Æрвылаз дæр уалдзæджы æрбалæудимæ дзæвгар аскъуыддзаггæнинаг фарстытæ æрæмбырд вæййы районты цæрæнуатон-коммуналон хæдзарады хайадты раз. Уыцы хæстæ сæххæст кæнын та хъæуы æнæмæнгæй, цæмæй бынæттон цæрджыты цардуагон уавæртæ фæхуыздæр æмæ фенцондæр уой.
Ленингоры районы цæрæнуатон-коммуналон хайады кусджытæ фæстæ нæ фæлæууыдысты ацы аз дæр, зæрдиагæй архайынц сæ разылæууæг хæстæ афоныл ахицæн кæныныл. Районы администрацийы сæргълæууæг Гæджиты Иларион куыд зæгъы, афтæмæй хъæууон фæллойгæнæгæн сæйрагдæр цы у, уый – бынæттон фæндæгты арæзтад, нуазын æмæ донхæры доны хъуагдзинад ма æнкъарын, йæ цæхæрадоны цы продукци æркæна, уыдонæн ын цæмæй уа уавæр ауæй кæнынæн. «Ацы аз мах рæстæгыл æрæвнæлдтам зымæджы бонты хъæутæм цы фæндæгтæ фехæлд, уыдон цалцæг кæнынмæ. Ларгуисы хъæумæ бацæуæны æркалд фæндаджы иу фарсæй дурты обæуттæ. Фæндаг дзуапп нал лæвæрдта бæлццæтты æрвылбонон домæнтæн. Уымæ гæсгæ бавнæлдтам цалцæг кæнынмæ, фæхуыздæр æй кодтам. Æнгæс куыстытæ бакæндзыстæм иннæ рæтты дæр. Хъæуæй-хъæумæ цалцæггæнинаг фæндæгтæ дæр нæм бирæ ис, уыдон дæр бадзæбæхтæ кæндзыстæм. Æмæ уымæй фæхуыздæр уыдзысты цæрджытæн сæ цæуæнтæ. Иууыл æнæмæнгхъæуæгыл нымайын нуазыны доны фарст æмæ ууыл дæр бакусдзынæн. Ивгъуыд азы бирæ хъæутæм бауагътам дон æмæ ацы аз уыцы куыстытæ адарддæр кæндзыстæм. Хъæуты сæрмæ цы суадæттæ ис, уыдон иумæ æрбатымбыл кæнын хъæуы, кæннод æгæр сындæг лæдæрсынц. Саразын сын хъæуы иумæйаг æмбырдгæнæн цад æмæ стæй уыцы дон ныддихтæ кæнын хъæуы кæрæдзимæ хæстæг цы хъæутæ ис, уыдоныл. Техникæйæ рæвдз куы уаиккам, уæд нæм лæгдых бирæ ис æмæ иу чысыл хъæу дæр æнæ дон нал баззаид», – зæгъы Иларион.
Уазæгты Марфа
