Дидинджытæ сæвæрдтой Украинæйы агрессийы амæттæгты мемориалыл

РХИ-йы Президент Бибылты Анатоли æмæ Луганскы Адæмон Республикæйы Сæргълæууæджы хæстæ æххæстгæнæг Леонид Пасечник дидинджытæ сæвæрдтой Украинæйы агрессийы амæттæгты мемориалон комплекс «Не забудем, не простим»-ыл, кæцы ис Луганскы кæрон Видноейы поселочы. Уый тыххæй хъусын кæны Луганскы информацион центр. Дидинджытæ сæвæрыны церемонийы хайад райстой Луганскы Адæмон Республикæйы Адæмон Советы Сæрдар Денис Мирошниченко, Хуссар Ирыстоны делегацийы уæнгтæ, кæцыйы сконды уыдысты Æддагон бастдзинæдты фæдыл РХИ-йы Парламенты комитеты сæрдар Коцты Игорь, депутат Плиты Александр, РХИ-йы Президенты æххуысгæнæг Гæззаты Давид.

Уый размæ дыууæ паддзахады сæргълæуджытæн баныхæстæ уыд Луганскы, Хуссар Ирыстон æмæ Луганскы Адæмон Республикæты ‘хсæн æмгуыстады перспективæтæ фæарфдæр кæныныл æруынаффæ кæнгæйæ, афтæ ма æхсæнпаддзахадон сразыдзинæдтыл къухтæ æрфыссыны фарстытыл дæр. Мемориал «Не забудем, не простим»-ы ныгæд сты Луганскы цæрджытæ, кæцытæ фæмард сты 2014 азы июль-августы Луганскы Адæмон Республикæйы столицæйыл киеваг тыхон структурæты æрхъулайы фæстиуæгæн.

Уæд горæты сæвзæрд уæззау уавæр: нæ дзы уыд электроэнерги, моргы бынæттæ нал уыд, проблемæ сæвзæрд киеваг агрессийы амæттæгты баныгæнынимæ. Уый фæдыл ист æрцыд уынаффæ Луганскы хуссар-скæсæйнаг хай Видноейы поселочы цур областон психоневрологон диспансеры территоримæ æввахс фæмардуæвджыты рæстæгмæ баныгæныны тыххæй. Агурæг къордты активистты æмæ амæттæгты баныгæныны хайадисджыты бæрæггæнæнтæм гæсгæ, æфсымæрон ингæны ныгæд æрцыдысты 500 адæймаджы онг.