22 сентябры Гуырдзыстоны премьер-министр Иракъли Гъарибашвили Нью-Йоркы Иугонд нациты организацийы Генералон ассамблейы 78 сессийы йæ раныхасы банысан кодта, зæгъгæ, «Уæрæсе нырма дæр оккупаци кæны Гуырдзыстоны территорийы 20 проценты». Гъарибашвили æрсидт дунеон æмæхсæнадмæ, цæмæй «2008 азы æхстытæ æруромыны нысанæн цы сразыдзинад сарæзтой, уый æххæстбæрцæй æххæст кæныны тыххæй бандава Мæскуыйыл». Æрсидт ма «абхазаг æмæ ирыстойнаг æфсымæртæ æмæ хотæм» дæр, зæгъгæ, «нæ иудзинады ныхмæлæууæг у нæ иумæйаг знаг Уæрæсе».
Премьер-министры ацы раныхасы тыххæй «Спутник – Хуссар Ирыстон»-ы пресс-центры брифингы сæ хъуыдытæ загътой РХИ-йы Президенты паддзахадон уынаффæгæнæг Гобозты Вячеслав æмæ Президенты администрацийы информацион-аналитикон управленийы сæргълæууæг, политолог Уазæгты Юри.
Гобозты Вячеслав банысан кодта, зæгъгæ, ИНО-йы Генералон ассамблейы сессийы Иракъли Гъарибашвили ногæй ницы загъта. Раздæр æмæ ныртæккæ дæр уый у Гуырдзыстоны официалон позици.
«Гъарибашвилийы ацы ныхæстæ здæхт уыдысты алкæмæ дæр, ирæттæ æмæ абхазæгты йедтæмæ. Мах тынг хорз зонæм Хуссар Ирыстон æмæ Абхазмæ кæцыфæнды гуырдзиаг режимы ахаст, зонæм Гуырдзыстоны элитæйы ахаст дæр. Сæ мидæггагон быцæудзинæдтæм нæ кæсгæйæ, гуырдзиæгтæ сæ позици нæ ивынц, сæ политикæ кæддæриддæр здæхт уыдзæн ирæтты æмæ абхазæгты ныхмæ», – загъта Гобозты Вячеслав.
Гуырдзиаг премьер-министры раныхасæн уыд куыд дунеон, афтæ мидгуырдзиаг аспект дæр.
Дунеон аспект фыццаджы фыццаг баст у Уæрæсемæ ахасты Гуырдзыстоны афтæхуыйнæг нейтралитетимæ.
«Алыгъуызон дунеон информацион фæрæзты, æхсæн-адæмон политикон æмæ экспертон æхсæнадтæ критикæ кæнын райдыдтой Тбилисы, афтæхуыйнæг «проуæрæсейаг позици-йы» тыххæй. Гъарибашвили хъуамæ дунеон æхсæн-адæн фенын кæна, «проуæрæсейаг позици» Гуырдзыстоны стратегион позици кæй нæу, Гуырдзыстон Уæрæсейы æвварс кæй нæ хæцы, фæлæ кæй у европæйаг рæзты фарсхæцæг. Бахахх ма кодта, НАТО-йы ‘рдæм cе ‘ргомæздæхт кæй никуы фæивдзæн. Мидгуырдзиаг аспект та уый у, æмæ Гъарибашвили Уæрæсейы ныхмæ ахæм карз хъусынгæнинаг уымæн сарæзта, цæмæй ма фесафа йæ электорат, уымæн æмæ антиуæрæсейаг фактор у гуырдзиаг æхсæнадон царды реа-лондзинад. Уый тыххæй йæ хъусынгæнинаг уыд дырыс æмæ йын уыд мидгуырдзиаг аспект. Уый ноджыдæр дзурæг у ууыл, æмæ уæрæсейаг-гуырдзиаг ахастыты хъæрмуддзинады тых-хæй уæрæсейаг бæрæг политикон къордтæ хъуамæ бамбарой антиуæрæсейаг тенденци гуырдзиаг æхсæнадон хъуыдыйы реалон кæй у», – загъта Гобозты Вячеслав.
Президенты администрацийы информацион-аналитикон управленийы сæргълæууæг Уазæгты Юри дæр банысан кодта гуырдзиаг политикæйы антиуæрæсейаг тренд.
