци цæуы уæрæсейаг базармæ, «Россельхознадзор» æмæ «Югоссельхознадзор»-ы ‘хсæн уый фæдыл арæзт æрцыд æмбæлон сразыдзинад. Уый уыд куыст фæхуыздæр æмæ фенцондæр кæныны тыххæй æнтыстджын къахдзæф», – загъта Президент.
Уымæй дарддæр ма уый банысан кодта, зæгъгæ, тырнын хъæуы, дзидзайы комбинат цы продукци уадзы, уый уæй кæныны базар рауæрæх кæнынмæ, кæцы реализаци хъуамæ цæуа æрмæст Уæрæсейы территорийыл нæ, фæлæ æндæр регионты дæр. Бибылты Анатоли ма банысан кодта бынæттон фермертæй хомыс æлхæныны ахсджиагдзинад.
«Фылдæр кусын хъæуы ууыл, цæмæй фос æлхæд цæуа нæ хъæуты цæрджытæй æмæ сын уа йæ ауæй кæныны фадат», – загъта уый.
Уанеты Вадим йæ рады бузныг загъта Бибылты Анатолийæн, йæхимæ йæ кæй райста, уый тыххæй, афтæ ма йын уæрæсейаг базары заводы продукцийы реализацийы фарстаты «Югоссельхознадзор»-имæ иумæ кæй баххуыс кодта, уый тыххæй.
Уый куыд загъта, афтæмæй йæ балц комкоммæ баст у куыстуаты кондад рауæрæх æмæ продукцийы реализаци кæнынимæ. Уыцы нысан сæххæст кæныны тыххæй Хуссар Ирыстонмæ æрцыд профессионалон дистрибьюторимæ.
«Кондад рауæрæх кæныны тыххæй махæн æппæт фадæттæ дæр ис. Мах ардæм республикæйæн æддейæ нæ ласæм стуры фыд, фæлæ йæ æлхæнæм бынаты. Махæн нæ продукци у тынг гъæдджын æмæ натуралон.
Нæ командæйы ис ног маркетолог, уый дæр махимæ æрцыд. Мах уыимæ ацыдыстæм Ирыстоны сыгъдæг бынæттæм, æмæ мын уый бирæ хорз хъуыдытæ радзырдта ноджы традициондæр, нартон этикеткæйы тыххæй. Æз федтон, продукцийæн ноджы зæрдæмæдзæугæдæр товарон хуыз радтынæн нын чи баххуыс кæна, ахæм эскизтæ», – загъта Уанеты Вадим.
Уый банысан кодта лабораторион экспертизæйы дæргъвæтин æмгъуыдты æмæ продукцийы гъæды сертификат радтыны проблемæ дæр.
«Мах продукци арвитæм Кæсæг-Балхъарты республикæмæ, цыран фондз бонмæ рацæуы экспертизæ. Натуралон продуктæн фондз боны стыр æмгъуыд у, мах бирæ рæстæг хардз кæнæм. Уый та æвзæрын кæны проблемæтæ, товар кæдмæ бæззы, уыцы æмгъуыды æмæ йæ магазинтæм хæццæ кæнынæн. Цæ-мæй уыцы рæстæг фæкъаддæр уа, уый тыххæй нæ фæндит, цæмæй «Россельхознадзор»-ы филиал бакондæуа Республикæ Цæгат Ирыстон-Аланийы территорийыл», – загъта «Евродон»-ы сæргълæууæг.
Comments are closed, but trackbacks and pingbacks are open.