Ацы бонты, РХИ-йы Президент Бибылты Анатоли сарæзта цæугæ æмбырд Знауыры районмæ. Ам дзырд цыд бирæ ахсджиаг фарстатыл. Республикæйы сæргълæууæг дзырдта фæндагон инфраструктурæйы цалцæг кæнын кæй у республикæйы къухдариуæгады приоритетон здæхтытæй сæ иу.
Знауыры администрацийы сæргълæууæг Гæбæраты Инал фехъусын кодта, сæ тыхтæ сæ куыд амонынц, афтæ кæй сцалцæг кæндзысты хосгæнæн улæфæндон «Ныфс».
Нагутнимæ æрвылаз дæр фæуазæг вæййынц сæдæгай адæймæгтæ. Цхинвалæй-Знауыры поселочы онг кæд хæрзвадат сосæвæндаг ис, уæддæр республикæйы цы иунæг санатори ис, уырдæм цæугæйæ-иу улæфджытæ уыргæфтыд фесты. Балтайы хъæуæй ахизгæйæ æрбатары вæййы мобилон бастдзинад дæр. Æрвылаз дæр улæфæн сезонмæ районы администраци бæргæ ахафы фæндаг, фæлæ та иннæ азмæ уый æдзæллаг уавæрмæ ‘рхауы.
Ацы хосгæнæндоны диссаджы æууæлты кой айхъуыст 1972 азæй фæстæмæ, æмæ уæдæй нырмæ Нагутнимæ адæм цæуын райдыдтой ваннæтæ исынмæ.
2002-2003 азты зынгæ амалиуæггæнæг, Знауыры цæрæг Чилæхсаты Владимир ам сарæзта санатори æмæ хосгæнæн скуыста, куыд æцæг пансионат, афтæ. Санаторийы территорийыл æвæрд æрцыд коттеджтæ æмæ æндæр арæзтадтæ. Азæй-азмæ та кæны рæсугъддæр. Фæзынд дзы хæрæндон, ваннæтæ исæн хатæн, сæрдыгон мæнгагъуыстытæ, медпункт, фонтан, хиирхæфсæн хатæнтæ æмæ а.д. Иу цыбыр дзырдæй ардæм хос кæнынмæ цы адæм фæцæуынц, уыдон æнæмæнг сæ хосгæнæн процедурæты фæстæ ссарынц, сæхи кæм аирхæфсой, ахæм бынæттæ. Улæфæндонмæ æввахс згъоры цæугæдон, уый æхсæрдзæнтæм бирæ улæфджытæ абалц вæййынц æмæ сæхи фæнайынц уазал доны.
Уæлдæр куыд загътон, афтæмæй, санатори кæд дзæнæттаг бынаты ис, уæддæр æм фылдæр бæрцæй тырнынц улæфынмæ нæ, фæлæ хос кæнынмæ. Стæгниз, нуæрттæ æмæ зæрдæйы низтæй чи тыхсы, уыдонæн дохтыр-терапевт рафыссы хъæуæг ваннæтæ. Æмæ, æцæгдæр, бирæтæ ардæм æрцæуынц лæдзгуыты æнцой, фæлæ фæстæмæ та аздæхынц æнæ уыдон æххуысæй.
Санаторийы къухдариуæгад куыд зæгъы, афтæмæй уыдонмæ улæфджытæ вæййы, канд Цхинвал, Ленингор æмæ Цхинвалы районтæй нæ, фæлæ ма Дзæуджыхъæу æмæ Мæскуыйæ дæр. Ардæм иу хатт чи æрбафты, уый æнæмæнг стæй æрцæуы иннæ сæрд дæр.
О, фæлæ Нагутни дæрддзæф ран кæй ис Знауыры поселокæй, уымæ гæсгæ бирæ зындзинæдтæ æййафы инфраструктурæйы фадыджы. «Ныфс»-ы сæйрагдæр проблемæтæй иу у электронон рухсы цухдзинад, интернет, бынæттон телеуынынад, радио æмæ, сæйраджыдæр та, фæндаджы уавæр.
Ныр Знауыры районы сæргълæууæг Гæбæраты Инал ныфсы ныхас фехъусын кодта, ацы аз Нагутнийы баулæфынмæ чи хъавыд, уыдонæн, æмæ мах дæр нæ зæрдæ дардзыстæм, нæ бæстæйы ацы иунæг санатори рæхджы кæй суыдзæн хорз фысым йе ‘рвылазон уазджытæн.
Уазæгты Марфа
Comments are closed, but trackbacks and pingbacks are open.