«Нырма дæр гуырдзиаг æхсæнады уæлахиз кæны антиуæ-рæсейаг тренд, æниу афтæхуыйнæг гуырдзиаг «проуæрæсейаг» политикон тыхтæ дзурынц, зæгъгæ, Гуырдзыстоны цæрджыты 80 проценты сты Уæрæсейы æвварс. Фæлæ æцæ-гæй та уый реалондзинадæй дард у, уымæн æмæ Гуырдзыстон хæдбар паддзахады статус куы райста, уæдæй фæстæмæ ныгуылæйнаг структурæтæ, официалон æмæ æнæпаддзахадон фондтæ архайынц Гуырдзыстоны аполитикон элитæйы, æхсæнады ног фæлтæрты хъомыл кæныныл. Æмæ уый сæ къухы бафтыд уæлдайджынтæй. Гуырдзыстоны æхсæнады активон хайы алыварсон къордтæ æхсæнадон организацитæ, блогертæ, информацион фæрæзты кусджытæ, бæлвырддæрæй сæ фæсивæды активондæрты иу хай. Уыдонæн се ‘ргом æнæхъæнæй дæр здæхт у Ныгуылæны ‘рдæм. Нæдæр сæ перспективæйы, нæдæр сæ æндæр аспекты Уæрæсеимæ ахастытæ æппындæр не ‘ндавынц», – банысан кодта политолог.
Уазæгты Юри загъта, зæгъгæ, уыцы фæсивæдæн Украинæ-йы сæрмагонд æфсæддон операцийы рæстæджы Гуырдзыстоны информацион тыгъдады, стæй соцхызæгты сæ уагахаст дæр иухуызон у. Схонæн сæ ис проукраинаг, проныгуылæйнаг æмæ карзæй антиуæрæсейаг. Ирæттæм æмæ абхазæгтæм ахасты дæр æргом сты. Уыдон æнхъæлынц, зæгъгæ, Уæрæсе куы фембылды уа, уæд æдыхстæй райс-дзысты, 30 азы дæргъы сæ къухы цы нæ бафтыд, уый.
«Кæд Абхазмæ ахасты Гуырдзыстон æнхъæлмæ кæсы иллюзион бадзырдтæм æмæ сын истыхуызон автономон статус радтынмæ, уæд сын Хуссар Ирыстоны ныхмæ та карз-дæр ахаст ис. Æгæрыстæмæй, мах куыд бадзырдты парт-нертæ, афтæ дæр нæ нымайынц. Кæй зæгъын æй хъæуы, ирыстойнаг æмæ абхазаг æфсымæрты тыххæй Гъарибашвилийы хъусынгæнинаг здæхт уыд ирæттæ æмæ абхазæгты йедтæмæ алкæмæ дæр. Политиктæ æмæ дипломаттæн сæ бон у аразой цавæрдæр реверанстæ дипломатон этикеты сæ-раппонд, фæлæ сæ архайды Гуырдзыстон цы зонда-хастыл хæст у, уый нæ равдисын та сæ бон нæу. Афтæ куы нæ уа, уæд нæ рамбулдзысты радон æвзæрстыты», – банысан кодта Уазæгты Юри.
Мадзалы кæронбæттæны сæ хъуыдытæ балхынцъ кодтой эксперттæ: Гобозты Вячеслав банысан кодта, зæгъгæ, Гуырдзыстоны фæзындзæн, Хуссар Ирыстон æмæ Абхазы хæдбар-дзинæдтæ банымайыны ахсджиагдзинад чи бамбара, ахæм тыхтæ, æмæ «абон уа æви – сом, Гуырдзыстон банымайдзæн Хуссар Ирыстон æмæ Абхазы паддзахадон хæдбардзинæдтæ. Реалитæ ахæм сты, æмæ æндæр гæнæн нæй. Кæнæ нын хъуамæ банымайой нæ суверенитеттæ, кæнæ та иу бынаты лæууой æмæ сæхæдæг цæлхдуртæ æвæрой, Гуырдзыстоны размæцыдæн пайда цы бирæнымæц проекттæ ис, уыдоны реализацийæн».
Уазæгты Юри куыд бансан кодта, афтæмæй Гуырдзыстоны ныры электорат сырæзт ныгуылæйнаг параметртæм гæсгæ æмæ æнцой кæны бирææнусон националон традицитыл. Æппæт уыцы фактортæ гуырдзиаг хицауадæн нæ ратдзысты революцион къахдзæфтæ саразыны бар. Хуссар Ирыстон æмæ Абхазы хæдбардзинæдтæ куы нæ банымайа Гуырдзыстон, уæд ныццауæздзысты, йæхицæн пайда цы бирæ проекттæ сты, уыдон.
ОСИАТЫ Индирæ
