Горæт Цхинвалы административон фæткхалæн цауты фæдыл къамис йæ радон рабадты равзæрста 14 административон суагъæйы. Административон æрмæджытæ бацæттæ кодтой горæты милицийы управленийы кусджытæ алыгъуызон бархалыны фæдыл. Фæткалджыты фылдæр хай къамисы фæндонмæ гæсгæ ивар æрцыдысты, иннæты та бафæдзæхстой, цæмæй дарддæр мауал халой фæтк.
Фæткхалæн цауты фылдæр хай сты ахæмтæ, куыд арæзтадон æрмæджытæ тротуартыл чи æрæвæры, кæнæ хæдзарæй рахизæнты брæтты кæритæ чи самайы. Æрмæст фистæг бæлцæттæ нæ фæтыхсынц ахæм уавæрæй, фæлæ ма, æгæрыстæмæй, хæдтулджытæн дæр æдæрсгæ аскъæрæн нал вæййы – тротуар æмæ фæндаг æрæхгæнынц. Ахæм фæткхалджыты развæлгъау бафæдзæхсынц, цæмæй цыбыр рæстæгмæ аиуварс кæной сæ фæткхалæн цау, æмæ стæй куы нæ бакоммæ кæсынц, уæд сыл саразынц административон материалтæ.
Иу бынæттон цæрæг тротуарыл уæй кодта йæ уæййæгтæ æмæ фистæг бæлцæтты къуылымпы кодта – нарæг ахизæн йеддæмæ дзы нал уыд. Фæткхалæгыл сарæзтой административон суагъæ, фæдзырдтой йæм къамисы рабадтмæ, фæлæ не рбацыд. Æнæ йæхи йын йæ хъуыддаг равзæрстой – фæивар æй кодтой 400 сомы æмæ йын 3 бон æмгъуыд раттой, цæмæй йæ рæдыд сраст кæна. Цхинвалы районы Арцеуы хъæуы цæрæг та Харебаты Исахъы уынджы тротуарыл уæй кодта бæласы талатæ. Афтæмæй та йæм нæ уыд бары гæххæтт æмæ ма хæлдта æхсæнадон фæтк дæр. Рахицæн ын кодтой бынат централон базары, фæлæ нæ акуымдта уырдæм – уæддæр йæ раздæры бынаты уæй кодта йæ уæййæгтæ. Фæткхалæджы фæивар кодтой 400 сомы. Горæты Царзы районы цæрæг та дары хуытæ, кæцытæ цæуынц уæгъдибарæй æмæ уынгты цъæх нæутæ къахынц. Фæтхалæджы бафæдзæхстой, цæмæй йæ хæдзарон фосмæ йæ хъус дара, кæннод иннæ хатт иваргонд æрцæудзæнис.
Ацы къамис йæ куыст кæнын райдыдта 2015 азæй фæстæмæ. Коронавирусы эпидемийы рæстæджы йæ архайд рæстæгмæ æрлæууыд, фæлæ та карантинон мадзæлттæ фæуыны фæстæ райдыдтой сæ хæстæ æххæст кæнын.
ДЖИОТЫ Алыксандр
